އިންފަންޓީނޯއާ ދެކޮޅަށް ހުށަހެޅި މައްސަލަ އައިއޯސީ އިން ބޭރުކޮށްލައިފި

އެމެރިކާގެ ރައީސް ޑޮނަލްޑް ޓްރަމްޕްއާ ގާތް ގުޅުމެއް ބާއްވަވާ ފީފާގެ ރައީސް ޖިއާނީ އިންފަންޓީނޯއާ ދެކޮޅަށް އިންސާނީ ހައްގުތަކަށް މަސައްކަތް ކުރާ ޖަމާއަތެއް ކަމަށްވާ "ފެއަރ ސްކޮޔަރ" އިން ހުށަހެޅި ޝަކުވާ ބަލައިނުގަތުމަށް، އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ނިންމައިފި އެވެ.

އައިއޯސީގެ ތަރުޖަމާނަކު ހުކުރު ދުވަހު ވިދާޅުވީ، މި މައްސަލަ އަކީ އެ ކޮމިޓީގެ އެތިކްސް ކޮމިޝަނުގެ އިހުތިސާސުން ބޭރުގައިވާ ކަމެއް ކަމަށެވެ.

އައިއޯސީގެ ތަރުޖަމާނު ވިދާޅުވީ، ފެއަރ ސްކޮޔަރ އިން ހުށަހެޅި ޝަކުވާ އެތިކްސް ކޮމިޝަނުން ވަރަށް ފުންކޮށް ދިރާސާ ކޮށްފައިވާ ކަމަށެވެ. ނަމަވެސް، އިންފަންޓީނޯއާ ގުޅޭ ގޮތުން ހުށަހަޅާފައިވާ މި ޝަކުވާތަކަކީ ބައިނަލްއަގުވާމީ ކުޅިވަރު ފެޑެރޭޝަނެއްގެ ހިންގުމާއި، ސަރުކާރުތަކާ ބާއްވާ ގުޅުމުގެ އިތުރުން، ކުޅިވަރުގެ ގަވާއިދުތައް ތަންފީޒު ކުރުމާ ގުޅޭ ކަންތައްތަކެއް ކަމަށް ވާތީ، އެއީ އައިއޯސީގެ އަޚުލާގީ މިންގަނޑުތަކުގެ ދާއިރާ އަށް ފެތޭ ކަންކަން ނޫން ކަމަށް އޭނާ ވިދާޅުވި އެވެ. މި ނިންމުން މިހާރު ފެއަރ ސްކޮޔަރ ޖަމާއަތަށް އަންގާފައިވާ ކަމަށް ވެސް އައިއޯސީ އިން ބުނެ އެވެ.

ފެއަރ ސްކޮޔަރ އިން އިންފަންޓީނޯއާ ދެކޮޅަށް މިދިޔަ ޖުލައި މަހުގެ 14 ވަނަ ދުވަހު ޝަކުވާ ހުށަހެޅީ، އެމެރިކާގެ ރައީސް ޑޮނަލްޑް ޓްރަމްޕް އަށް ސިޔާސީ ގޮތުން ތާއީދުކުރައްވައި، ސިޔާސީ ކަންކަމުގައި ވަކި ފަރާތަކަށް ނުޖެހުމަށް އައިއޯސީ އިން ކަނޑަ އަޅާފައިވާ އުސޫލުތަކާ އިންފަންޓީނޯ ތަކުރާރުކޮށް ޚިލާފުވެ ވަޑައިގަންނަވާ ކަމަށް ބުނެ އެވެ. މީގެ އިތުރުން، މިދިޔަ އަހަރު އެ ޖަމާއަތުން ވަނީ ފީފާގެ އެތިކްސް ކޮމިޓީއަށް ވެސް މިފަދަ މައްސަލައެއް ހުށަހަޅާފައި އެވެ.

Raajje.mv

ޓްރަމްޕްގެ ނުފޫޒުގައި ޖެހިފައިވާ ކަމަށް ބުނެ، އިންފަންޓީނޯގެ މައްސަލަ އޯއައިސީ އަށް ހުށަހަޅަނީ

2020 ވަނަ އަހަރުން ފެށިގެން އައިއޯސީގެ މެންބަރެއްގެ ގޮތުގައި ހުންނެވި އިންފަންޓީނޯ އަށް ފާޑު ކިޔުންތައް އަމާޒުވެފައި ވަނީ، ޓްރަމްޕް އާއެކު އެކި މުނާސަބަތުތަކުން ފެނިވަޑައިގަންނަވާތީ އެވެ. އެގޮތުން، އެމެރިކާ، މެކްސިކޯ އަދި ކެނެޑާގައި މިއަހަރު ބޭއްވި ވޯލްޑް ކަޕްގެ ފައިނަލް މެޗުގެ ތަށި ދިނުމުގެ ރަސްމިއްޔާތަށް ޓްރަމްޕް އާއި އިންފަންޓީނޯ ދަނޑަށް އެރުއްވުމުން، ނިއު ޔޯކް ނިއު ޖާޒީ ސްޓޭޑިއަމްގައި ތިބި ސަޕޯޓަރުން ވަނީ ނުރުހުން ފާޅުކޮށް އަޑުގަދަ ކޮށްފައި އެވެ.

މީގެ އިތުރުން، މުބާރާތުގެ ކުރީ ކޮޅު އެމެރިކާގެ ފޯވާޑް ފޮލަރިން ބަލޮގަން އަށް ދެއްކި ރަތް ކާޑެއް މުރާޖައާ ކޮށްދިނުމަށް އެދި ޓްރަމްޕް އިންފަންޓީނޯ އަށް ގުޅުއްވި ކަމަށް ޓްރަމްޕް ވަނީ ވިދާޅުވެފައި އެވެ. ބޮސްނިއާއާ ދެކޮޅަށް ކުޅުނު މެޗުގައި ބަލޮގަން ސަސްޕެންޑް ކުރި ނަމަވެސް، ފަހުން އޭނާ އަށް ބެލްޖިއަމް މެޗުގައި ކުޅުމުގެ ފުރުސަތު ދީފައިވެ އެވެ.

ދުނިޔޭގައި ހަމަނުޖެހުންތައް ހިނގަމުން އަންނަ ސަރަހައްދުތަކުގައި ސުލްހަ ގާއިމު ކުރުމަށް ކުރެއްވި މަސައްކަތްތަކުގެ އަގުވަޒަން ކުރުމުގެ ގޮތުން ކަމަށް ބުނެ، ފީފާ އިން އަލަށް ތައާރަފުކުރި "ޕީސް ޕްރައިޒް" ނުވަތަ ސުލްހައިގެ އިނާމު މިދިޔަ ޑިސެމްބަރު މަހު ވަނީ ޓްރަމްޕް އަށް އަރުވާފައި އެވެ. އެކަމުގެ ސަބަބުން ވެސް އިންފަންޓީނޯ އަށް ގިނަ ބައެއްގެ ފާޑު ކިޔުން އަމާޒުވެގެން ދިޔަ އެވެ.