ސްޓެލްކޯ އަށް ފާއިތުވި އަހަރު އެތައް މިލިއަނުން ސާފު ފައިދާ ލިބުނީ ރައްޔިތުންގެ އަތުން ވައްކަން ކޮށްގެން: މެންބަރު ޣަފޫރު

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ ފާއިތުވި އަހަރު އެތައް މިލިއަނުން ސާފު ފައިދާ ލިބުނީ ރައްޔިތުންގެ އަތުން ވައްކަން ކޮށްގެން ކަމަށް ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ (ގަޕޯ) ވިދާޅުވެއްޖެ އެވެ. 

ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު ޣަފޫރު ވިދާޅުވީ އާދަޔާ ހިލާފަށް ކަރަންޓު ބިލުތައް ބޮޑުވާތީ، އެކަމުގެ ޝަކުވާ ރައްޔިތުން ކުރަމުންދާތާ އެތައް ދުވަހެއް ވެފައިވާ ކަަމަށެވެ.

ސްޓެލްކޯ އަށް 300 މިލިއަންއާ ގާތްކުރާ އަދަދަކަށް ފާއިތުވި އަހަރު ސާފު ފައިދާ ލިބިފައިވާތީ އެކަމަށް އިޝާރާތް ކުރައްވައި މެންބަރު ޣަފޫރު ވިދާޅުވީ ސްޓެލްކޯ ވައްކަން ކުރާ ކަމަށާއި، މީގެ ކުރިން ދެއްކި ވާހަކަތައް މިއަދު ދިމާވެ، އެކަންކަން ފެންނަމުންދާ ކަމަށެވެ. އަދި ވިދާޅުވީ ރައްޔިތުންނަށް ޚިދުމަތެއް ދީގެން ކުންފުންޏަކަށް އެވަރުގެ ބޮޑު ފައިދާއެއް ނުވާނެ ކަމަށެވެ. ޚާއްސަކޮށް ސްޓެލްކޯ ފަދަ ކުންފުންޏަކަށް ބޮޑު ފައިދާއެއް ވެފައިވާތީ އެކަމާމެދު މެންބަރު ޣަފޫރު ސުވާލު އުފެއްދެވި އެވެ. 

ސްޓެލްކޯ، ގްރޭޓަރ މާލެއާއި 10 ވަރަކަށް ރަށް މި އޮންނަނީ ސްޓެލްކޯއިން ކަރަންޓު ދޭން. ގާތްގަނޑަކަށް 300 މިލިއަނެއްހާ ރުފިޔާގެ ފައިދާ މިދިޔަ އަހަރު ވީކަމަށް، އަޅުގަނޑު ބުނަން ދެއްތޯ އެބަ ކަރަންޓު ބިލުން ވައްކަން ކުރެއޭ އެބަ. ދެން ކޮން ގޮތަކުން 300 މިލިއަން ފައިދާ އެތަނަށް އެ ނެރުނީ. އެ އޮތީ. ދެކުނިމެނުންތޯ އާމިރުވެސް. ބަރާބަރު 300 މިލިއަނެއް ނޫން އިނީކީ. އެކަމަކު 250 މިލިއަންއަށްވުރެ މަތިކޮށް އަދަދުތައް ހުރީ. އަޅުގަނޑު ސީދާ އަދަދު ހަނދާނެއް ނެތް. ކިހިނެއްތޯ ރައްޔިތުންނަށް އަސާސީ ޚިދުމަތެއް ދީގެން އެވަރު ބޮޑު ފައިދާއެއް ދައުލަތަށް މި ނަގަނީ އިހުލާސްތެރިކަމާއެކު އެކަން ކޮށްގެން.

ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ (ގަޕޯ)

މީގެ އިތުރުން މެންބަރު ޣަފޫރު ވިދާޅުވީ ކަރަންޓުގެ ޚިދުމަތް އަގު ބޮޑު ނުކުރި ނަމަވެސް ދައްކަން ޖެހޭ އަދަދު މިހާރު ދެ ގުނަ ބޮޑުވެފައިވާ ކަމަށެވެ. 

އެގޮތުން ގޭބިސީއެއްގައި 1000 ރުފިޔާ ދައްކާނަމަ މިހާރު 2000 ރުފިޔާ ދައްކަން ޖެހޭ ކަމަށް އޭނާ ވިދާޅުވި އެވެ.

މި ސަރުކާރުން އަމަލު ކުރަނީ ރައްޔިތުން ނިކަމެތިވާނެ ގޮތަށް ކަމަށާއި، ދޮގާއި މަކަރާއި ހީލަތް ހަދައި، ރައްޔިތުންނަށް ގެއްލުވާނެ ގޮތަށް ސިޔާސަތުތައް ރާވައި އެގޮތަށް އަމަލުކުރާ ކަމަށް މެންބަރު ޣަފޫރު ވިދާޅުވި އެވެ.

ބިލަކުންނެއް އެ ބޮޑުވާ ކަމަކަށް ނުދައްކާ. ޔުނިޓް ނަގާ ރޭޓު ހަމަ އިންނަނީ އެއްވަރަކަށް. އަނެއްކޮޅުން ފިލްމު ނިމުނީމަ ބަލައިލާއިރު ފައިދާ އެބަ ދައްކާ 300 މިލިއަނެއްހާ ރުފިޔާ. ދެން އަޅުގަނޑުމެން ހަމަ އެ ވާހަކައެއް ދައްކަނީކީ ނޫނޭ އާމިރު. އެހެރިގޮސް އާޚިރުގައި ނިމޭއިރު އަޅުގަނޑުމެންނަށްވާ ވާހަކަ އާއި އެހިސާބު ދިމާވޭ. އެހެންވީމާ، މި ބޭފުޅުން ކޮށްފައި ނުކުރާނެ ކަމެއް ނެތެއް ނޫންތޯ ރައްޔިތުންނަށްޓަކައި.

ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ (ގަޕޯ)

އޮޑިޓަރ ޖެނެރަލްގެ އޮފީހުން މިދިޔަ ޖޫން މަހުގެ 28 ވަނަ ދުވަހު ނެރުނު ސްޓެލްކޯގެ އަހަރީ އޮޑިޓް ރިޕޯޓުގައިވާ ގޮތުން، އެކުންފުންޏަށް ފާއިތުވި އަހަރު ސާފު ފައިދާގެ ގޮތުގައި 238.7 މިލިއަން ރުފިޔާ ލިބިފައިވެ އެވެ. އަދި އޮޑިޓް ރިޕޯޓުގައި ބުނާގޮތުން ސްޓެލްކޯ އަށް މި ބޮޑު ފައިދާ ލިބުނު މައިގަނޑު ސަބަބަކީ ކުންފުނީގެ ދަރަނި ބޮޑުތަނުން ކުޑަކުރެވިފައިވުމެވެ.