ޔޫކްރެއިން އަށް ރަޝިޔާއިން ދިން މިސައިލް ހަމަލާތަކެއްގައި ކުޑަކުއްޖަކާއެކު މަދުވެގެން ތިން މީހުން މަރުވެއްޖެ
8 އޯގަސްޓު 2026 | ހޮނިހިރު 10:00ރަޝިޔާގެ ބެލިސްޓިކް މިސައިލް ހަމަލާތަކުގައި ކީވްގެ އިމާރާތްތަކަށް ބޮޑެތި ގެއްލުންތަކެއް ލިބިފައިވާއިރު، ވައިގެ ދިފާއީ ނިޒާމުތައް ލިބުން ލަސްވުމުގެ ސަބަބުން ފުރާނައާއި މުދަލަށް ލިބޭ ގެއްލުން އިތުރުވަމުންދާކަމަށް ރައީސް ޒެލެންސްކީ ވިދާޅުވެއްޖެ. މީގެ އިތުރުން ރަޝިޔާގެ އިގްތިސާދަށް ހުރަސްއެޅުމަށް ޔޫކްރެއިނުން ތެޔޮ ސާފުކުރާ ކާރުޚާނާތަކަށް ހަމަލާދެމުންދާއިރު، ޒެލެންސްކީ މިހާރު ގެންދަވަނީ ބައިނަލްއަގުވާމީ ތާއީދު ހޯއްދެވުމަށް ސާބިއާއަށް ރަސްމީ ދަތުރުފުޅެއް ކުރައްވަމުން
ޔޫކްރެއިންގެ ވެރިރަށް ކީވް ކައިރިއަށް ރަޝިޔާއިން ދިން ނުރައްކާތެރި ހަމަލާތަކަކާ ގުޅިގެން އުފެދުނު ބޮޑު އަލިފާންގަނޑު ނިއްވުމަށް ފަޔަރ ފައިޓަރުން ދަނީ ހަރަކާތްތެރިވަމުން | ސްކްރީން އިމޭޖް
ޔޫކްރެއިންގެ ވެރިރަށް ކީވް ކައިރިއަށް ރަޝިޔާއިން ރޭގަނޑު ދިން މިސައިލް ހަމަލާތަކެއްގައި ކުޑަކުއްޖަކާއެކު މަދުވެގެން ތިން މީހުން މަރުވެފައިވާ ކަމަށް އެ ސަރަހައްދުގެ އޮފިޝަލަކު ވިދާޅުވެއްޖެ އެވެ.
ހޮނިހިރު ދުވަހުގެ ފަތިހުގެ ވަގުތެއްގައި ކީވްގެ އިރުމަތީ ސަރަހައްދަށް އަމާޒުކޮށް މިސައިލް ހަމަލާތަކެއް ދީފައިވާއިރު، ބާރުގަދަ ގޮވުންތަކެއްގެ އަޑު އިވުނު ކަމަށް އެ ސަރަހައްދުގައި ތިބި މީހުން ވަނީ ރިޕޯޓްކޮށްފަ އެވެ. މި ހަމަލާތައް ދީފައި މިވަނީ ޔޫކްރެއިންގެ އެކި ސަރަހައްދުތަކަށް ދިން ހަމަލާތަކެއްގައި 21 މީހުން މަރުވިތާ މަދު ދުވަސްކޮޅެއްގެ ތެރޭގަ އެވެ.
ރަޝިޔާއިން ދިން ބެލިސްޓިކް މިސައިލް ހަމަލާތަކުގައި ތިން މީހުން މަރުވެ، އިތުރު ތިން މީހަކު ޒަޚަމްވެފައިވާ ކަމަށް އެ ސަރަހައްދުގެ މިލިޓަރީ އެޑްމިނިސްޓްރޭޝަންގެ ވެރިޔާ ޓިމޫރް ޓްކަޗެންކޯ ވިދާޅުވި އެވެ. އަދި މިސައިލްތަކުގެ ބައިތައް ވެއްޓުމުގެ ސަބަބުން އެޕާޓްމަންޓް އިމާރާތްތަކަށާއި ކާރުތަކަށް ގެއްލުން ލިބިފައިވާ ކަމަށާއި، ވަކިން ހުރި އެހެން އިމާރާތެއްގައި އަލިފާން ރޯވެފައިވާ ކަމަށްވެސް އޭނާ ވިދާޅުވި އެވެ.
ކީވްގެ މޭޔަރު ވިޓާލީ ކްލިޗްކޯ ޓެލެގްރާމް މެދުވެރިކޮށް ވިދާޅުވި ގޮތުގައި، ކީވްގެ އިމާރާތެއްގައާއި ތެޔޮ ރައްކާކުރާ ޓޭންކެއްގައި ރޯވި އަލިފާން ނިއްވުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ.
ޔޫކްރެއިންގެ ސްޓޭޓް އެމަޖެންސީ ސާވިސް (ޑީ.އެސް.އެން.އެސް) އިން ވަނީ ކީވްގެ ގަރާޖުތަކަކާއި، ވިޔަފާރިކުރާ ތަނެއްގެ އިތުރުން އިމާރާތެއްގައި އަލިފާން ރޯވެފައިވާ މަންޒަރު ފެންނަ ފޮޓޯތަކެއް އާންމުކޮށްފަ އެވެ. އަދި މި ހަމަލާތަކުގައި އަނިޔާވި މީހުންގެ ސީދާ އަދަދު ކަށަވަރުކުރުމުގެ މަސައްކަތް ކުރަމުންދާ ކަމަށްވެސް އެ އިދާރާއިން ބުނެފައިވެ އެވެ.
ޔޫކްރެއިންގެ ރައީސް ވޮލޮޑިމިއަރ ޒެލެންސްކީ މިހާރު ވަނީ ސާބިއާގެ ވެރިރަށް ބެލްގްރޭޑަށް ވަޑައިގެންފަ އެވެ. މިއީ އޭނާ އެ ގައުމަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅުގައި ސާބިއާގެ ރައީސް އަލެކްސަންޑަރ ވޫޗިޗްއާ ބައްދަލުކުރައްވައި، ދެ ގައުމުގެ އިގްތިސާދީ ގުޅުމާއި، ސަލާމަތީ ކަންކަމުގެ އިތުރުން ޔޫރަޕްގެ އިއްތިހާދާ (އީ.ޔޫ) އޮންނަ ގުޅުމާ ބެހޭގޮތުން މަޝްވަރާ ކުރެއްވުމަށް ވަނީ ހަމަޖެހިފަ އެވެ. ޒެލެންސްކީ މަސައްކަތް ކުރައްވަމުން ގެންދަވަނީ ޔޫކްރެއިނަށް އޮތް ތާއީދު އިތުރުކުރުމަށެވެ. ނަމަވެސް ރައީސް ވޫޗިޗް ވަނީ ރަޝިޔާއާ ދެކޮޅަށް ދަތިކުރުމުގެ ފިޔަވަޅު އެޅުމަށް އިންކާރު ކުރައްވާފަ އެވެ. ސާބިއާއަކީ ޔޫރަޕްގެ އިއްތިހާދާ ގުޅުމަށް މަސައްކަތް ކުރަމުންދާ ގައުމެކެވެ. އެ ގައުމުން ވަނީ ޔޫކްރެއިނަށް އެހީތެރިކަން ފޯރުކޮށްދީ، ހަނގުރާމައަށްފަހު އެ ގައުމު އަލުން އާރާދުކުރުމުގައި އެހީތެރިވާނެ ކަމަށް ވައުދުވެފަ އެވެ.
މި ހަފުތާގެ ކުރީކޮޅު ޒެލެންސްކީ ވިދާޅުވި ގޮތުގައި، ބައިނަލްއަގުވާމީ ބައިވެރިންގެ ފަރާތުން އެންޓި-ބެލިސްޓިކް ސިސްޓަމްތައް ލިބުން ލަސްވުމަކީ "ބިރުވެރި މަރުތަކާއި ހަލާކުތަކެއް" ކުރިމަތިވާ ކަމެކެވެ. އަދި ވަރުގަދަ ވައިގެ ދިފާއީ ނިޒާމެއް އޮތްނަމަ، ފަހަކަށް އައިސް ދިން ނުރައްކާތެރި ހަމަލާތަކުގައި ގިނަ ބައެއްގެ ފުރާނަ ސަލާމަތް ކުރެވުނީސް ކަމަށްވެސް އޭނާ ވިދާޅުވި އެވެ.
މީގެ އިތުރުން، ބޭރުގެ ބައިވެރިން ޔޫކްރެއިނަށް ފޯރުކޮށްދޭ މިސައިލް ދިފާއީ ނިޒާމުތަކުގެ މިންވަރު މިއަހަރު "ވަރަށް ބޮޑަށް މަދުވެފައިވާ" ކަމަށްވެސް ރައީސް ޒެލެންސްކީ ފަހުން ވިދާޅުވި އެވެ.
މި ހަމަލާތައް ދީފައި މިވަނީ، ރަޝިޔާގެ އެތެރޭގައި ހުރި ދެ ތެޔޮ ސާފުކުރާ ކާރުޚާނާއަކަށާއި ކަޅު ކަނޑުގައި ހުރި ރަޝިޔާއާ ގުޅުންހުރި އުޅަނދުތަކަކަށް ޔޫކްރެއިނުން ހަމަލާދީފައި ވަނިކޮށެވެ. ޒެލެންސްކީ ވިދާޅުވި ގޮތުގައި މި ހަމަލާތަކުގެ ބޭނުމަކީ، ޔޫކްރެއިން ހަނގުރާމައަށް ޚަރަދުކުރުމަށް ރަޝިޔާއިން ތެލުގެ ވިޔަފާރިން ހޯދާ އާމްދަނީ މަދުކުރުމެވެ.
ޔޫކްރެއިންގެ އަސްކަރިއްޔާއިން ހޮނިހިރު ދުވަހު ބުނި ގޮތުގައި، ރޭގަނޑު ދިން ހަމަލާތަކުގައި ރަޝިޔާގެ އިލްސްކީ އަދި ސިޒްރާން ތެޔޮ ސާފުކުރާ ކާރުޚާނާތަކަށް ވަނީ ހަމަލާދީފަ އެވެ. މި ހަމަލާތަކުގެ ސަބަބުން އެ ދެ ތަނުގައިވެސް ވަނީ އަލިފާން ރޯވެފަ އެވެ.
ފަހަކަށް އައިސް ޔޫކްރެއިނާއި ރަޝިޔާއާ ދެމެދު ކުރިއަށްދިޔަ ސުލްހައިގެ ވާހަކަތައް ނާކާމިޔާބުވެފައިވާއިރު، މީގެ ސަބަބުން ދެ ގައުމުގެ މެދުގައި ދެވޭ ހަމަލާތައް ވަނީ އިތުރަށް ވަރުގަދަވެފަ އެވެ.
