ޓްރަމްޕްގެ ދައުވަތަކަށް ގޯލްފް ކުޅެން ދިޔަ ކަމަށް ކޭން ބުނެފި

އެމެރިކާގެ ރައީސް ޑޮނަލްޑް ޓްރަމްޕްގެ ދައުވަތަކަށް، އޭނާާ އާއެކު ގޯލްފް ކުޅެން ދިޔަ ކަމަށް އިންގްލެންޑުގެ ކެޕްޓަން ހެރީ ކޭން ބުނެފި އެވެ.

ކޭން މިހެން ބުނެފައި ވަނީ ފީފާ ވޯލްޑް ކަޕްގެ ކުއާޓާ ފައިނަލްގައި އިންގްލެންޑް އިން ނޯވޭއާ ދެކޮޅަށް ކުޅުނު މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ކުއާޓާ ފައިނަލްގައި އިންގްލެންޑް އިން ވަނީ 2-1 އިން ނޯވޭ ބަލިކޮށްފައި އެވެ.

މިދިޔަ ހަފުތާގެ ތެރޭގައި ޓްރަމްޕް ވަނީ، ކޭން އާއެކު ގޯލްފް ކުޅުނުކަން ހާމަ ކުރައްވައިފަ އެވެ. ޓްރަމްޕް ވިދާޅުވެފައި ވަނީ ކޭން އަކީ މޮޅު ފުޓުބޯޅަ ކުޅުންތެރިޔެއްގެ އިތުރުން، އެހާ މޮޅަށް ގޯލްފް ކުޅެން ވެސް ކުޅަދާން ކުޅުންތެރިޔެއް ކަމަށެވެ. އަދި ކޭން އަކީ ވަރަށް ރަނގަޅު ޝަޚުސިއްޔަތެއް ކަމަށް ޓްރަމްޕް ވިދާޅުވެފައިވެ އެވެ. 

އެކަމާ ގުޅޭ ގޮތުން ވާހަކަ ދައްކަމުން ކޭން ބުނެފައި ވަނީ، މީގެ 18 މަސް ކުރިން އެމެރިކާގެ ފްލޮރިޑާގެ ޕާމް ބީޗުގައި އޭނާ ހުއްޓާ، ގޯލްފް ކުޅުމަށް ޓްރަމްޕްގެ ފަރާތުން ދައުވަތެއް ލިބުނު ކަމަށެވެ. ޤައުމެއްގެ ރައީސެއްގެ ފަރާތުން އެފަދަ ދައުވަތެއް ލިބުމުން، އެއީ ދެކޮޅު ހެދޭނެ ކަމެއް ނޫންކަން ފާހަގަކޮށް ކޭން ބުނީ، އެއީ ވަރަށް ތަފާތު ތަޖުރިބާއެއް ކަމަށެވެ. 

މީގެ އިތުރުން ކޭން ބުނީ އުމުރުން މިހާރު 80 އަހަރުވެފައިވާ ޓްރަމްޕް އަކީ، ގޯލްފް ކުޅުއްވުމަށް ވަރަށް ކުޅަދާނަ ބޭފުޅެއް ކަމަށެވެ. ކޭން ބުނީ އޭނާގެ އުމުރުން 80 އަހަރުވާއިރު ވެސް، ޓްރަމްޕް ފަދައިން މޮޅަށް ގޯލްފް ކުޅެވޭނެ ކަމަށް އުންމީދު ކުރާ ކަމަށެވެ. 

ޓްރަމްޕް އާއެކު ގޯލްފް ކުޅެން ދިޔަ ކަމަށް ކޭން ބުނެފައިވާއިރު، ޓްރަމްޕް އަކީ ޤަވާއިދުން ގޯލްފް ކުޅުއްވާ ބޭފުޅެކެވެ. ދެ ވަނަ ދައުރަކަށް ވެރި ކަމަށް ވަޑައިގެންނެވި ފަހުން ވެސް، ޓްރަމްޕް ގޯލްފް ކުޅުއްވަ އެވެ. އެގޮތުން ހަފުތާ ބަންދުގައި އަމިއްލަ ރިސޯޓު މާ އަ ލާގޯ އަށް ވަޑައިގެން، ގޯލްފް ކުޅުއްވުމުގައި ޓްރަމްޕް ވަގުތު ހޭދަ ކުރައްވަ އެވެ.

ވޯލްޑް ކަޕްގެ ގަދަ 16 ގައި އިންގްލެންޑް އިން މެކްސިކޯ ބަލި ކުރި މެޗުގައި ކޭން ލަނޑު ޖެހިއިރު، އެ މެޗަށް ފަހު ޓްރަމްޕް ވަނީ ކޭން އަށް ތައުރީފު ކުރައްވައި ޕޯސްޓެއް ވެސް ކުރައްވައިފަ އެވެ.