ޑޮލަރެއްގެ އަގު 21.80 ރުފިޔާގައި، އާންމުންގެ ކަންބޮޑުވުން އިންތިހާއަށް
6 އޯގަސްޓު 2026 | ބުރާސްފަތި 05:26ކަޅު ބާޒާރުގައި ޑޮލަރުގެ އަގު އުފުލި ތަކެތީގެ އަގު ބޮޑުވަމުންދާތީ، ވިޔަފާރިވެރިންނާއި އާންމުންގެ ކަންބޮޑުވުން ވަނީ އިތުރުވެފައި. ޑޮލަރުގެ އަގު ކޮންޓްރޯލް ކުރުމަށް ސަރުކާރުން ވީ ވައުދުތައް ނުފުއްދޭތީ ފާޑުކިޔުން އަމާޒުވެފައިވާއިރު، ސަރުކާރުން މިކަމުގެ ޒިންމާ އަޅުވަނީ ކުރީގެ ސަރުކާރުގެ އިގްތިސާދީ ސިޔާސަތުތަކުގައި
ދިވެހިރާއްޖޭގެ ފައިސާ ފޮތިތަކެއް އެމެރިކާ ޑޮލަރުގެ ނޫޓުތަކެއްގެ މަތީގައި ބަހައްޓާފައި | އައިސްޓޮކް
ކަޅު ބާޒާރުގައި ޑޮލަރުގެ އަގު އުފުލި، ޑޮލަރެއްގެ އަގު 21.80 ރުފިޔާއަށްވުރެ މައްޗަށް އުފުލިއްޖެ އެވެ.
ޑޮލަރުގެ އަގު މިހާ ބޮޑަށް އުފުލި، ދިވެހި ރުފިޔާގެ އަގު ބަލިކަށިވެފައިވާ މި ދަނޑިވަޅުގައި، ތަކެތީގެ އަގުވަނީ އިންތިހާއަށް އުފުލިފަ އެވެ. ޑޮލަރުގެ އަގު އަތްނުފޯރާ ފަށަށް އުފުލުމުގެ ސަބަބުން ރާއްޖޭގެ ކުދި އަދި މެދުފަންތީގެ ވިޔަފާރިވެރިން ތިބީ ވަރަށް ބޮޑު މާޔޫސްކަމެއްގެ ތެރޭގަ އެވެ. ވިޔަފާރިވެރިން ބުނާ ގޮތުގައި، ޑޮލަރު ލިބުން ދަތިވެ، ކަޅު ބާޒާރުން ބޮޑު އަގުގައި ޑޮލަރު ގަންނަން ޖެހުމަކީ މުދަލުގެ އަގު ދެގުނައަށް ބޮޑުކުރަން މަޖުބޫރުވާ ސަބަބެކެވެ. މިކަމުގެ ސަބަބުން ގިނަ ވިޔަފާރިތަކެއް އިނދަޖެހެމުންދާ ކަމުގެ ޝަކުވާ އެ ފަރާތްތަކުން އަންނަނީ ކުރަމުންނެވެ.
ޑޮލަރުގެ ދަތިކަން ދިމާވެފައިވަނީ، މި ސަރުކާރުން ރިކޯޑު އަދަދަކަށް ދަރަނި ދައްކާފައިވާކަމަށް ބުނަމުންދާ ދަނޑިވަޅެއްގަ އެވެ. މި ސަރުކާރު ފާހަގަކުރެވިގެން ގޮސްފައިވަނީ ޑޮލަރު އިސްރާފުކުރާ އަދި ލޯނު ހޯދުމުގެ ގާބިލުކަން ވެސް ނެތް ސަރުކާރެއްގެ ގޮތުގަ އެވެ.
ޑޮލަރުގެ އަގު 15.42 ރުފިޔާގައި ހިފެހެއްޓުމަކީ ރައީސް މުއިއްޒުގެ ރިޔާސީ ވައުދެއް ނަމަވެސް ޑޮލަރުގެ އަގު ކޮންޓްރޯލުން ނެއްޓިގެން ދިއުމުން ރައީސް މުއިއްޒާއި މި ސަރުކާރުގެ އިކޮނޮމިކް މިނިސްޓަރު މުހައްމަދު ސައީދުގެ އިތުރުން ސަރުކާރުގެ އިސްވެރިންނާއި ޕީއެންސީގެ އެކްޓިވިސްޓުން ބުނަމުންގެންދަނީ މިކަން މިހެން ދިމާވުމަށް މެދުވެރިވީ ސަބަބަކީ ނިމިދިޔަ އެމްޑީޕީ ސަރުކާރުން ގެންގުޅުނު އިގްތިސާދީ ސިޔާސަތުތަކުގެ ސަބަބުން ކަމަށެވެ.
އިކޮނޮމިކް މިނިސްޓަރު ސައީދު މީގެ ކުރިން ވިދާޅުވެފައިވަނީ، ރައްޔިތުންގެ މަޖިލީހުގެ މެޖޯރިޓީ ވެރިކަން ކުރާ ޕާޓީ ޕީއެންސީއަށް ލިބިއްޖެ ނަމަ، ޑޮލަރުގެ އަގު ތިރިކުރާނެ ކަމަށެވެ. މަޖިލީހުގެ ސުޕަރ މެޖޯރިޓީ ސަރުކާރަށް ލިބުމުން ވެސް ޑޮލަރުގެ އަގު ދަށަށް ގޮސްފައިނުވާތީ ސަރުކާރުގެ އިގްތިސާދީ ސިޔާސަތުތަކަށް ވިޔަފާރިވެރިންނާއި އާންމުންގެ ފާޑުކިޔުންތައް ވަނީ އަމާޒުވެފަ އެވެ.
