ކެސްޕިއަން ކަނޑުގައި ދަތުރުކުރަމުންދިޔަ އީރާނުގެ މުދާ އުފުލާ ބޯޓަކަށް ޔޫކްރެއިނުން ހަމަލާދީފި

ކެސްޕިއަން ކަނޑުގައި ދަތުރުކުރަމުންދިޔަ އީރާނުގެ މުދާ އުފުލާ ބޯޓަކަށް ޔޫކްރެއިނުން ހަމަލާދީފައިވާ ކަަމަށް އީރާނުން ބުނެފި އެވެ.

 މި ހަމަލާ އީރާނުގެ ފޮރިން މިނިސްޓްރީން ހޮނިހިރު ދުވަހު ވަނީ ކުށްވެރިކޮށްފަ އެވެ. އީރާނުން ބުނި ގޮތުގައި މި ހަމަލާގެ ސަބަބުން އުޅަނދުގައި އެއްޗެއް ގޮވައި، އެކަކު މަރުވެ އިތުރު ފަޅުވެރިއަކަށް ވަނީ އަނިޔާވެފަ އެވެ.

ޔޫކްރެއިންގެ ލީޑަރު ވްލަޑިމިއަރ ޒެލެންސްކީ ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި، އީރާނާ ގުޅުންހުރި އަސްކަރީ މުދާ އުފުލާ އުޅަނދުތަކާއި ހަނގުރާމަމަތީ މަނަވަރަކަށް އަމާޒުކޮށް ދިން ދުރުރާސްތާގެ ހަމަލާތަކުން "ވަރަށް ވަރުގަދަ ނަތީޖާތަކެއް" ލިބިފައިވާ ކަމަށް ވިދާޅުވެފައިވެ އެވެ.

އީރާނުގެ ފޮރިން މިނިސްޓްރީން ބުނީ މީގެ ސަބަބުން ހަނގުރާމައިގެ ހުޅުގަނޑު އިތުރަށް ފުޅާވެ، ނުރައްކާ ބޮޑުވެގެންދާނެ ކަމަށް ބުނެފަ އެވެ. އަދި ޔޫކްރެއިންގެ ސަރުކާރުން ހިންގި މި ޒިންމާދާރުކަންކުޑަ އަމަލު އެހެން ގައުމުތަކުން އެ ގައުމުގެ ލީޑަޝިޕް ޖަވާބުދާރީ ކުރުވުމަށް އީރާނުން ވަނީ ގޮވާލާފަ އެވެ.

އީރާނުގެ ފޮރިން މިނިސްޓްރީން އިންޒާރު ދެމުން ބުނެފައިވަނީ، އެ ގައުމުގެ ގައުމީ މަސްލަހަތާއި ސަލާމަތްތެރިކަން ހިމާޔަތް ކުރުމުގައި އީރާނުން ފަސްނުޖެހޭނެ ކަމަށެވެ.

މީގެ އިތުރުން، ރަޝިޔާ އާއި ޔޫކްރެއިންގެ މެދުގައި ހިނގަމުންދާ ހަނގުރާމައިގެ ތެރެއަށް އީރާނުން ދުވަހަކުވެސް ވަދެފައި ނުވާނެ ކަމަށް އެ މިނިސްޓްރީން ބުނެފައިވެ އެވެ.

އީރާނުގެ ފޮރިން މިނިސްޓަރު ހުސައިން އާމިރު-އަބްދުﷲ ހިއާން 2022 ވަނަ އަހަރު ކަށަވަރުކޮށްދެއްވި ގޮތުގައި، އެ އަހަރުގެ ފެބްރުއަރީ މަހު ޔޫކްރެއިން ހަނގުރާމަ ފެށުމުގެ މަސްތަކެއް ކުރިން ތެހެރާނުން ވަނީ ރަޝިޔާއަށް "މަދު އަދަދެއްގެ" ޝާހިދު-136 މަރުކާގެ ކަމިކާޒޭ ޑްރޯން ފޯރުކޮށްދީފަ އެވެ. ނަމަވެސް، މޮސްކޯއިން ބުނަމުންދަނީ ޝާހިދު-136 ގެ ފަރުމާގެ މައްޗަށް ބިނާކޮށް އުފައްދާފައިވާ ކަމަށް ބެލެވޭ "ގެރާން-2" މަރުކާގެ ހުރިހާ ޑްރޯންތަކަކީ ރަޝިޔާގެ އެތެރޭގައި އުފައްދާފައިވާ ތަކެތި ކަމަށެވެ.

އެމެރިކާއިން ވެސް ވަނީ އީރާނުގެ ޝާހިދު-136 އާ އެއްގޮތް "ލޫކަސް" ނަމަކަށް ކިޔާ ޑްރޯންއެއް އަމިއްލައަށް އުފައްދާފަ އެވެ. އަދި އީރާނާއެކު ހިނގި ކުރިމަތިލުންތަކުގައި އެމެރިކާއިން ވަނީ މި ޑްރޯން ބޭނުންކޮށްފަ އެވެ.

ޒެލެންސްކީ ހޮނިހިރު ދުވަހު ވިދާޅުވީ، ރަޝިޔާއިން އީރާނުގެ ސަރުކާރަށް އަލަށް ފޯރުކޮށްދެމުންދާ އެހީތެރިކަމާ ގުޅޭގޮތުން ޔޫކްރެއިންގެ އިންޓެލިޖެންސް އިދާރާތަކަށް ލިބިފައިވާ މައުލޫމާތުތައް، އެކުވެރި ގައުމުތަކާ ހިއްސާކުރުމަށް އަމުރުކުރައްވާނެ ކަމަށެވެ.

ރަޝިޔާގެ ރައީސް ވްލަޑިމިއަރ ޕޫޓިން މިދިޔަ މަހު ވިދާޅުވީ، އީރާނުން އަސްކަރީ އެހީތެރިކަމަކަށް އެދިފައި ނުވާ ކަމަށާއި، މޮސްކޯއިން އެ ގައުމަށް ހަތިޔާރު ފޯރުކޮށްދެމުން ނުދާ ކަމަށެވެ. އަދި އެމެރިކާގެ ރައީސް ޑޮނަލްޑް ޓްރަމްޕް ވެސް ދާދިފަހުން ވިދާޅުވެފައިވަނީ، ރަޝިޔާ ނުވަތަ ޗައިނާއިން ވެސް އީރާނަށް އަސްކަރީ އެހީތެރިކަން ފޯރުކޮށްދޭ ކަމަށް ގަބޫލުނުކުރައްވާ ކަމަށެވެ.

މި އަހަރުގެ ކުރީކޮޅު އެމެރިކާ އާއި އިސްރާއީލުން އީރާނަށް ދިން ހަމަލާއާ ގުޅިގެން މެދުއިރުމަތީގައި އުފެދުނު ހަމަނުޖެހުންތަކުގެ ތެރެއަށް ވަނުމަށް ކީވްއިން ދަނީ ވަރަށް ބޮޑަށް މަސައްކަތް ކުރަމުންނެވެ. ޔޫކްރެއިންގެ ލީޑަޝިޕުން ބުނާ ގޮތުގައި، އީރާނުގެ ޑްރޯންތަކާ ދެކޮޅަށް މަސައްކަތް ކުރާނެ ފަންނީ މާހިރުންނާއި ޓެކްނޮލޮޖީ ފޯރުކޮށްދިނުމަށް ގަލްފުގެ ގައުމުތަކާއެކު އެއްބަސްވުންތަކެއް ވަނީ ގާއިމުކޮށްފަ އެވެ. އަދި މީގެ ބަދަލުގައި އިތުރު ވައިގެ ދިފާއީ ނިޒާމުތަކާއި ހަތިޔާރު ހޯދުމަށް ޔޫކްރެއިން އުންމީދު ކުރެ އެވެ.

ޒެލެންސްކީ ވިދާޅުވި ގޮތުގައި، މި އެއްބަސްވުންތަކުގެ ދަށުން ޔޫކްރެއިންގެ 200 އަށްވުރެ ގިނަ އަސްކަރީ މާހިރުން މިހާރު ވަނީ މެދުއިރުމައްޗަށް ފޮނުވާފަ އެވެ. އެ ސަރަހައްދުގައި ހިނގި ފުރަތަމަ ކުރިމަތިލުންތަކުގެ ތެރޭގައި، ދުބާއީގައި ހުރި ގުދަނަކަށް އީރާނުން ދިން ހަމަލާއެއްގައި މި ގްރޫޕުގެ ބައެއް މީހުން މަރުވެ، ބައެއް އާލާތްތަކަށް ގެއްލުން ލިބިފައިވާ ކަމަށް ރިޕޯޓުތައް ބުނެ އެވެ. ނަމަވެސް، ކީވް އިން ވަނީ އެފަދަ ހާދިސާއެއް ހިނގާފައިވާ ކަމަށް އިންކާރުކޮށްފަ އެވެ.

ޔޫކްރެއިން ހަނގުރާމަ ފެށުނީއްސުރެ، ރަޝިޔާއިން ބޭނުންކުރާ އީރާނުން ފަރުމާކޮށްފައިވާ ޑްރޯންތަކާ ދެކޮޅަށް ކީވްއިން ދަނީ މަސައްކަތް ކުރަމުންނެވެ. މީގެ އިތުރުން، އީރާނުގެ ހަމަލާތައް އަމާޒުވާ މެދުއިރުމަތީގެ ގައުމުތަކަށް، ޑްރޯންތައް ހުއްޓުވުމުގެ ފަންނީ އެހީތެރިކަން ފޯރުކޮށްދިނުމަށް ވެސް ޔޫކްރެއިނުން ވަނީ ހުށަހަޅާފަ އެވެ.

އީރާނުގެ އުޅަނދަށް ދިން މި ހަމަލާއަކީ އުދުވާނީ އަމަލެއްގެ ގޮތުގައި ތެހެރާނުން ސިފަކޮށްފައިވާއިރު، ގައުމީ މަސްލަހަތާއި ސަލާމަތްތެރިކަން ދިފާއުކުރާނެ ކަމަށް އެ ގައުމުން ވަނީ ބުނެފައެވެ. އަދި ޔޫކްރެއިނުން މަސައްކަތް ކުރަނީ ހަނގުރާމަ ފުޅާކުރުމަށް ކަމަށް ބުނެ އީރާނުން ވަނީ ކީވް އަށް ތުހުމަތުތަކެއް ކޮށްފަ އެވެ.

އީރާނުގެ ދައުލަތުގެ ނިއުސް އެޖެންސީ "އިރްނާ" އިން ރިޕޯޓްކޮށްފައިވާ ގޮތުގައި، "ދުޝްމަނު އަދި ޖިނާއީ" ހަމަލާއެއްގެ ގޮތުގައި ސިފަކުރި މި އަމަލާ ގުޅިގެން އިހުތިޖާޖު ކުރުމަށް، ތެހެރާނުގައި ހުންނަވާ ޔޫކްރެއިންގެ ޝާޒޭ ޑަ ފެއާޒް އީރާނުގެ ފޮރިން މިނިސްޓްރީއަށް ވަނީ ހާޒިރުކޮށްފަ އެވެ.

އީރާނުން މި ހަމަލާ ކުށްވެރިކޮށްފައި މިވަނީ، މެދުއިރުމަތީގެ ސަރަހައްދުތަކަށް ހަމަލާދިނުމަށް މަގުފަހިކުރުމުގެ ގޮތުން ރަޝިޔާގެ ސެޓެލައިޓްތަކުން ހޯދާ މައުލޫމާތުތައް އީރާނަށް ފޯރުކޮށްދެމުންދާކަން ފާހަގަކުރެވިފައިވާ ކަމަށް ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވިދާޅުވެފައިވާ ދަނޑިވަޅެއްގަ އެވެ.

މީގެ ކުރިން ވެސް ރައީސް ޒެލެންސްކީ ވަނީ، ކެސްޕިއަން ކަނޑުގައި އޮތް ރަޝިޔާގެ މަނަވަރަކަށާއި، އީރާނާ ގުޅުންހުރި އަސްކަރީ ސާމާނު އުފުލާ އުޅަނދުތަކަށް ޔޫކްރެއިންގެ ސިފައިން ހަމަލާދީފައިވާ ކަމަށް ވިދާޅުވެފަ އެވެ.

އެކްސްގައި ކުރެއްވި ޕޯސްޓެއްގައި ޔޫކްރެއިންގެ ރައީސް ވިދާޅުވީ، ޖުލައި މަހުގެ ކުރީކޮޅުން ފެށިގެން ރަޝިޔާގެ ސެޓެލައިޓްތަކުން ގަލްފުގެ ގައުމުތަކާއި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތައް ވަރަށް ބޮޑަށް މޮނިޓަރު ކުރަމުންދާ ކަމަށެވެ. އަދި އެ ސެޓެލައިޓް ފޮޓޯތައް ފަހުން އީރާނުން ބޭނުންކުރާކަން ފާހަގަކުރެވިފައިވާ ކަމަށް ވެސް އޭނާ ވިދާޅުވި އެވެ.

"ރަޝިޔާގެ ސެޓެލައިޓްތަކުން މި ތަންތަނުގެ ފޮޓޯ ނެގުމާއި އީރާނުން ދޭ ހަމަލާތަކާ ސީދާ ގުޅުމެއް އެބައޮތް. އެއީ ހަމަލާ ދިނުމުގެ ކުރިން ތައްޔާރުވުމަށާއި، ހަމަލާއަށްފަހު ލިބުނު ގެއްލުންތައް ވަޒަންކުރުމަށް ބޭނުންކުރާ މައުލޫމާތު،" ރައީސް ޒެލެންސްކީ ވިދާޅުވި އެވެ.

އޭނާ އިތުރަށް ވިދާޅުވި ގޮތުގައި ހަމައެކަނި ޖުލައި 19 އާއި 20 ވަނަ ދުވަހު ވެސް، ރަޝިޔާގެ ސެޓެލައިޓްތަކުން ވަނީ ހަތަރު އެއާ ބޭސްއެއް މޮނިޓަރުކޮށްފަ އެވެ. އޭގެ ތެރޭގައި ބަހްރައިންގައި ހުރި ދެ މަރުކަޒަކާއި، އުރުދުން އަދި ކުވެއިތުގައި ހުރި އަސްކަރީ މަރުކަޒެއް ހިމެނެ އެވެ.