ހުޅުމާލެ ތިންވަނަ ފިޔަވަހިން ދޫކޮށްފައިވާ ގޯތިތަކަށް ކަރަންޓު ދިނުން ލަސްވަނީ އެޗްޑީސީން ހަދަމުންދާ ލޭންޑް ޔޫސް ޕްލޭން ނުނިމޭތީ: ސްޓެލްކޯ
7 އޯގަސްޓު 2026 | ހުކުރު 11:47ހުޅުމާލެ ތިންވަނަ ފިޔަވަހީގެ ލޭންޑް ޔޫސް ޕްލޭން ފައިނަލް ނުވާތީ އެ ސަރަހައްދުގެ ގޯތިތަކަށް ކަރަންޓު ދިނުމުގެ މަސައްކަތް ސްޓެލްކޯއަށް ވަނީ ނުފެށިފައި. މި ޕްލޭނަށް ގެނައި ބަދަލުތަކާ ގުޅިގެން ގޯތިތަކުގެ ލޮކޭޝަން ބަދަލުވުމުން އާންމުން ކަންބޮޑުވުން ފާޅުކުރަމުންދާއިރު، ސަރުކާރުން މީގެ ކުރިން ބުނެފައިވަނީ ލޭންޑް ޔޫސް ޕްލޭންގެ މަސައްކަތް ނިމިފައިވާ ކަމަށް
ސްޓެލްކޯއިން ބުނީ ތިންވަނަ ފިޔަވަހިން ދޫކުރި ގޯތިތަކަށް ކަރަންޓް ނުދެވެނީ ފޭސް ތިނެއްގެ ލޭންޑް ޔޫސް ޕްލޭންގެ މަސައްކަތްތައް ފައިނަލް ކުރުމުގެ މަރުހަލާގައިވާތީ ކަމަށް | ސޯޝަލް މީޑިއާ
ހުޅުމާލެ ތިންވަނަ ފިޔަވަހިން ދޫކޮށްފައިވާ ގޯތިތަކަށް ކަރަންޓް ދިނުން ލަސްވަނީ ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހަދަމުންދާ ލޭންޑް ޔޫސް ޕްލޭން ނުނިމޭތީ ކަމަށް ސްޓޭޓް އިލެކްޓްރޯނިކް ކޮމްޕެނީ (ސްޓެލްކޯ) އިން ބުނެފި އެެވެ.
ހުޅުމާލެ ފޭސް ތިނަކީ ކުރީގެ ރައީސް އިބްރާހިީމް މުހައްމަދު ސޯލިހުގެ ސަރުކާރުގައި ރައްޔިތުންނަށް ބޯހިޔާވެހިކަން ފޯރުކޮށްދޭން 23 ސެޕްޓެންބަރު 2023 ގައި އަމަލީ މަސައްކަތް ފެށި ތަނަކެވެ. ނަމަވެސް ސަރުކާރު ބަދަލުވެ އެ މަސައްކަތް ހުއްޓިފައި އޮތުމަށް ފަހު މިސަރުކާރުން އަލުން އެ މަސައްކަތް ފަށާފައިވަނީ އެ ސަރަހައްދުން ގޯތި ލިބުނު މީހުން މުޒާހަރާއަށް ވެސް ނުކުތުމުންނެވެ.
ހުޅުމާލެ ފޭސް ތިނެއް ހިއްކާ ނިންމާފައިވާކަން ރައީސް މުއިއްޒު އިއުލާން ކުރެއްވީ 24 ޖެނުއަރީ 2026 ގައި އެވެ. އަދި އެ އަހަރުގެ މާރޗް މަހުގެ ތެރޭގައި އިން ވަކިކޮށް ގޯތިތައް ދޫކުރުމުގެ މަސައްކަތް ފަށާފައިވެ އެވެ. ނަމަވެސް އަދިވެސް އެ ސަރަހައްދުން ދޫކޮށްފައިވާ ގޯތިތަކަށް ކަރަންޓް ދިނުމުގެ މަސައްކަތް ފަށާފައި ނުވާތީ، ފޭސް ތިނަކުން ގޯތި ލިބުނު މީހުން ވަނީ ކަންބޮޑުވުން ފާޅުކޮށްފައި އެވެ.
ދައުލަތުގެ މީޑިއާއަށް މައުލޫމާތު ދެމުން ސްޓެލްކޯއިން ބުނެފައިވަނީ ތިންވަނަ ފިޔަވަހިން ދޫކުރި ގޯތިތަކަށް އަދި ކަރަންޓު ނުދެވޭ ކަމަށާއި، ކަރަންޓް ނުދެވެނީ ފޭސް ތިނެއްގެ ލޭންޑް ޔޫސް ޕްލޭންގެ މަސައްކަތްތައް ފައިނަލް ކުރުމުގެ މަރުހަލާގައިވާތީ ކަމަށެވެ. އަދި އެ ސަރަހައްދުގެ ކަރަންޓު މަސައްކަތް ފަށާނީ ލޭންޑް ޔޫސް ޕްލޭން ނިމުމުން ކަމަށް ސްޓެލްކޯއިން ބުނެފައިވެ އެވެ.
ސްޓެލްކޯއިން މިހެން ބުނެފައިވާއިރު، 2024 ވަނަ އަހަރު ޖެނުއަރީ މަހުގެ ތެރޭގައި ހައުސިން މިނިސްޓްރީގެ ސްޓޭޓް މިނިސްޓަރު ދިލްޝާން އަބްދުالله ވަނީ ހުޅުމާލެ ފޭސް 3 އަދި ގުޅީފަޅުގެ ލޭންޑް ޔޫސް ޕްލޭންގެ މަސައްކަތް ނިމިފައިވާ ކަމަށާއި ވަރަށް އަވަހަށް އާންމުކުރާނެ ކަމަށް ވިދާޅުވެފައި އެވެ.
މީގެއިތުރުން، 19 ޑިސެންބަރު 2025 ގައި ހައުސިންގ މިނިސްޓްރީގެ އިއުލާނާ އެކު ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ "ހުޅުމާލެ ތިން ވަނަ ފިޔަވަހީގެ އައު ލޭންޑް ޔޫސް ޕްލޭން" ގެ ދަށުން ހުޅުމާލެ ތިން ވަނަ ފިޔަވަހީގެ ލޭންޑް ޔޫސް ޕްލޭންއަށް ބަދަލު ގެނެސް، ކުރިން ބިންވެރިޔާ ސްކީމުގެ ދަށުން ހުޅުމާލެ ތިން ވަނަ ފިޔަވަހިން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ބަދަލުވެފައިވާ ކަމަށް މިނިސްޓްރީން ބުނުމުން، ހުޅުމާލެ ފޭސް ތިނެއްގެ ޔޫނިއަނުން ކަންބޮޑުވުން ފާޅުކޮށްފައިވެ އެވެ.
