ހުރްމުޒް ކަނޑު އޮޅި މިހާރު ކޮންޓްރޯލް ކުރަނީ އެމެރިކާ އިން، އީރާން އަކީ މިހާާރު ބިރުގަންނަން ޖެހޭ ފަދަ ބާރެއް ނޫން: ޓްރަމްޕް

ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާ ކުރަމުން އަންނަ ހުރްމުޒް ކަނޑު އޮޅި މިހާރު ކޮންޓްރޯލް ކުރަމުން އަންނަނީ އެމެރިކާ އިން ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ އެމެރިކާގެ ރިޔާސީ ގަނޑުވަރު، ވައިޓް ހައުސްގައި ނޫސްވެރިންނާ ވާހަކަ ދައްކަވަމުންނެވެ. އެގޮތުން ޓްރަމްޕް ވިދާޅުވީ އެ ސަރަހައްދުގެ ފުރިހަމަ ބާރު މިހާރު އެމެރިކާގެ އަތް ދަށުގައި އޮތްއިރު، އީރާން އަކީ މިހާރި ކުރިއާ އަޅާ ބަލާއިރު ބިރުގަންނަން ޖެހޭ ފަދަ ބާރެއް ނޫން ކަމަށެވެ. 

ޓްރަމްޕް ވިދާޅުވި ގޮތުގައި އެމެރިކާގެ ސަރުކާރުން އެޅި ހަރުދަނާ ފިޔަވަޅު ތަކުގެ ސަބަބުން، އީރާންގެ އަސްކަރީ އަދި އިޤްތިޞާދީ ޤާބިލުކަން ވަނީ ވަރަށް ބޮޑަށް ދަށްކޮށްލެވިފައި އެވެ. އީރާާންގެ ޤާބިލުކަން ކުޑަ ކުރުމަށް އެމެރިކާ އިން ކުރި މަސައްކަތް ކާމިޔާބު ވެފައިވާ ކަމަށާއި، އޭގެ ނަތީޖާއެއްގެ ގޮތުން މެދު އިރުމަތީގައި އީރާން އިން ކުރިން ދައްކަމުން އައި ބިރުވެރިކަން މިހާރު ފަނޑުވެފައިވާ ކަމަށް ޓްރަމްޕް ވިދާޅުވި އެވެ.

މީގެ އިތުރުން ޓްރަމްޕް ވިދާޅުވީ، ހުރްމުޒް ކަނޑު އޮޅި އަކީ ބައިނަލްއަގުވާމީ ވިޔަފާރި އަށް ނުހަނު މުހިންމު ސަރަހައްދަކަށް ވާއިރު، އެ ތަނުގެ ސަލާމަތާއި ރައްކާތެރިކަން ކަށަވަރު ކުރުމުގައި އެމެރިކާ އިން ދެމި އޮންނާނެ ކަމަށެވެ. އީރާން އިން އެ ސަރަހައްދުގައި ހިންގާ ހަރަކާތްތައް ވަރަށް ގާތުން ބަލަމުންދާ ކަމަށާއި، އެމެރިކާގެ މަސްލަހަތު ހިމާޔަތް ކުރުމަށް ކުރަން ޖެހޭ ކޮންމެ ކަމެއް ކުރައްވާނެ ކަމުގެ ޔަގީންކަން ޓްރަމްޕް ވަނީ ދެއްވައިފަ އެވެ. 

އެމެރިކާ އާއި އީރާންއާ ދެމެދު އޮތް ގުޅުން ގޯސްވެފައިވާ މި ދަނޑިވަޅުގައި، ޓްރަމްޕް މިފަދަ މޭރުމަކުން ވާހަކަ ދައްކަވާފައި މިވަނީ އީރާން އަށް ދަތި ކުރުމުގެ އިތުރު ފިޔަވަޅު ތަކެއް އެޅުމަށް އެމެރިކާ އިން ތައްޔާރު ވަމުންދާ ކަމުގެ އަޑުތައް ފެތުރިފައިވާ ވަގުތެއްގައި އެވެ. އީރާންގެ ނިއުކްލިއާ މައްސަލަ އާއި މެދު އިރުމަތީގެ ހަމަޖެހުމާ ގުޅޭ ގޮތުން ދެ ގައުމުގެ ދެމެދުގައި އޮތް ނުތަނަވަސްކަން މިދިޔަ ދުވަސް ތަކުގައި ވަނީ އިތުރަށް ބޮޑުވެފައި އެވެ.

އީރާން އިން މީގެ ކުރިން ތަކުރާރުކޮށް ބުނަމުން އައިސްފައި ވަނީ ހުރްމުޒް ކަނޑު އޮޅީގެ ސަލާމަތީ ކަންކަން ބެލެހެއްޓުމުގެ ގާބިލުކަން އެ ގައުމަށް ލިބިގެންވާ ކަމަށެވެ. ނަމަވެސް، އެމެރިކާާ އިން ބުނަމުން އަންނަނީ އީރާން އަށް އެކަން ނުކުރެވޭނެ ކަމަށާއި، އެ ކަނޑު އޮޅިން ރައްކާތެރިކަމާ އެކު އުޅަނދު ތަކަށް ދަތުރު ކުރެވޭނެކަން އެމެރިކާާ އިން ޔަޤީން ކުރާނެ ކަމަށެވެ.