އީރާނުގެ އިންޖީނު ގެތަކާއި، ފާލަންތަކަށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި

އީރާން އިން އެމެރިކާާ އާއެކު އެއްބަސްވުމަކަށް ނަައިސްފި ނަމަ، އަންނަ ހަފުތާގައި އެ ގައުމުގެ އިންޖީނު ގެތަކާއި، ފާލަންތަކަށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ. 

އަންގާރަ ދުވަހު ޓްރަމްޕް މި އިންޒާރު ދެއްވާފައި ވަނީ ފޮކްސް ނިއުސް އަށް ދެއްވި ބަސްދީގަތުމެއްގައި އެވެ. 

މި ބަސްދީގަތުމުގައި ޓްރަމްޕް ވިދާޅުވީ، އީރާން އިން މަޝްވަރާގެ މޭޒަށް އައިސް އެއްބަސްވުމަކަށް ނުދާ ނަމަ، އަންނަ ހަފުތާ އަކީ އެ ގައުމަށް ވަރަށް ނުރައްކާތެރި ހަފުތާ އަކަށް ވާނެ ކަމަށެވެ. އެގޮތުން އީރާންގެ ހުރިހާ އިންޖީނު ގެތަކާއި ފާލަން ތަކެއް އެމެރިކާގެ އަސްކަރިއްޔާ އިން ހަލާކު ކޮށްލާނެ ކަމަށް ޓްރަމްޕް ވިދާޅުވި އެވެ. ޓްރަމްޕް އިތުރަށް ވިދާޅުވީ، އެމެރިކާގެ ހަމަލާތައް ހުއްޓާލާނީ އޭނާ އަށް އެވަރުން ފުދިއްޖެ ކަމަށް ގަބޫލު ކުރެވޭ ހިސާބުން ކަމަށެވެ.

ޓްރަމްޕްގެ މި އިންޒާރުތައް އައިސްފައި ވަނީ އެމެރިކާގެ ސިފައިން މެދު ނުކެނޑި ހަތަރު ދުވަސް ވަންދެން އީރާން އަށް ހަމަލާ ދެމުންދާ ދަނޑިވަޅެއްގައި އެވެ. މީގެ އިތުރުން އެމެރިކާ އިން ވަނީ އީރާންގެ ބަނދަރުތައް ބަންދުކޮށް، ކަނޑުގެ މަގުން އެ ގައުމު ހިސާރު ކޮށްފައި އެވެ.

ދެ ގައުމުގެ ދެމެދުގައި މިދިޔަ ޖޫން މަހުގެ 17 ވަނަ ދުވަހު ގާއިމުކުރި ނާޒުކު ހަނގުރާމަ ހުއްޓާލުމުގެ އެއްބަސްވުން މިހާރު ވަނީ އަމަލީ ގޮތުން އުވިފައި އެވެ. މިހާރު ދެ ގައުމުގެ ދެ މެދުގައި އެންމެ ބޮޑު ކުރިމަތިލުމެއް ހިނގަމުންދަނީ ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހުރްމުޒް ކަނޑު އޮޅީގެ ކޮންޓްރޯލް ހޯދުމަށެވެ. 

މި މަޝްރަހާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވީ، އީރާން އިން މަޝްވަރާ ކުރަން ބޭނުން ނުވާ ނަމަ އެމެރިކާ އިން ދެމުންދާ ހަމަލާތައް އިތުރަށް ވަރުގަދަކޮށް ފުޅާ ކުރާނެ ކަމަށެވެ. އަދި އަންނަ ހަފުތާގައި ދޭން ނިންމާފައިވާ ހަމަލާ ތަކަކީ އީރާންގެ އިގްތިސާދާއި، އާންމު ދިރިއުޅުމަށް ބޮޑެތި ލޮޅުން ތަކެއް އަރާނެ ހަމަލާ ތަކެއް ކަމަށް ޓްރަމްޕްގެ ވާހަކަފުޅުން ވަނީ ހާމަވެފައި އެވެ.