ނަތަންޔާހޫ އާއެކު ބޭއްވި ބައްދަލުވުން ވަރަށް ކާމިޔާބު: ޓްރަމްޕް
29 ޖުލައި 2026 | ބުދަ 06:35ބައްދަލުވުމާ ގުޅޭ ގޮތުން ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އިސްރާއީލްގެ ބޮޑު ވަޒީރު ބިބީ ނަތަންޔާހޫ އާއި އެމެރިކާގެ ކޮންގްރެސްގެ މަންދޫބުންނާ އެކު ބޭއްވުނީ ވަރަށް ފައިދާހުރި ބައްދަލުވުމެއް ކަަމަށް. އަދި މި ބައްދަލުވުމުގެ ތެރެއިން ނަގާފައިވާ ބައެއް ފޮޓޯތައް ވެސް ޓްރަމްޕް ވަނީ އާންމު ކުރައްވާފައި
އެމެރިކާގެ ރައީސް ޓްރަމްޕް އާއި، އިސްރާއީލްގެ ބޮޑު ވަޒީރު ނަތަންޔާހޫ ބޭއްވެވި ބައްދަލުވުމުގެ ތެރެއިން | ޓްރުތް ސޯޝަލް
އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާއެކު ބޭއްވެވި ބައްދަލުވުން ވަރަށް ކާމިޔާބު ކަމަށާއި، އެއީ ވަރަށް ރަނގަޅު ބައްދަލުވުމެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕް އާއި ނަތަންޔާހޫ ވަނީ އަންގާރަ ދުވަހު އެމެރިކާގެ ރިޔާސީ ގަނޑުވަރު ވައިޓް ހައުސްގައި ބައްދަލު ކުރައްވައިފަ އެވެ. އެ ބައްދަލުވުމުގައި ދެ ބޭފުޅުން ވެސް ވަނީ ދެ ޤައުމުގެ ދެ މެދުގައި އޮންނަ ގުޅުމާއި، ދެ ޤައުމުގެ ދެ މެދުގައި ހުރި މުހިންމު ކަންތައްތަކާ ގުޅޭ ގޮތުން މަޝްވަރާ ކުރައްވައިފަ އެވެ.
ބައްދަލުވުމާ ގުޅޭ ގޮތުން ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އިސްރާއީލްގެ ބޮޑު ވަޒީރު ބިބީ ނަތަންޔާހޫ އާއި، އެމެރިކާގެ ކޮންގްރެސްގެ މަންދޫބުންނާ އެކު ބޭއްވުނީ ވަރަށް ފައިދާހުރި ބައްދަލުވުމެއް ކަަމަށެވެ. އަދި މި ބައްދަލުވުމުގެ ތެރެއިން ނަގާފައިވާ ބައެއް ފޮޓޯތައް ވެސް ޓްރަމްޕް ވަނީ އާންމު ކުރައްވައިފަ އެވެ.
ނަތަންޔާާހޫ އާއެކު ބޭއްވި ބައްދަލުވުމަށް ފަހު ޓްރަމްޕް ކުރައްވާފައިވާ ޕޯސްޓު | ސޯޝަލް މީޑިއާ
ޓްރަމްޕް ވިދާޅުވީ މި ބައްދަލުވުމުގައި ދެ ޤައުމުގެ މަސްލަހަތު ހިމެނޭ ގިނަ މުހިންމު މައުލޫމާތުތަކުގެ މައްޗަށް ވާާހަކަ ދެކެވުނު ކަަމަށެވެ. ނަމަވެސް، މަޝްވަރާ ކުރެވުނު ކަންތައްތަކުގެ އެއްވެސް ތަފްސީލެއް ޓްރަމްޕް ހާމަކުރައްވާފައެއް ނުވެ އެވެ. މި ބައްދަލުވުމުގައި ޓްރަމްޕް އާއި ނަތަންޔާހޫގެ އިތުރުން، އެމެރިކާގެ ޤާނޫނު ހަދާ މަޖިލީހުގެ ބައެއް މެންބަރުން ވެސް ވަނީ ބައިވެރިވެ ވަޑައިގެންފައި އެވެ.
ނަތަންޔާހޫ އެމެރިކާ އަށް ކުރައްވަމުން ގެންދަވާ ދަތުރުފުޅަކީ ދެ ޤައުމުގެ ގުޅުން އިތުރަށް ބަދަހި ކުރުމާއި، މެދުއިރުމަތީގެ މަސްރަހާ ގުޅޭ ގޮތުން މަޝްވަރާ ކުރެއްވުމަށް ކުރައްވާ ދަތުރުފުޅެކެވެ. ޓްރަމްޕްގެ ވެރިކަމުގައި އިސްރާއީލް އާއި އެމެރިކާއާ ދެމެދު އޮތް ގާތް ގުޅުން މި ބައްދަލުުވުމުން އެކަނި ވެސް ހާމަވެގެން ގޮސްފައިވާ ކަމަށް ސިޔާސީ ދާއިރާާގެ ތަޖުރިބާކާރުން ބުނެ އެވެ.
މިއީ ޓްރަމްޕްގެ ދެ ވަނަ ދައުރުގެ ތެރޭގައި ނަތަންޔާހޫ އެމެރިކާ އަށް ވަޑައިގެންނެވި ހަތް ވަނަ ފަހަރެވެ. ނަތަންޔާހޫ އަކީ 2025 ވަނަ އަހަރުގެ ޖަނަވަރީ މަހުގެ ފަހުން، އެންމެ ގިނައިން އެމެރިކާ އަށް ވަޑައިގެންނެވި ބޭފުޅާ އެވެ. ޓްރަމްޕް އާއި ނަތަންޔާހޫ އަކީ އަބަދު ވެސް ވަރަށް ގާތް ގުޅުމެއް ބާއްވަމުން އަންނަ ދެ ބޭފުޅުންނެވެ.
މަސްދަރު: އަލް ޖަޒީރާ
