އިރާގުގެ އިސްލާމީ ރެސިސްޓެންސް އިން ސައުދީއަށް ވަރުގަދަ އިންޒާރެއް ދީފި
28 ޖުލައި 2026 | އަންގާރަ 07:38ސައުދީގެ ތެޔޮ މަރުކަޒުތަކަށް ދެމުންދާ ހަމަލާތަކަކީ އިރާގުން ފޮނުވާ ހަމަލާތަކެއް ކަމަށް ބުނެ ކުރާ ތުހުމަތުތައް އެ ގައުމުގެ ރެސިސްޓެންސް ގްރޫޕުން ދޮގުކޮށްފި. އެ ޖަމާއަތުން ބުނީ މިއީ ޔަމަނުގެ ހަމަލާތަކުގެ ކުރިމަތީގައި ސައުދީ ސަރުކާރު ފެއިލްވެފައިވާ މިންވަރު ފޮރުވުމަށް ކުރާ ކަމެއް ކަމަށާއި، ސައުދީން އަޅާ ކޮންމެ ފިޔަވަޅަކަށް ވަރުގަދަ ރައްދެއް ދޭނެ ކަމަށް.
ސައުދީ އަރަބިއްޔާގެ ބައެއް ތެޔޮ ވަސީލަތްތަކަށް އަމާޒުކޮށް ދެމުންދާ ހަމަލާތަކަކީ އިރާގުން ދޭ ހަމަލާތަކެއް ކަމަށް ބުނެ އެ ގައުމުން ކުރާ ތުހުމަތުތައް، އިރާގުގެ ރެސިސްޓެންސް ގްރޫޕުން ހޯމަ ދުވަހު ނެރުނު ބަޔާނެއްގައި ވަނީ ދޮގުކޮށްފައި | ޕްރެސް ޓީވީ
ސައުދީ އަރަބިއްޔާ އިން ނިންމާ ވިސްނުމެއްނެތް ނިންމުމަކަށް ވަރުގަދަ ރައްދު ހަމަލާއެއް ދޭނެ ކަމަށާއި، އެ ނިންމުންތަކާމެދު އެ ގައުމުން ހިތާމަކުރަން ޖެހޭނެ ކަމަށް އިރާގުގެ އިސްލާމީ ރެސިސްޓެންސް ގްރޫޕުން އިންޒާރު ދީފި އެވެ.
ހޯމަ ދުވަހު އެ ގްރޫޕުން ނެރުނު ބަޔާނެއްގައި، ސައުދީގެ ތެޔޮ މަރުކަޒުތަކަށް ދެމުންދާ ހަމަލާތަކަކީ އިރާގުން ފޮނުވާ ހަމަލާތަކެއް ކަމަށް ބުނެ ސައުދީ ސަރުކާރުން ދާދިފަހުން ކުރި ތުހުމަތުތައް ވަނީ ދޮގުކޮށްފަ އެވެ.
އެ ބަޔާނުގައި ބުނެފައިވާ ގޮތުގައި، އެއްވެސް އަސާސެއް ނެތް މި ތުހުމަތުތަކަކީ ޔަމަނުގެ ރެސިސްޓެންސް ފޯސްތަކުން ސައުދީގެ ބިމުގެ އަޑީގައިވާ މުހިންމު ވަސީލަތްތަކަށް އަމާޒުކޮށް ދެމުންދާ ވަރުގަދަ ހަމަލާތަކުގެ ކުރިމަތީގައި ސައުދީ ސަރުކާރު ފެއިލްވެފައިވާ މިންވަރު ފޮރުވުމަށް ކުރާ މަސައްކަތެއް ކަމަށް ބުނެފައިވެ އެވެ.
"އަޅުގަނޑުމެން އިސްލާމީ ރެސިސްޓެންސްގެ ފަރާތުން ސައުދީ ސަރުކާރަށް ސާފު އިންޒާރެއް ދެން. އެމީހުންގެ ފަރާތުން ފެންނަ ކޮންމެ މޮޔަ އަމަލަކަށް ވަރުގަދަ ރައްދެއް ދޭނަން. އެ ރައްދު ހަމަލާގެ ސަބަބުން އެމީހުން އިންތިހާއަށް ހިތާމަކުރަން މަޖުބޫރުވާނެ،" އެ ބަޔާނުގައި ބުނެފައިވެ އެވެ.
މީގެއިތުރުން، އެކި ދިމަދިމާއަށް އިނގިލި ދިއްކޮށް ތުހުމަތުތައް ކުރުމުގެ އާދަ ދޫކޮށްލުމަށް ސައުދީ ކަމާބެހޭ ފަރާތްތަކަށް ރެސިސްޓެންސް ގްރޫޕުން ވަނީ ގޮވާލާފަ އެވެ. އަދި އޭގެ ބަދަލުގައި ޔަމަނުގެ ރައްޔިތުންނާ ދެކޮޅަށް ހިންގާ އަނިޔާވެރި އަދި އިންސާނިއްޔަތާ ޚިލާފު ހިސާރު ކުރުންތައް ހުއްޓާލުމަށް ވަނީ ބާރުއަޅާފަ އެވެ.
"ތިޔަބައިމީހުންގެ ނާކާމިޔާބީތައް ފޮރުވުމަށްޓަކައި އެކި ފަރާތްތަކަށް ތުހުމަތުތައް ކުރުމުގެ ބަދަލުގައި، މިއަދު އެންމެ ބޮޑަށް ބޭނުންވެފައިވަނީ ޔަމަނުގެ ރައްޔިތުންނަށް ކުރިމަތިކޮށްފައިވާ އަނިޔާވެރި ހިސާރު އުވާލުން،" ބަޔާނުގައި އިތުރަށް ބަޔާންކޮށްފައިވެ އެވެ.
ޔަމަނުގެ ހޫޘީން ބުނާ ގޮތުގައި ޖުލައި މަހުގެ 13 ވަނަ ދުވަހު ސައުދީ ސިފައިން ވަނީ ޔަމަނުގެ ސަންޢާ ބައިނަލްއަޤުވާމީ އެއާޕޯޓަށް ހަމަލާދީ، ހަތަރު އަހަރަށް ދެމިގެންދިޔަ ހަނގުރާމަ ހުއްޓާލުމުގެ އެއްބަސްވުމާ ޚިލާފުވެފަ އެވެ. މިއާއެކު ޔަމަނުގެ ހަތިޔާރު އެޅި ޖަމާއަތްތަކުން ވަނީ އަލުން ރައްދު ހަމަލާތައް ދޭން ފަށާފަ އެވެ.
އޭގެ ފަހުން ޖެހިގެން އައި ދުވަސްތަކުގައި، ސައުދީގެ އަސްކަރީ ހަމަލާތަކަށް ރައްދު ދިނުމުގެ ގޮތުން ޔަމަނުގެ ހޫޘީންގެ ފައުޖުތަކުން ވަނީ ސައުދީ އަރަބިއްޔާގެ މުހިންމު ތަންތަނަށް ހަމަލާދީފަ އެވެ. މީގެ ތެރޭގައި އަބްހާ ބައިނަލްއަޤުވާމީ އެއާޕޯޓް ހިމެނެ އެވެ.
ވޭތުވެދިޔަ ހޯމަ ދުވަހު ހޫޘީން ނުވަތަ އަންސާރުﷲ ޖަމާއަތުން ވަނީ "ހިސާރަށް ހިސާރު" ސިޔާސަތު ފަށާފައިވާކަން އިއުލާންކޮށްފަ އެވެ. މިގޮތުން ބާބުލް މަންދަބު ކަނޑުއޮޅިން ދަތުރުކުރާ ސައުދީގެ ކަނޑުގެ އުޅަނދުފަހަރު ހިސާރުކުރާނެ ކަމަށް އެ ޖަމާއަތުން ވަނީ ބުނެފަ އެވެ.
އެ ޖަމާއަތުން ބުނި ގޮތުގައި މި ފިޔަވަޅަކީ ޔަމަނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި އަސްކަރީ ފިއްތުންތަކާ އެއްވަރުގެ ރައްދެކެވެ. އަދި ޔަމަނަށް ދޭ ހަމަލާތައް ހުއްޓާލަންދެން މި އޮޕަރޭޝަންތައް ކުރިއަށްދާނެ ކަމަށް އެ ޖަމާއަތުން ބުންޏެވެ.
ޔަމަނުގެ އަސްކަރީ ތަރުޖަމާނު ޔަޙްޔާ ސަރީޢު ހޮނިހިރު ދުވަހު ވިދާޅުވި ގޮތުގައި، ރެސިސްޓެންސް ގްރޫޕުން ވަނީ ޖީޒާން އަދި ޔަންބޫ ސިޓީގައި ހުރި ސައުދީގެ ދައުލަތުގެ ތެޔޮ ކުންފުނި، އަރަމްކޯގެ މަރުކަޒުތަކަށް އަމާޒުކޮށް ހަމަލާތަކެއް ދީފަ އެވެ.
