ސްޓެލްކޯއިން ވައްކަން ކުރާ ކަމަށް ކުރެވޭ ތުހުމަތުތަކަށް އިތުރު ބާރެއް!

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަކީ ރާއްޖޭގައި ކަރަންޓުގެ ޚިދުމަތް ދެމުންދާ އެންމެ ބޮޑު އެއް ކުންފުންޏެވެ. ނަމަވެސް  ފަހަކަށް އައިސް އެ ކުންފުންޏާއި، އެކުންފުނީގެ މާލީ ހިސާބުތަކާއި ކަރަންޓު ބިލުތަކާ ގުޅިގެން އާންމުންގެ މެދުގައި ބޮޑެތި ސުވާލުތަކެއް ވަނީ އުފެދިފަ އެވެ. އޮޑިޓަރ ޖެނެރަލްގެ އޮފީހުން އެންމެ ފަހުން ނެރުނު ރިޕޯޓާއެކު، ރައްޔިތުން ކުރަމުންދިޔަ ތުހުމަތުތަކަށް އިތުރު ބާރެއް ލިބިގެން ގޮސްފައިވާ ކަމަށް ގިނަ ބަޔަކު ގަބޫލުކުރެ އެވެ.

އޮޑިޓަރ ޖެނެރަލްގެ އޮފީހުން މިދިޔަ ޖޫން މަހުގެ 28 ވަނަ ދުވަހު ނެރުނު ސްޓެލްކޯގެ އަހަރީ އޮޑިޓް ރިޕޯޓުގައިވާ ގޮތުން، ފާއިތުވި އަހަރު އެ ކުންފުންޏަށް ސާފު ފައިދާގެ ގޮތުގައި 238.7 މިލިއަން ރުފިޔާ ވަނީ ލިބިފަ އެވެ. މިއީ އޭގެ ކުރީ އަހަރުތަކާ އަޅާބަލާއިރު ވަރަށް ބޮޑު ކުރިއެރުމެކެވެ. 2023 ވަނަ އަހަރު 172 މިލިއަން ރުފިޔާގެ ގެއްލުމެއްގައި އޮތް ކުންފުނި، އެންމެ އަހަރެއްގެ ތެރޭގައި އެ ގެއްލުމުން އަރައިގަނެ 181 މިލިއަން ރުފިޔާގެ ފައިދާއެއް ހޯދުމަކީ ގިނަ ބަޔަކު ސުވާލު އުފައްދާ ކަމެކެވެ. ނިމިދިޔަ އަހަރުގެ ހިސާބުތަކަށް ބަލާއިރު، ފައިދާގެ މިންވަރު ވަނީ 30 އިންސައްތަ އިތުރުވެފަ އެވެ.

ކަންމިހެން އޮތްނަމަވެސް ކަރަންޓު ބިލުތަކުގެ ބޮޑުވުމާއި ރައްޔިތުންގެ ޝަކުވާ އިންތިހާއަށް ބޮޑެވެ. 

ރައީސް މުއިއްޒުގެ ސަރުކާރު އައި ފަހުން ކަރަންޓު ބިލުތައް ގަބޫލުނުކުރެވޭ މިންވަރަށް ބޮޑުވަމުންދާ ކަމުގެ ޝަކުވާ އެއްދުވަހުން އަނެއް ދުވަހަށް ދަނީ އިތުރުވަމުންނެވެ. ސްޓެލްކޯއިން މިކަމަށް ދޭ ޖަވާބަކީ ހޫނު ގަދަވުމުގެ ސަބަބުން ކަރަންޓު ބޭނުންކުރާ މިންވަރު އިތުރުވުމެވެ. ނަމަވެސް، ބައެއް ގޭތަކުގައި މީހުން ދިރިނޫޅޭ މަސްމަހުވެސް ބިލުތައް އިންތިހާއަށް ބޮޑުވެގެން އަންނާތީ، މިއީ އޮޅުވާލުމެއް ނުވަތަ "ވައްކަމެއް" ކަމަށް ގިނަ ބަޔަކު ތުހުމަތު ކުރެ އެވެ. ރައްޔިތުންގެ މަންދޫބުން ކަމަށްވާ މަޖިލިސް މެންބަރުންވެސް ވަނީ ސްޓެލްކޯ ފަދަ ކުންފުންޏަކަށް މިހާ ބޮޑު ފައިދާއެއް ހަމައެކަނި ޚިދުމަތް ދީގެން ނުލިބޭނެ ކަމަށް ވިދާޅުވެފަ އެވެ.

މީގެ އިތުރުން ސްޓެލްކޯގެ މާލީ ހާލަތަށް ބަލާއިރު، ސަރުކާރުގެ އިދާރާތަކާއި ކުންފުނިތަކުން އެ ކުންފުންޏަށް ދައްކަންޖެހޭ ފައިސާގެ އަދަދު މިހާރު ވަނީ 949 މިލިއަން ރުފިޔާއަށް އަރާފަ އެވެ. މީގެ ތެރެއިން އެންމެ ބޮޑު އަދަދެއް ދައްކަން އޮތީ ފައިނޭންސް މިނިސްޓްރީންނެވެ. ހައިރާންވާންޖެހޭ ކަމަކީ، ދައުލަތުގެ އިދާރާތަކުން މިލިއަނުން ފައިސާ ނުދައްކާ ހުރިއިރުވެސް ޚިދުމަތް މެދުނުކެނޑި ލިބޭއިރު، އާންމު ރައްޔިތަކު ތިން މަސް ދުވަހު ބިލު ނުދައްކައިފިނަމަ ވަގުތުން ކަރަންޓު ކަނޑާލައި ޖޫރިމަނާ ކުރާ ކަމެވެ. މިއީ އިންސާފެއް ނެތް އަމަލެއްގެ ގޮތުގައި ރައްޔިތުން ސިފަކުރެ އެވެ.

ޖުމްލަކޮށް ބަލާއިރު، ސްޓެލްކޯއަށް ލިބުނު ބޮޑު ފައިދާއަކީ ރައްޔިތުންގެ އަތުން ނުހައްގުން ނަގާފައިވާ ފައިސާ ކަމަށް ކުރެވޭ ތުހުމަތުތައް ވަނީ ވަރުގަދަވެފަ އެވެ. ސަރުކާރުގެ ކުންފުނިތައް ބޭނުންކޮށްގެން ދައުލަތަށް ފައިސާ ހޯދުމުގެ ނަމުގައި ރައްޔިތުންގެ ޖީބަށް އަތްބޭނުމަކީ ބަލައިގަނެވޭނެ ކަމެއް ނޫން ކަމަށް އެ ރައްޔިތުން ބުނެ އެވެ. އަދި މިކަމުގައި ދެފުށް ފެންނަ ތަހުގީގެއް ހިންގައި، ރައްޔިތުންނަށް އިންސާފު ހޯދައިދިނުމަށް ވެސް ގިނަ ރައްޔިތުން ދަނީ ގޮވާލަމުންނެވެ.