ނަތަންޔާާހޫ އެމެރިކާާ އަށް ވަޑައިގެންނެވި ދަތުރުފުޅާ ދިމާކޮށް، ޕްރިންސް ޚާލިދު ބިން ސަލްމާން އާއި ޓްރަމްޕް ބައްދަލުކުރައްވައިފި

ސައުދީ އަރަބިއްޔާގެ ޑިފެންސް މިނިސްޓަރު ޕްރިންސް ޚާލިދު ބިން ސަލްމާން އާއި، އެމެރިކާގެ ރައީސް ޑޮނަލްޑް ޓްރަމްޕް ބައްދަލު ކުރައްވައިފި އެވެ.

އެމެރިކާގެ ރިޔާސީ ގަނޑުވަރު ވައިޓް ހައުސްގައި މި ބައްދަލުވުން ބާއްވާފައި ވަނީ، އެމެރިކާ އާއި ސައުދީ ގުޅިގެން އިރާގުގެ އިރުމަތީ ސަރަހައްދުގައި ޙަރަކާތްތެރިވާ، އީރާންގެ މަދަދު ލިބޭ ހަނގުރާމަވެރި ޖަމާއަތްތަކަށް އަމާޒުކޮށް ހަމަލާ ދިންތާ މަދު ގަޑިއިރު ތަކެއްގެ ތެރޭގައި އެވެ. ޕްރިންސް ޚާލިދު ވަނީ އެމެރިކާގެ ނައިބު ރައީސް ޖޭޑީ ވޭންސްއާ ވެސް ބައްދަލު ކުރައްވައިފަ އެެވެ.

ޕްރިންސް ޚާލިދު އާއި އެމެރިކާގެ ނައިބު ރައީސް ވޭންސް ބޭއްވެވި ބައްދަލުވުމުގައި، ސައުދީގެ ހަކަތައާ ބެހޭ އިންފްރާސްޓްރަކްޗާ އަށް، ނުވަތަ އާންމުން ދިރިއުޅޭ ތަންތަނަށް ދޭ އެއްވެސް ހަމަލާ އަކަށް އެ ޤައުމުން ކެތް ނުކުރާނެ ކަމަށް ވިދާޅުވެފައިވާ ކަމަށް މަސްދަރު ތަކުން ބުނެ އެވެ. މިއީ އެމެރިކާގެ ނައިބު ރައީސް ވޭންސް އާއި، ޕްރިންސް ޚާލިދު ބައްދަލު ކުރެއްވި ފުރަތަމަ ފަހަރެވެ. މި ބައްދަލުވުމުގައި ވޭންސް ވަނީ، ސައުދީގެ ވަލީ އަހުދު މުޙައްމަދު ބިން ސަލްމާން އަށް ވެސް ވަރަށް ބޮޑަށް ތައުރީފު ކުރައްވައިފަ އެވެ. 

އަންގާރަ ދުވަހުގެ ރޭ ދިން ހަމަލާ ތަކުގައި ސައުދީ އިން ބައިވެރިވުމުގެ މައިގަނޑު މަޤުސަދަކީ، އިރާގުގެ ހަނގުރާާމަވެރިންގެ އިތުރުން، ޔަމާންގެ ހޫޡީން އަށް ވެސް ވަރުގަދަ މެސެޖެއް ދިނުން ކަމަށް، އެ ޤައުމުގެ މަސްދަރުތަކާ ހަވާލާދީ ރިޕޯޓު ކޮށްފައިވެ އެވެ. އެއީ ސައުދީގެ މަދަނީ އަދި ހަކަތައާ ބެހޭ ވަސީލަތް ތަކަށް ދޭ ހަމަލާރައް ބަލައި ނުގަންނާނެ ކަމުގެ އިންޒާރެއް ކަމަށް ވެސް ބުނެފައިވެ އެވެ. މި ހަމަލާ ތަކުގައި އީރާންގެ 20 މީހަކު މަރުވެފައިވާ ކަމަށް، އެމެރިކާގެ މަސްދަރު ތަކުން ވަނީ ބުނެފައި އެވެ. 

ސައުދީގެ މީޑިއާ ތަކުގައި ބުނެފައިވާ ގޮތުން، އެ ބައްދަލުވުމުގައި ޕްރިންސް ޚާލިދު ވަނީ ހަމަނުޖެހުންތައް ކުޑަކޮށް، ހަމަޖެހުން ޤާއިމު ކުރުމަށް ސައުދީ އިން އަބަދު ވެސް ގޮވާލަމުން އަންނަ ގޮވާލުން ތަކުރާރު ކުރައްވައިފަ އެވެ. ނަމަވެސް، ކޮންމެހެން ބޭނުންވެއްޖެ ޙާލަތެއްގައި ޤައުމުގެ ދިފާއުގައި ތެދުވުމުގެ ޤާބިލުކަމާއި، އަޒުމު ސައުދީގެ ކިބައިގައި ހުރި ކަމަށް ވެސް ޕްރިންސް ޚާލިދު ވިދާޅުވެފައިވާ ކަމަށް ބުނެފައިވެ އެވެ. 

މީގެ އިތުރުން ސައުދީގެ މަސްދަރު ތަކުން ބުނެފައި ވަނީ، ސައުދީ އިން ބޭނުން ވަނީ ސަރަހައްދީ ބޮޑު ހަނގުރާމަ އަކަށް ދިޔުމުގެ ބަދަލުގައި، އީރާންގެ މަދަދު ލިބޭ ގުރޫޕު ތަކުގެ ނުރައްކާތަކަށް އެކަށީގެންވާ ރައްދު ދިނުން ކަމަށް ވެސް، ޕްރިންސް ޚާލިދު ވަނީ ވިދާޅުވެފައި އެވެ. 

ޕްރިންސް ޚާލިދު އާއި، އެމެރިކާގެ ރައީސް ޓްރަމްޕްް އަދި ނައިބު ރައީސް ވޭންސްގެ ބައްދަލުވުން ބާއްވާފައި ވަނީ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެމެރިކާ އަށް ވަޑައިގެންނެވި ދަތުރުފުޅާ ދިމާކޮށެވެ. މަސްދަރު ތަކުން ބުނާ ގޮތުގައި ނަތަންޔާހޫ މަސައްކަތް ކުރައްވަނީ، ހަމަނުޖެހުންތައް އިތުރަށް ފުޅާ ކުރުމަށެވެ. ސައުދީގެ ޑިފެންސް މިނިސްޓްރީ އިން ބުނެފައި ވަނީ އެ ޤައުމުން ހަމަނުޖެހުން އިތުރު ކުރުމަށް ބޭނުން ނުވާ ކަަމށާއި، ނަމަވެސް ކުރިމަތިވާާ ޙަަމަލާ ތަކަށް ފުރިހަމަ އަށް ރައްދު ދޭނެ ކަމަށެވެ.