2028 ގެ ރިޔާސީ ޓިކެޓު ނައިބު ރައީސް ވޭންސް އަށް ދެއްވުމަށް، ޓްރަމްޕް ގެންދަވަނީ ސިއްރިއްޔާތުގައި މަސައްކަތް ކުރަައްވަމުންކަން ފެންމަތިވެއްޖެ

އެމެރިކާގައި 2028 ވަނަ އަހަރު އޮންނަ ރިޔާސީ އިންތިޚާބުގައި، އެ ޤައުމުގެ މިހާރުގެ ނައިބު ރައީސް ޖޭޑީ ވޭންސް އަށް ތާއީދު ކުރެއްވުމަށް، މިހާރުގެ ރައީސް ޑޮނަލްޑް ޓްރަމްޕް ސިއްރުއްޔާތުގައި މަހުޖަނުންނަށް އަންގަވައިފި އެވެ.

މިއީ ޓްރަމްޕްގެ ފަހުން ވެރިކަން ކުރާ ރިޕަބްލިކަން ޕާޓީގެ ލީޑަރަކަށް ވޭންސް ގެންނަން ބޭނުންފުޅުވާ ކަމުގެ އެންމެ ވަރުގަދަ ނިޝާން ކަމަށް ބެލެވުނު ނަމަވެސް، ޓްރަމްޕް އަދިވެސް ގެންދަަވަނީ 2028 ވަނަ އަހަރުގެ ރިޔާސީ އިންތިޚާބުގައި އެހެން ބޭފުޅުންނަށް ވެސް ފުރުސަތު އޮތް ކަމަށް ދައްކަވަމުންނެވެ. 

މީގެ ދެ ހަފުތާއެއްހާ ދުވަސް ކުރިން ވައިޓް ހައުސްގެ އޯވަލް އޮފީހުގައި މަހުޖަނުންނާ އެކު ބޭއްވި ބައްދަލުވުމެއްގައި ޓްރަމްޕް ވިދާޅުވީ، އެންމެ ފަހު ނަތީޖާ އަކަށް ވާން ޖެހޭނީ ޖޭޑީ ވޭންސް އިންތިޚާބު ކުރުން ކަމަށެވެ. މި ވާހަކަތައް މީޑިއާ އަށް ތިލަވެފައި ވަނީ އެ ބައްދަލުވުމުގެ މައުލޫމާތު އެނގޭ، ނަން ހާމަ ކުރަން ބޭނުން ނުވާ ދެ ފަރާތަކުންނެވެ. ނަމަވެސް ޓްރަމްޕްގެ ބައެއް އެޑްވައިޒަރުން ވިދާޅުވާ ގޮތުގައި، ޓްރަމްޕް އަދިވެސް ހުންނެވީ ވަކި ބޭފުޅަކަށް ތާއީދު ކުރަން ނިންމަވައިގެނެއް ނޫނެވެ. 

ފާއިތުވި އަހަރެއްހާ ދުވަހު ޓްރަމްޕް ފާޅުގައި ގެންދަވަނީ، ވޭންސް އާއި ސެކްރެޓަރީ އޮފް ސްޓޭޓް މާކޯ ރޫބިއޯއާ ދެމެދު ވާދަވެރި ކަމެއް އުފައްދަވަމުންނެވެ. މިދިޔަ މަހުގެ ފަހު ކޮޅު މެރިން ވަން ހެލިކޮޕްޓަރުގައި ކުރެއްވި ދަތުރުފުޅެއްގައި ވެސް، ޓްރަމްޕް ވަނީ މި ދެ ބޭފުޅުންގެ ތެރެއިން މޮޅީ ކޮން ބޭފުޅެއްތޯ އޭނާގެ މުވައްޒަފުންނާ ސުވާލު ކުރައްވާފައި އެވެ.

ޓްރަމްޕްގެ އަރިސް ބައެއް ބޭފުޅުން ޤަބޫލުކުރާ ގޮތުގައި، ޓްރަމްޕް ވަނީ ސިއްރުން ވޭންސް އަކީ އޭނާގެ ވަލީ އަހުދު ކަމަށް ނިންމަވާފައި އެވެ. އެހެން ނަމަވެސް، އެކަން އާންމުކޮށް އިއުލާން ކުރެއްވުން ލަސް ކުރައްވަނީ، މާ އަވަހަށް އެކަން ކުރައްވައިފި ނަމަ ޓްރަމްޕްގެ ބާރު ކުޑަ ވެދާނެތީ އެވެ.

މި ވާދަވެރި ކަމުގެ ތެރޭގައި ނައިބު ރައީސް ވޭންސް މިހާތަނަށް ވަކި ނިންމެވުމެއް ނިންމަވާފައި ނުވެ އެވެ. ވޭންސްގެ ގާތް މީހުން ބުނާ ގޮތުގައި، އޭނާ ގޮތެއް ނިންމަވާނީ ފަހުންނެވެ. ވޭންސް ވިދާޅުވެފައި ވަނީ އޭނާ މިވަގުތު ހުންނެވީ މިހާރުގެ މަގާމުގެ މަސްއޫލިއްޔަތަށް ހުސްވެގެން ކަމަށާއި، ރޫބިއޯ އަކީ އޭނާގެ ގާތް އެކުވެރިއެއް ކަމަށެވެ. އަނެއް ކޮޅުން ރޫބިއޯ ވަނީ، 2028 ގެ ވާހަކަތަކާ ދުރުވުމަށް މީޑިއާތަކާ ބައްދަލު ކުރުން ވެސް މަދު ކުރައްވާފައި އެވެ. ރޫބިއޯގެ ޓީމުން ބުނާ ގޮތުގައި އޭނާ ގަސްދު ކުރައްވަނީ މިހާރުގެ ދައުރު ފުރިހަމަ ކުރެއްވުމަށެވެ.

ޓްރަމްޕްގެ ތާއީދު ހޯދުމަށް މި ދެ ބޭފުޅުންގެ މެދުގައި އޮތް ވާދަވެރިކަން މިހާރު ވަނީ ޕާޓީގެ ތެރޭގައި ވެސް ބޮޑު ވެފައި އެވެ. މާކޯ ރޫބިއޯ އަށް ރިޕަބްލިކަން ޕާޓީގެ މަހުޖަނުންގެ ތާއީދު އޮތްއިރު، ވޭންސް އަށް އޮތީ ޓްރަމްޕް އަލުން ވެރިކަމަށް ގެނައި ޒުވާން "މާގާ" ކޯލިޝަނުގެ ތާއީދެވެ. ވޭންސް ވަނީ އީރާން އާއެކު ސުލްހައިގެ އެއްބަސްވުމެއް އެކުލަވާލުމަށް ކުރި މަސައްކަތުން ޓްރަމްޕްގެ ތާއީދު ހޯއްދަވާފައި ކަަމަށް ގިނަ ބަޔަކު ދެކެ އެވެ. ނަމަވެސް ރޫބިއޯ ހުންނެވި މަޤާމުގެ ގޮތުން، އޭނާ އަށް ސިޔާސީ ކެމްޕެއިންތަކުގައި އުޅުއްވުމަށް ޤާނޫނީ ހުރަސްތަކެއް އެބަހުއްޓެވެ.

ކަން މިހެން އޮތް ނަމަވެސް، ޓްރަމްޕް އަދިވެސް ގެންދަވަނީ 2028 ވަނަ އަހަރު ތިން ވަނަ ދައުރަކަށް އޭނާ ކުރިމަތިލައްވަފާނެ ކަމުގެ އިޝާރާތްތައް ސޯޝަލް މީޑިއާގައި ކުރައްވަމުންނެވެ. މިއީ ސީރިއަސް ވާހަކަތަކެއް ނޫން ކަމަށް އަރިސް ބޭފުޅުން ވިދާޅުވި ނަމަވެސް، ޓްރަމްޕް ބޭނުންފުޅުވަނީ ސިޔާސީ މަސްރަހުގެ ސަމާލުކަން އަބަދުވެސް އެމަނިކުފާނަށް އޮތުމަށެވެ.