ޔޫކްރެއިނުން ރަޝިޔާގެ ވައިލްޑްބެރީސް ގުދަންތަކަށް ހަމަލާދީ ބޮޑެތި ގެއްލުންތަކެއް ދީފި

ހޯމަ ދުވަހުގެ ރޭ ޔޫކްރެއިނުން ދިން ހަމަލާތަކެއްގައި ރަޝިޔާގެ އެންމެ ބޮޑު އޮންލައިން ރީޓެއިލާ ކަމަށްވާ "ވައިލްޑްބެރީސް" ގެ ދެ ގުދަނަކަށް ހަމަލާދީފައިވާއިރު، މޮސްކޯ ކައިރީގައި ހުރި އެ ކުންފުންޏާ ގުޅުންހުރި އެހެން ސައިޓަކަށް ވެސް ބޮޑެތި ގެއްލުންތަކެއް ވެއްޖެ އެވެ.

"ރަޝިޔާގެ އެމެޒޯން" ގެ ނަމުން މަޝްހޫރުވެފައިވާ މި ކުންފުނީގެ މަރުކަޒުތަކަށް އަމާޒުކޮށް ޔޫކްރެއިނުން ހަމަލާދެމުން އަންނަތާ މިހާރު ހަފުތާތަކެއް ވެއްޖެ އެވެ.

ކްރެމްލިންގެ ދެކުނުން ގާތްގަނޑަކަށް 69 ކިލޯމީޓަރު (43 މޭލު) ދުރުގައި ހުރި ސިނާއީ ސަރަހައްދަކަށް ދިން ހަމަލާތަކުގައި މަދުވެގެން ފަސް މީހުން މަރުވެ، އިތުރު 10 މީހުން ޒަހަމްވެފައިވާ ކަމަށް އެ ސަރަހައްދުގެ އޮފިޝަލުން ވިދާޅުވި އެވެ. ނަމަވެސް އެއީ ވައިލްޑްބެރީސްއިން ހިންގާ ތަނެއްކަން އޮފިޝަލުން ރަސްމީކޮށް ކަށަވަރުކޮށްދީފައެއް ނުވެ އެވެ.

އެހެން ސަރަހައްދުތަކަށް ބަލާއިރު، ސެއިންޓް ޕީޓަސްބާގް އަދި ޓްވަރް ސަރަހައްދުގައި ހުރި ވައިލްޑްބެރީސްގެ ދެ މަރުކަޒަކަށް ހަމަލާ އަމާޒުވިކަން އޮފިޝަލުން ވަނީ ކަށަވަރުކޮށްދީފަ އެވެ.

ޔޫކްރެއިނުން ބުނާ ގޮތުގައި އެ ގުދަންތަކަކީ ރަޝިޔާގެ އަސްކަރިއްޔާއަށް ބޭނުންވާ ސާމާނު ފޯރުކޮށްދޭ ތަންތަނެވެ. ނަމަވެސް ރަޝިޔާއިން އެކަން ދޮގުކުރެ އެވެ.

ރަޝިޔާގެ ދިފާއީ ވުޒާރާއިން ހާމަކުރި ގޮތުގައި، ރޭގަނޑުގެ ވަގުތެއްގައި ޔޫކްރެއިނުން ފޮނުވާލި 320 ޑްރޯން އެ ގައުމުގެ އަސްކަރިއްޔާއިން ވަނީ ހުއްޓުވައި ބިމާހަމަކޮށްލާފަ އެވެ.

މީގެ އިތުރުން، ރަޝިޔާއިން ޔޫކްރޭނަށް ދިން ހަމަލާތަކުގައި މަދުވެގެން ހަތަރު މީހުން މަރުވެފައިވެ އެވެ. މޮސްކޯ ރީޖަންގެ ގަވަރުނަރު އެންޑްރޭ ވަރޮބްޔޯވް ވިދާޅުވީ، މޮސްކޯގެ ބޭރުގައި އޮންނަ ޗެކޯވްގެ ސިނާއީ ސަރަހައްދެއްގައި ހުރި ގުދަނަކަށް ހަމަލާ އަމާޒުވެ އަލިފާން ރޯވެފައިވާ ކަމަށެވެ. އަދި މި ހަމަލާގައި ކަރަންޓު ސަބްސްޓޭޝަނަކަށާއި އިދާރީ އިމާރާތަކަށް ވެސް ގެއްލުން ލިބިފައިވާ ކަމަށް އޭނާ ވިދާޅުވި އެވެ.

ޓެލެގްރާމް މެދުވެރިކޮށް ގަވަރުނަރު ވިދާޅުވީ، ޒަހަމްވި 10 މީހުންގެ ތެރެއިން ހަތް މީހެއްގެ ހާލު މެދު މިންވަރަކަށް ގޯސް ކަމަށާއި، އެކަކުގެ ހާލު ސީރިއަސް ކަމަށެވެ. ޔޫކްރެއިނުގެ މީޑިއާތަކުން ރިޕޯޓްކޮށްފައިވާ ގޮތުގައި އެ ގުދަނަކީ ވައިލްޑްބެރީސްއާ ގުޅުންހުރި ތަނެކެވެ. ރަޝިޔާގެ ސާޗް އިންޖީނެއް ކަމަށްވާ "ޔަންޑެކްސް" ގައި ވެސް އެ ތަނަކީ އެ ކުންފުންޏާ ގުޅުންހުރި ތަނެއްގެ ގޮތުގައި ވަނީ ހިމަނާފަ އެވެ.

މިކަމާ ގުޅޭގޮތުން ވައިލްޑްބެރީސް ކުންފުނިން އާންމުކޮށް ވަކި އެއްޗެއް ބުނެފައި ނުވި ނަމަވެސް، ސެއިންޓް ޕީޓަސްބާގް ސަރަހައްދުގައި ހުރި އެ ކުންފުނީގެ މަރުކަޒަށް ހަމަލާ އަމާޒުވިކަން ވަނީ ކަށަވަރުކޮށްދީފަ އެވެ.

ރޮއިޓާސް ނިއުސް އެޖެންސީން ސައްހަކަން ކަށަވަރުކޮށްފައިވާ ސޯޝަލް މީޑިއާ ވީޑިއޯއަކުން ފެންނަ ގޮތުގައި، ވައިލްޑްބެރީސްގެ ގުދަނެއްގައި އަލިފާން ރޯވެ، އެ އިމާރާތުން ކަޅު ދުންތައް މައްޗަށް އަރަމުންދެ އެވެ.

ޓްވަރް ސަރަހައްދުގެ ގަވަރުނަރު ވިދާޅުވީ، ރޭގެ ވަގުތެއްގައި އެ ސަރަހައްދުގައި ހުރި ވައިލްޑްބެރީސްގެ މަރުކަޒަކަށް ވެސް ގެއްލުން ލިބިފައިވާ ކަމަށެވެ. ރަޝިޔާގެ ދައުލަތުގެ ނިއުސް އެޖެންސީ "ޓާސް" އިން ރިޕޯޓްކޮށްފައިވާ ގޮތުގައި، އާދީއްތަ ދުވަހު ޔޫކްރޭނުގެ ޑްރޯން ހަމަލާތަކެއް އަމާޒުވި ސަމާރާ ސަރަހައްދުގެ ވައިލްޑްބެރީސް ގުދަނާއި އެތަނުގައި ހުރި ހުރިހާ މުދަލެއް އެއްކޮށް ސުންނާފަތިވެފައިވާކަން އަންގާރަ ދުވަހު އެ ސަރަހައްދުގެ އޮފިޝަލުން ވަނީ ކަށަވަރުކޮށްދީފަ އެވެ.

މީގެ އިތުރުން، ޔޫކްރެއިނުގެ ސްޓޭޓް އިމަޖެންސީ ސާވިސްއިން ބުނި ގޮތުގައި، ރަޝިޔާއިން ދެކުނުގެ ބަނދަރު ރަށެއް ކަމަށްވާ މިކޮލައިވްއަށް ރޭ ދިން ހަމަލާއެއްގައި 89 އަހަރުގެ އަންހެނަކު މަރުވެފައިވެ އެވެ. އަދި ޒަހަމްވި ހަތް މީހުންގެ ތެރޭގައި ދެ އަހަރާއި 12 އަހަރުގެ ދެ އަންހެން ކުދިން ހިމެނެ އެވެ.

ސޫމީގެ މީހުން ދިރިއުޅޭ ސަރަހައްދަކަށް ދިން ހަމަލާއެއްގައި އަންހެނަކާއި ފަސް އަހަރާއި 10 އަހަރުގެ ދެ އަންހެން ކުދިން މަރުވެފައިވާއިރު، އިތުރު ހަތަރު މީހަކު ޒަހަމްވެފައިވާ ކަމަށް ވެސް އެ އިދާރާއިން ބުންޏެވެ.

ސްޓޭޓް އިމަޖެންސީ ސާވިސްއިން މައުލޫމާތު ދޭ ގޮތުގައި، ރަޝިޔާގެ ހަމަލާތަކުގައި ބިލްހޮރޮޑް-ޑްނިސްޓްރޯވްސްކީ ސިޓީން ދެ މީހަކު ޒަހަމްވެފައިވާއިރު، ޑްނީޕްރޯގައި ހުރި ކާބޯތަކެތި ރައްކާކުރާ ގުދަނެއްގައި ވަނީ އަލިފާން ރޯކޮށްލާފަ އެވެ.

މި ހަމަލާތައް ދީފައި މިވަނީ، ރަޝިޔާގެ ދެކުނުގެ ކާރޫބާރޫ ބޮޑު ބީޗަކަށް ޑްރޯން ހަމަލާއެއް އަމާޒުވެ، ހަތް މީހުން މަރުވެ 58 މީހުން ޒަހަމްވިތާ އެއްދުވަސް ފަހުންނެވެ.

ސޯޝަލް މީޑިއާ ވީޑިއޯތަކުން ފެންނަ ގޮތުގައި، ކްރަސްނޯޑާ ސަރަހައްދުގެ ބީޗަކަށް ޑްރޯންއެއް ވެއްޓި ގޮވާފައިވަނީ، ގިނަ އަދަދެއްގެ ފަތުރުވެރިން އަތިރިމަތީގައާއި މޫދުގައި ތިއްބަ އެވެ.

ޔޫކްރެއިނުގެ ބައެއް ޓެލެގްރާމް ޗެނަލްތަކުން ބުނާ ގޮތުގައި، އެ ޑްރޯން ބީޗަށް ވެއްޓުނީ އިލެކްޓްރޯނިކް ވޯފެއާ ސިގްނަލްތަކެއް ބޭނުންކޮށްގެން އޭގެ ކޮންޓްރޯލް ގެއްލުވާލުމުންނެވެ. ނަމަވެސް ރަޝިޔާގެ މީޑިއާތަކަށް މައުލޫމާތު ދިން މަންޒަރު ދުށް މީހުން ބުނީ، ގޮވުމުގެ ކުރިން ބަޑިޖަހާ އަޑު އިވުނު ކަމަށާއި، އެއީ އެއާ ޑިފެންސް ސިސްޓަމުން ޑްރޯން ވައްޓާލަން މަސައްކަތް ކުރުމުން އިވުނު އަޑުތަކެއް ކަމަށް ބެލެވޭ ކަމަށެވެ.

އެ ސަރަހައްދުގެ ގަވަރުނަރު ވަނީ ޔޫކްރެއިނުން ގަސްތުގައި އާންމު ރައްޔިތުންނަށް ހަމަލާދީފައިވާ ކަމަށް ތުހުމަތުކޮށްފަ އެވެ. ނަމަވެސް ޔޫކްރެއިނުން މިކަމާ ގުޅޭގޮތުން އެއްވެސް ބަހެއް ބުނެފައެއް ނުވެ އެވެ.

ހަނގުރާމައިގެ ދެ ފަރާތުން ވެސް ބުނަމުންދަނީ އާންމު ރައްޔިތުންނަށް އަމާޒުކޮށް ގަސްތުގައި ހަމަލާ ނުދޭ ކަމަށެވެ.