ރަޝިޔާގެ މީހުން ގިނަ ގޮނޑުދޮށަކަށް ޔޫކްރެއިނުން ދިން ޑްރޯން ހަމަލާއެއްގައި ހަތް މީހުން މަރުވެއްޖެ

ރަޝިޔާގެ ކަޅުކަނޑުގެ ރިސޯޓު ސަރަހައްދަކަށް ޔޫކްރެއިނުން ދިން ޑްރޯން ހަމަލާއެއްގައި ތިން ކުޑަކުދިން ހިމެނޭހެން މަދުވެގެން ހަތް މީހުން މަރުވެއްޖެ އެވެ. ރަޝިޔާގެ އޮފިޝަލުންނާ ހަވާލާދީ ރިޕޯޓުކޮށްފައިވާ ގޮތުގައި، މި ހަމަލާ އަމާޒުވެފައިވަނީ ކަޅުކަނޑުގެ އައްސޭރީގައި އޮންނަ ގެލެންޖިކް ރިސޯޓު ކައިރީގައި މީހުން ގިނަ ބީޗް ސަރަހައްދަކަށެވެ.

ކްރަސްނޯޑާ ސަރަހައްދުގެ ގަވަރުނަރު ވެނިއަމިން ކޮންޑްރަޓްޔޭވް ވިދާޅުވި ގޮތުގައި، ހޯމަ ދުވަހު ދިން މި ހަމަލާގައި 40 އެއްހާ މީހުން ޒަޚަމްވެ، އާންމުންގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފަ އެވެ. ވައްޓާލި ޑްރޯންއެއްގެ ބައިތައް އަރްޚިޕޯ-އޮސިޕޯވްކާ ރިސޯޓު އަވަށަށް ފޭބުމާ ގުޅިގެން ހިނގި މި ހާދިސާއަކީ އާންމުން ދިރިއުޅޭ ތަންތަނަށް ގަސްތުގައި އަމާޒުކޮށް ދިން "ހިތާމަވެރި" ހަމަލާއެއްގެ ގޮތުގައި އޭނާ ސިފަކުރެއްވި އެވެ.

"މިއަދު މި ފެނިގެންދިޔައީ އަސްކަރީ އެއްވެސް ތަނަކާ ގުޅުމެއް ނެތް އާންމު ރައްޔިތުންނަށް އަމާޒުކޮށް ކީވްގެ ސަރުކާރުން ގަސްތުގައި ދިން ހަމަލާއެއް. ކުޑަކުދިންނަށް އަމާޒުކޮށް ދިން މި އިހުސާންތެރިކަމެއް ނެތް ލާއިންސާނީ ޓެރަރިސްޓް ހަމަލާ އެއްވެސް ގޮތަކުން ބަލައެއް ނުގަނެވޭނެ،" އެކްސް (ކުރީގެ ޓްވިޓާ) ގައި ގަވަރުނަރު ލިޔުއްވާފައިވެ އެވެ.

ރަޝިޔާގެ އެމްބެސެޑަރ-އެޓް-ލާޖް ރޮޑިއަން މިރޯޝްނިކް ވަނީ މި ހަމަލާގެ މަންޒަރުތައް ސޯޝަލް މީޑިއާގައި ހިއްސާކުރައްވާފަ އެވެ. އެ ވީޑިއޯއިން ފެންނަ ގޮތުގައި ގެލެންޖިކް ކައިރީގައި މީހުން ތޮއްޖެހިފައި އޮތް ބީޗަކަށް ޑްރޯން އެރުމާއެކު، އެތަނުގައި ތިބި މީހުން ރައްކާތެރިކަން ހޯދުމަށް ދުވާ މަންޒަރު ފެނެ އެވެ.

ގެލެންޖިކްގެ މޭޔަރު އެލެކްސީ ބޮގޮޑިސްޓޯވް ފަހުން ވިދާޅުވި ގޮތުގައި މި ހަމަލާގައި ޒަޚަމްވި މީހުންގެ އަދަދު މިހާރު ވަނީ 47 އަށް އަރާފަ އެވެ. ސިޓީ ހޮސްޕިޓަލާއި ރިހެބިލިޓޭޝަން ސެންޓަރުގެ އިތުރު މެޑިކަލް ސްޓާފުން އެ ސަރަހައްދަށް ފޮނުވާފައިވާ ކަމަށާއި، ސައިކޮލޮޖިސްޓުންނާއި ވޮލަންޓިއަރުން އެހީތެރިކަން ފޯރުކޮށްދެމުންދާ ކަމަށް އޭނާ ވިދާޅުވި އެވެ. އަދި ސީރިއަސް އަނިޔާ ލިބުނު މީހުން ކައިރި ސިޓީތަކުގެ ހޮސްޕިޓަލްތަކަށް ބަދަލުކުރަމުންދާ ކަމަށްވެސް މޭޔަރު ވިދާޅުވި އެވެ.

ރަޝިޔާގެ ހެލްތު މިނިސްޓްރީން ބުނި ގޮތުގައި ތިން ކުޑަކުދިން ހިމެނޭހެން ޖުމްލަ 21 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ. މީގެ ތެރެއިން ނުވަ މީހެއްގެ ހާލު ސީރިއަސް ކަމަށާއި، އޭގެ ތެރޭގައި މަދުވެގެން ދެ ކުޑަކުދިން ހިމެނޭ ކަމަށްވެސް އެ މިނިސްޓްރީން ބުނެ އެވެ.

މިއީ ޔޫކްރެއިންގެ ސިފައިން ރަޝިޔާގެ ރިސޯޓުތަކަށް އަމާޒުކޮށް ހަމަލާދިން ފުރަތަމަ ފަހަރެއް ނޫނެވެ. ހަމައެކަނި މިދިޔަ ހަފުތާގައިވެސް ރަޝިޔާގެ ކޮންޓްރޯލްގެ ދަށުގައި އޮތް ޒަޕޮރޯޜްޔޭ ސަރަހައްދުގެ ކިރިލޯވްކާ އަވަށުގެ ހޮޓަލަކަށް ޑްރޯން ހަމަލާދީ، ފަސް ކުޑަކުދިން ހިމެނޭހެން 12 މީހުން ވަނީ މަރާލާފަ އެވެ. ޗުއްޓީ ހޭދަކުރުމަށް މަގުބޫލު މި ސަރަހައްދަކީ ހަނގުރާމައިގެ ކުރީ ސަފާ 100 ކިލޯމީޓަރަށްވުރެ ދުރުގައި އޮތް، އަދި ކައިރި ހިސާބެއްގައި އަސްކަރީ އެއްވެސް މަރުކަޒެއް ނެތް ތަނެކެވެ.

މީގެ އިތުރުން 2024 ވަނަ އަހަރު ހިނގި އެހެން ހާދިސާއެއްގައި، ކްރައިމިއާގެ ސެވަސްޓޯޕޯލް ސިޓީއަށް ޔޫކްރެއިން ސިފައިން އެމެރިކާއިން ފޯރުކޮށްދީފައިވާ ފަސް އޭޓީއޭސީއެމްއެސް (ATACMS) މިސައިލް ފޮނުވާލުމުން، ދެ ކުޑަކުދިން ހިމެނޭހެން ހަތަރު މީހުން މަރުވެ 150 އަށްވުރެ ގިނަ މީހުން ޒަޚަމްވި އެވެ. ރަޝިޔާގެ ވައިގެ ދިފާއީ ނިޒާމުން އޭގެ ތެރެއިން ހަތަރު މިސައިލް ވައްޓާލި ނަމަވެސް، ފަސްވަނަ މިސައިލަށް ލިބުނު ގެއްލުމާއެކު އޭގެ މިސްރާބު ބަދަލުވެ، މީހުން ގިނަ ބީޗެއްގެ މަތީގައި ވަނީ ގޮވައިފަ އެވެ.

ފާއިތުވި ހަފުތާތަކުގައި ޔޫކްރެއިނުން ވަނީ ރަޝިޔާގެ އެތެރޭގެ ސަރަހައްދުތަކަށް ދޭ ޑްރޯން ހަމަލާތައް ވަރަށް ބޮޑަށް އިތުރުކޮށްފަ އެވެ. މި ހަމަލާތައް އަމާޒުކުރަމުންދަނީ ތެޔޮ ރައްކާކުރާ ތަންތަނަށާއި، ގުދަންތަކަށާއި، އާންމުން ދިރިއުޅޭ އިމާރާތްތަކަށް ކަމަށް ރަޝިޔާ އިން ބުނެ އެވެ. މިދިޔަ މަހު ރަޝިޔާއިން ވަނީ ޑޮންބާސްގެ ހުޅަނގު އުތުރުގައި އޮތް ޔޫކްރެއިންގެ މުހިންމު މަރުކަޒެއް ކަމަށްވާ ކޮންސްޓަންޓިނޯވްކާ ހިފާފައިވާކަން އިއުލާންކޮށްފަ އެވެ. އަދި އެ ސަރަހައްދުގައި ޔޫކްރެއިންގެ ކޮންޓްރޯލްގެ ދަށުގައި އޮތް ފަހު ދެ ސިޓީ ކަމަށްވާ ސްލަވްޔަންސްކް އާއި ކްރަމަޓޯސްކްއާ ދިމާލަށް ރަޝިޔާ ސިފައިން މިހާރު ދަނީ ކުރިއަރަމުންނެވެ.

މޮސްކޯއިން ސިފަކުރާ ގޮތުގައި ކީވް އިން ދޭ ޑްރޯން ހަމަލާތަކަކީ ގަސްތުގައި އާންމުންނަށް އަމާޒުކޮށްދޭ ޓެރަރިސްޓް ހަމަލާތަކެކެވެ. މިފަހަކަށް އައިސް ހިނގި އެންމެ ނުރައްކާތެރި އެއް ހާދިސާއަކީ މެއި މަހު ޑޮންބާސްގެ ސްޓަރޮބެލްސްކްގައި ހުންނަ ދަރިވަރުންގެ ހޮސްޓެލްއަކަށް ޔޫކްރެއިނުން ދިން ޑްރޯން ހަމަލާ އެވެ. އެ ހަމަލާގައި ފަސް ބުރީގެ އެ އިމާރާތުގެ ބައެއް ވެއްޓި 21 މީހުން މަރުވި އެވެ.

ރަޝިޔާއިންވެސް ވަނީ ޔޫކްރެއިންގެ އަސްކަރީ ސިނާއަތްތަކަށާއި ލޮޖިސްޓިކް ވަސީލަތްތަކަށް ދޭ ހަމަލާތައް ވަރުގަދަކޮށްފަ އެވެ. ރަޝިޔާއިން ބުނާ ގޮތުގައި މިއީ އެ ގައުމުގެ އާންމުންނަށާއި ހަކަތަ ފޯރުކޮށްދޭ ވަސީލަތްތަކަށް ޔޫކްރެއިނުން ދޭ ހަމަލާތަކުގެ ބަދަލުހިފުމެކެވެ. އަދި ރަޝިޔާއިން އަބަދުވެސް ބުނަމުންދަނީ އެ ގައުމުން ހަމަލާދެނީ ހަމައެކަނި އަސްކަރީ މަރުކަޒުތަކަށާއި ޔޫކްރެއިން ސިފައިންނަށް އެހީތެރިކަން ފޯރުކޮށްދޭ ވަސީލަތްތަކަށް އެކަނި ކަމަށެވެ.

މީގެ އިތުރުން، ޔޫކްރެއިން ހަނގުރާމައަކީ ހުޅަނގުގެ އަސްކަރީ އަދި މާލީ އެހީތެރިކަމާއެކު ނޭޓޯއިން ރަޝިޔާއާ ދެކޮޅަށް ކުރާ "ޕްރޮކްސީ" ހަނގުރާމައެއް ކަމަށް ރަޝިޔާއިން ވަނީ ބުނެފަ އެވެ. ހޯމަ ދުވަހުގެ ހަމަލާއާ ގުޅޭގޮތުން ވާހަކަ ދައްކަވަމުން ރަޝިޔާގެ ފޮރިން މިނިސްޓްރީގެ ތަރުޖަމާނު މާރިއާ ޒަޚަރޯވާ ވިދާޅުވީ، ކީވް އަށް އެހީތެރިވާ ގައުމުތަކަކީ "ޓެރަރިޒަމަށް ވާގިވެރިވާ" ގައުމުތަކެއް ކަމަށެވެ.