ސްޓެލްކޯ އަށް ފާއިތުވި އަހަރު 239 މިލިއަން ރުފިޔާގެ ސާފު ފައިދާއެއް: އޮޑިޓް ރިޕޯޓް
2 ޖުލައި 2026 | ބުރާސްފަތި 15:28ސްޓެލްކޯގެ ދަރަނި ކުޑަކޮށް، ނިމިދިޔަ އަހަރު އެ ކުންފުންޏަށް ލިބުނު ފައިދާ 30 އިންސައްތަ އިތުރުވެފައިވާކަން އޮޑިޓް ރިޕޯޓުން ހާމަވެއްޖެ. ނަމަވެސް ސަރުކާރުގެ އެކި އިދާރާތަކުން ލިބެންޖެހޭ 949 މިލިއަނަށްވުރެ ގިނަ ރުފިޔާ ނުލިބި އޮތުމުގެ ސަބަބުން، ކުންފުނީގެ ކޭޝްފްލޯ މެނޭޖްކުރުމަށް ބޮޑެތި ގޮންޖެހުންތަކެއް ވަނީ ކުރިމަތިވެފަ. މިގޮތުން ފައިނޭންސް މިނިސްޓްރީ އާއި ޕީއެސްއެމް ފަދަ މުއައްސަސާތަކުން ދައްކަންޖެހޭ ފައިސާ އިތުރުވަމުންދިއުމަކީ ކުންފުނީގެ މާލީ ދެމެހެއްޓެނިވިކަމަށް އޮތް ހުރަހެއްކަން އޮޑިޓް ރިޕޯޓުގައި ފާހަގަކޮށްފައިވޭ.
ސްޓެލްކޯ | ސްޓެލްކޯ
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަށް ފާއިތުވި އަހަރު ސާފު ފައިދާގެ ގޮތުގައި 238.7 މިލިއަން ރުފިޔާ ލިބިފައިވާކަން އޮޑިޓަރ ޖެނެރަލްގެ އޮފީހުން ހާމަކޮށްފި އެވެ.
އޮޑިޓަރ ޖެނެރަލްގެ އޮފީހުން މިދިޔަ ޖޫން މަހުގެ 28 ވަނަ ދުވަހު ނެރުނު ސްޓެލްކޯގެ އަހަރީ އޮޑިޓް ރިޕޯޓުގައިވާ ގޮތުން، މިއީ އޭގެ ކުރީ އަހަރުތަކާ އަޅާބަލާއިރު ބޮޑު ކުރިއެރުމެކެވެ. އެގޮތުން 2023 ވަނަ އަހަރު އެ ކުންފުންޏަށް 172 މިލިއަން ރުފިޔާގެ ގެއްލުންވީ ނަމަވެސް، 2024 ވަނަ އަހަރު އެ ގެއްލުމުން އަރައިގަނެ 181 މިލިއަން ރުފިޔާގެ ފައިދާއެއް ވަނީ ހޯދާފަ އެވެ. އަދި ނިމިދިޔަ އަހަރުގެ ހިސާބުތަކަށް ބަލާއިރު، ފައިދާގެ މިންވަރު ވަނީ 30 އިންސައްތަ އިތުރުވެފަ އެވެ.
އޮޑިޓް ރިޕޯޓުގައި ބުނާގޮތުން ސްޓެލްކޯ އަށް މި ބޮޑު ފައިދާ ލިބުނު މައިގަނޑު ސަބަބަކީ ކުންފުނީގެ ދަރަނި ބޮޑުތަނުން ކުޑަކުރެވިފައިވުމެވެ. ނަމަވެސް، ކުންފުނީގެ އާމްދަނީއަށް ކުރިއެރުން ލިބުނު ނަމަވެސް، ސަރުކާރުގެ އިދާރާތަކުން ލިބެންޖެހޭ ފައިސާ ނުލިބި ގިނަ ދުވަސްވުމުގެ ސަބަބުން ކޭޝްފްލޯ މެނޭޖްކުރުމުގައި ބޮޑެތި ގޮންޖެހުންތަކަކާ ކުރިމަތިލާން ޖެހިފައިވާކަން ރިޕޯޓުގައި ފާހަގަކޮށްފައިވެ އެވެ.
ތަފާސްހިސާބުތަކުން ދައްކާގޮތުގައި ސަރުކާރުގެ އިދާރާތަކާއި ކުންފުނިތަކުން ސްޓެލްކޯއަށް ދައްކަންޖެހޭ ފައިސާގެ އަދަދު މިހާރު ވަނީ 949 މިލިއަން ރުފިޔާއަށް އަރާފަ އެވެ. މިއީ ކުރީ އަހަރާ އަޅާބަލާއިރު 20 އިންސައްތައިގެ އިތުރުވުމެކެވެ. ޖުމްލަ 19 ދައުލަތުގެ އިދާރާއަކުން ސްޓެލްކޯއަށް ފައިސާ ނުދައްކާ ހުރިއިރު، އެންމެ ބޮޑު އަދަދެއް ދައްކަން އޮތީ މިނިސްޓްރީ އޮފް ފައިނޭންސް އިންނެވެ. އެ މިނިސްޓްރީން އެކަނިވެސް 333 މިލިއަނަށް ވުރެ ގިނަ ރުފިޔާ ދައްކަންޖެހެ އެވެ.
ދެން އެންމެ ބޮޑު ދަރަންޏެއް އޮތީ ދައުލަތުގެ މީޑިއާ، ޕަބްލިކް ސާވިސް މީޑިއާ (ޕީއެސްއެމް) ގަ އެވެ. ޕީއެސްއެމް އިން 163 މިލިއަން ރުފިޔާ ސްޓެލްކޯ އަށް ދައްކަންޖެހޭއިރު، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން 33 މިލިއަން ރުފިޔާ އަދި މިނިސްޓްރީ އޮފް ހައުސިންއިން 43 މިލިއަން ރުފިޔާ ދައްކަންޖެހޭ ކަމަށް ރިޕޯޓުގައިވެ އެވެ. މީގެ އިތުރުން ސަރުކާރުގެ ފެން ކުންފުނި (އެމްޑަބްލިއުއެސްސީ) އިންވެސް 24 މިލިއަން ރުފިޔާ ސްޓެލްކޯއަށް ދައްކަންޖެހޭކަން އޮޑިޓުން ވަނީ ހާމަވެފަ އެވެ.
ކުންފުންޏަށް މާލީ ގޮތުން ބޮޑު ކުރިއެރުމެއް ލިބިފައިވީ ނަމަވެސް، ދައުލަތުގެ އިދާރާތަކުން ލިބެންޖެހޭ މި ފައިސާއަކީ ކުންފުނީގެ މާލީ ދެމެހެއްޓެނިވިކަމާއި ހަމަޖެހުމަށް އޮތް ވަރަށް ބޮޑު ހުރަހެއްގެ ގޮތުގައި މާލީ މާހިރުން ދަނީ ފާހަގަކުރަމުންނެވެ.
