ހަނގުރާމައާއި ސުލްހައިގެ ވަގުތު ކަނޑައަޅެމުގެ ފުރުސަތެއް އެމެރިކާއަކަށް ނުދޭނަން: އީރާން

ހަނގުރާމައާއި ސުލްހައިގެ ވަގުތު ކަނޑައެޅުމުގެ ފުރުސަތު އެމެރިކާއަށް ނުދޭނެ ކަމަށް އީރާނުގެ ޚާރިޖީ ވުޒާރާގެ ތަރުޖަމާނު ވިދާޅުވެއްޖެ އެވެ. އީރާނުގެ ދިފާއީ އަދި ހާރިޖީ ސިޔާސަތުތައް ބިނާވެފައިވަނީ ހަމައެކަނި އެ ގައުމުގެ ގައުމީ މަސްލަހަތާއި ސަލާމަތުގެ މައްޗަށް ކަމަށް ފާހަގަކުރައްވައި، ހަނގުރާމައެއް ފަށާނެ ނުވަތަ ނިންމާނެ ވަގުތު ކަނޑައެޅުމުގެ ބާރު އެމެރިކާއަށް ނޯންނާނެ ކަމަށް ތަރުޖަމާނު ވިދާޅުވި އެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި އިސްމާއިލް ބަޣާއީ މިހެން ވިދާޅުވީ، ގަތަރާއި ޕާކިސްތާނުން ހުށަހެޅި ސުލްހައިގެ ހުށަހެޅުމަކަށް އީރާނާއި އެމެރިކާއިން އިޖާބަދީފައިވާ ކަމަށް މީޑިއާތަކުން ރިޕޯޓްކޮށްފައިވާ ދަނޑިވަޅެއްގަ އެވެ. އަދި މި ދަނޑިވަޅަކީ އެމެރިކާއިން މި ސަރަހައްދަށް ހަތިޔާރު ފޮނުވުން ކުރިއަށްގެންދާ ވަގުތެއްކަންވެސް އޭނާ ފާހަގަކުރެއްވި އެވެ.

އީރާނުގެ ނިންމުންތައް ނިންމާ ގޮތާ ގުޅޭގޮތުން ވާހަކަދައްކަވަމުން ބަޣާއީ ވިދާޅުވީ، އެ ގައުމުގެ ސިޔާސަތުތައް ބިނާވަނީ ބޭރުގެ ނުފޫޒަށްވުރެ ބޮޑަށް، ގައުމުގައި ގާއިމުކުރެވިފައިވާ މުއައްސަސާތަކުގެ ނިންމުންތަކުގެ މައްޗަށް ކަމަށެވެ.

"އަސާސީ ގޮތުން ބަލާއިރު، އަޅުގަނޑުމެންނެއް ތެލާ މެދުވެސް އަދި އެމެރިކާގެ ކަންބޮޑުވުންތަކާ މެދުވެސް ފަރުވާލެއް ނުބަހައްޓަން. އަޅުގަނޑުމެންނަށް މުހިންމީ އަޅުގަނޑުމެންގެ ގައުމީ މަސްލަހަތާއި ގައުމަށް އެންމެ ފައިދާހުރި ގޮތް،" އޭނާ ވިދާޅުވި އެވެ.

އިތުރަށް ވާހަކަދައްކަވަމުން އޭނާ ވިދާޅުވީ، ގައުމީ މަސްލަހަތު ކަނޑައެޅުމަކީ އެންމެ ކަމެއްގެ މައްޗަށް ބިނާވެފައިވާ ކަމެއް ނޫން ކަމަށާއި، އެކަމުގައި ގިނަ ކަންތައްތަކަކަށް ރިއާޔަތްކުރަންޖެހޭ ކަމަށެވެ. އަދި އީރާނުގެ ނިންމުންތައް ނިންމަނީ އިސްލާމީ ޖުމްހޫރިއްޔާގެ ކަމާބެހޭ ހުރިހާ މުއައްސަސާތަކެއް ހިމެނޭ ގޮތަށް، ދެފުށް ފެންނަ ނިޒާމެއްގެ ތެރެއިން ކަމަށްވެސް އޭނާ ވިދާޅުވި އެވެ.

"ހަނގުރާމައާއި ސުލްހައިގެ ވަގުތު ކަނޑައެޅުމުގެ ފުރުސަތު އަޅުގަނޑުމެން ދުވަހަކުވެސް އެމެރިކާއަކަށް ނުދެން، އަދި ނުވެސް ދޭނަން. ގައުމީ މަސްލަހަތު ނިޔާކުރާހާ ހިނދަކު އަޅުގަނޑުމެންގެ ދިފާއުގައި ދެމިތިބޭނަން. އަދި ގައުމީ މަސްލަހަތު ހިމާޔަތްކުރުމަށް ޑިޕްލޮމަސީ ނުވަތަ ހާރިޖީ ގުޅުންތަކަކީ އެންމެ ރަނގަޅު ވަސީލަތް ކަމަށް ފެންނަ ކޮންމެ ހިނދެއްގައި، އޭގެ ބޭނުންވެސް ހިފާނަން،" ބަޣާއީ ވިދާޅުވި އެވެ.

'އީރާނުގެ އުޅަނދަކަށް ޔޫކްރެއިނުން ދިން ހަމަލާގެ ނަތީޖާ ވަރަށް ހިތިވާނެ'

މީގެ އިތުރުން، ކެސްޕިއަން ކަނޑުގައި ދަތުރުކުރަމުންދިޔަ އީރާނުގެ ވިޔަފާރި އުޅަނދަކަށް ޔޫކްރެއިނުން ދިން ނުރައްކާތެރި ހަމަލާ ތަރުޖަމާނު ވަނީ ހަރުކަށި އިބާރާތުން ކުށްވެރިކުރައްވާފަ އެވެ. އޭނާ ވިދާޅުވީ ރަޝިއާއާއި ޔޫކްރެއިނުގެ ހަނގުރާމައިގައި އީރާނުގެ އެއްވެސް ބައިވެރިވުމެއް ނެތް ނަމަވެސް، ޔޫކްރެއިނުން މިފަދަ ލާއިންސާނީ އަމަލެއް ހިންގާފައިވާ ކަމަށެވެ.

މިއީ ގާނޫނާ ހިލާފު އަމަލެއް ކަމަށާއި، މިކަމުގެ ރައްދު ދޭނެ ކަމަށް އޭނާ ވިދާޅުވި އެވެ. އަދި ޔޫކްރެއިނަށް އެހީތެރިވާ ގައުމުތަކުންވެސް މިފަދަ ކަންކަމުގެ ޒިންމާ އުފުލަންޖެހޭނެ ކަމަށް އޭނާ ފާހަގަކުރެއްވި އެވެ.

މިފަދަ ހަމަލާތަކުގެ ސަބަބުން ނުކުމެދާނެ ނުރައްކާތެރި ނަތީޖާތަކަށް ބަލައި، ޔޫކްރެއިނުގެ ރައީސް ވުލޮޑިމިރް ޒެލެންސްކީގެ "ބޮޑުން" އޭނާ ކޮންޓްރޯލްކޮށް، ސަމާލުވާންޖެހޭ ކަމަށް ބަޣާއީ ވިދާޅުވި އެވެ. އޭނާ ސިފަކުރެއްވި ގޮތުގައި މި ހަމަލާއަކީ ބައިނަލްއަގުވާމީ ސަމާލުކަން ހޯދުމަށާއި، ބައިނަލްއަގުވާމީ މައިދާނުގައި ޔޫކްރެއިނުގެ ބާރު ދެއްކުމަށް ހިންގި ރަމްޒީ އަމަލެކެވެ.

ޒެލެންސްކީއާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރެއްވުމަށް ހަމަޖެހިފައިވާތީ، އެ ތިން ފަރާތުގެ މެދުގައި އޮތް ނުރައްކާތެރި ގުޅުމަށް ބަޣާއީ ފާޑުވިދާޅުވި އެވެ.

"މި ގުޅުން ސިފަކުރެވޭނީ 'ނުބައިކަމުގެ ތިނެސްކަނެއް'ގެ ގޮތުގައި،" އޭނާ ވިދާޅުވި އެވެ. އަދި މިފަދަ ގުޅުންތަކުގެ ސަބަބުން ބައިނަލްއަގުވާމީ ސުލްހައާއި ސަލާމަތަށް ދުވަހަކުވެސް ހެޔޮ ބަދަލެއް އައިސްފައިނުވާ ކަމަށް އޭނާ އިތުރަށް ވިދާޅުވި އެވެ.

'އީރާނުން ބޭނުންވަނީ އަވަށްޓެރި ގައުމުތަކާއެކު ރަނގަޅު ގުޅުމެއް ބާއްވަން'

އީރާނުން އަވަށްޓެރި ގައުމުތަކާ ކުރިމަތިލުމަކަށް ދާން ބޭނުންނުވާ ކަމަށް ބަޣާއީ ވިދާޅުވި އެވެ. "އަޅުގަނޑުމެންގެ އެއްވެސް އަވަށްޓެރިއަކާ މެދު ދުޝްމަންކަމެއް ނެތް. އޭގެ ބަދަލުގައި، އީރާނާއި ޕާޝިއަން ގަލްފުގެ ދެކުނު އައްސޭރީގެ ގައުމުތަކާ ދެމެދު ބޮޑެތި ގުޅުންތަކާއި ގުޅިފައިވާ މަސްލަހަތުތަކެއް އެބަހުރި،" އޭނާ ވިދާޅުވި އެވެ.

ނަމަވެސް، ސަރަހައްދުގެ ބައެއް ގައުމުތަކުން އެ ގައުމުތަކުގެ ބިން ބޭނުންކޮށްގެން އީރާނަށް ހަމަލާދިނުމުގެ ފުރުސަތު ދީފައިވާ ކަމަށާއި، ބައެއް ހާލަތްތަކުގައި އެ ގައުމުތަކުން އަމަލީ ގޮތުން އެފަދަ ހަރަކާތްތަކުގައި ބައިވެރިވެފައިވާ ކަމަށް އޭނާ ވިދާޅުވި އެވެ. މީގެ ސަބަބުން، އެ ގައުމުތަކުގައި ހުރި އެމެރިކާގެ މަސްލަހަތުތަކަށް އީރާނުން ރައްދު ހަމަލާ ދޭންޖެހުނު ކަމަށްވެސް އޭނާ ފާހަގަކުރެއްވި އެވެ.

ތަރުޖަމާނު ވިދާޅުވި ގޮތުގައި، މިފަދަ އެއްބާރުލުން ދިނުމަކީ "ހަނގުރާމައިގެ ކުށެއް" ކަމަށް އީރާނުން ދެކޭ ކަމަށާއި، އެކަން ހުއްޓާލުމަށް އީރާނުން އުންމީދުކުރާ ކަމަށް އޭނާ ވިދާޅުވި އެވެ.

'އީރާނާއި އޮމާންގެ މަޝްވަރާތަކަކީ އެމެރިކާއާ ގުޅުމެއް އޮތް ކަމެއް ނޫން'

އީރާނާއި އޮމާނާ ދެމެދު ކުރިއަށްދާ ދެފަރާތުގެ މަޝްވަރާތަކާ ގުޅޭގޮތުން ބަޣާއީ ވިދާޅުވީ، ހުކުރު އަދި ހޮނިހިރު ދުވަހު ބޭއްވުނު ބައްދަލުވުންތަކަކީ ވަރަށް ބޭނުންތެރި އަދި ނަތީޖާ ނެރެވޭނެ މަޝްވަރާތަކެއް ކަމަށެވެ.

މި މަޝްވަރާތަކަކީ ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުގެ ކަންކަން ބެލެހެއްޓުމާއި، ދެ ގައުމުގެ ސިޔާދަތީ ހައްގުތަކަށް އިހުތިރާމްކުރަމުން، ރައްކާތެރިކަމާއެކު ދަތުރުފަތުރު ކުރެވޭނެ ނިޒާމެއް ގާއިމުކުރުމާ ގުޅޭގޮތުން ކުރެވޭ މަޝްވަރާތަކެއް ކަމަށް އޭނާ ވިދާޅުވި އެވެ.

މި މަޝްވަރާތަކަކީ ހަމައެކަނި ދެ ގައުމުގެ ދެމެދުގައި ހިނގާ ކަމެއްކަން ބަޣާއީ ފާހަގަކުރެއްވި އެވެ. "މި މަޝްވަރާތަކާ އެމެރިކާއާ އެއްވެސް ގުޅުމެއް ނެތް. މިއީ އީރާނާއި އޮމާނާ ދެމެދު އޮތް ދެފަރާތުގެ މައްސަލައެއް، އަދި މި މަޝްވަރާތައް ދަނީ ކުރިއަށް،" އޭނާ ވިދާޅުވި އެވެ.