ރައީސް މުއިއްޒު ދެއްކެވި ވާހަކަފުޅުތައް ދިފާއު ކުރަން މުޅި ސަރުކާރު ނުކުންނަން ޖެހުމަކީ އެމަނިކުފާނަށް ގޯސްތަކެއް ހެއްދެވިފައިވާ ކަމުގެ ހެއްކެއް: ޣާލިބު

މިއަހަރުގެ މިނިވަން ދުވަހުގެ މުނާސަބަތުގައި ރައީސް ޑރ.މުހައްމަދު މުއިއްޒު ދެއްކެވި ވާހަކަފުޅުތައް ދިފާއު ކުރަން މުޅި ސަރުކާރު ނުކުންނަން ޖެހުމަކީ އެމަނިކުފާނަށް ގޯސްތަކެއް ހެއްދެވިފައިވާ ކަމުގެ ހެއްކެއް ކަމަށް މާލެސިޓީ ކައުންސިލްގެ ހުޅުމާލެ ދެކުނު ދާއިރާގެ ކައުންސިލަރު އަހުމަދު ޣާލިބު ވިދާޅުވެއްޖެ އެވެ. 

ބުރާސްފަތި ދުވަހުގެ ރޭ ފަލަސުރުހީ ޕްރޮގްރާމްގައި ޣާލިބު ވަނީ މިނިވަން ދުވަހު ރައީސް މުއިއްޒު ދެއްކެވި ވާހަކަފުޅަށް ވަރަށް ބޮޑަށް ފާޑު ވިދާޅުވެފަ އެވެ. އަދި ވިދާޅުވީ ރައީސްގެ ވާހަކަފުޅުތަކުން ފެނުނީ އަހުލާގީ ދަށު ދަރަޖައެއް ކަމަށެވެ. 

މިނިވަން ދުވަހުގެ މުނާސަބަތުގައި ރައީސް ދެއްވި ތަގުރީރަށް އިޝާރާތް ކުރައްވައި ޣާލިބު ވިދާޅުވީ، އެއީ މިހާތަނަށް ރައީސަކު ދެއްވި އެންމެ ފެންވަރު ދަށް ތަގުރީރު ކަމަށެވެ. އަދި ރައީސް ދައްކަވާ ވާހަކަފުޅުތައް ދިފާއުކުރަން މުޅި ސަރުކާރުން ނުކުންނަން ޖެހުމަކީ ރައީސަށް ގޯސްތަކެއް ހެއްދެވިފައިވާ ކަމުގެ ހެއްކެއް ކަމަށް ޣާލިބު ވިދާޅުވި އެވެ.

މިނިވަން ދުވަހު ރައީސް ރައްޔިތުންނާ މުޚާޠަބު ކުރައްވައި ދެއްކެވި ވާހަކަފުޅުތަކުން ފެނިގެންދިޔައީ ވަރަށް ދަށު ދަރަޖައިގެ އަހުލާގީ މިންގަނޑެއް

އަހުމަދު ޣާލިބު 

ރާއްޖޭގެ އިގްތިސާދީ ހާލަތަށް އިޝާރާތް ކުރައްވައި ޣާލިބު ވިދާޅުވީ 2028 ވަނަ އަހަރާ ހަމައަށް މި ގައުމު ދާއިރު އޮންނާނީ އިގްތިސާދީ ގޮތުން މުޅިން އިނދަޖެހިފައި ކަމަށެވެ.

ސަރުކާރުން ކުރިއަށްގެންދާ މަޝްރޫއުތަކާ ގުޅޭގޮތުން ޣާލިބު ވިދާޅުވީ، ގިނަ މަޝްރޫއުތަކަކީ ހަމައެކަނި ބޯޑު ޖެހުމަށްފަހު ހުއްޓިފައިވާ ކަންކަން ކަމަށެވެ. އަދި އެއް މަޝްރޫއެއްގެ ބޯޑު ދެ އަހަރު ފަހުން ބަދަލުކޮށް، އައު މަޝްރޫއެއްގެ ގޮތުގައި ދައްކަން ސަރުކާރުން މަސައްކަތް ކުރަމުންދާ ކަމަށް ވެސް އޭނާ ވިދާޅުވި އެވެ. 

މި ބައިވަރު ޕްރޮޖެކްޓުތަކެއްގެ ވާހަކަ ވިދާޅުވީ. ދެން އެކަމަކު އަޅުގަނޑު ބަލައިލިއިރުގައި، މިސާލަކަށް ބައެއް ރަށްރަށުގައި، ބިލެތްދޫ ކަހަލަ ރަށްރަށުގައި ފުޓްސަލް ދަނޑު އެއްޗެހި މި ހަދަން ހަވާލުކޮށްފައި. 82 ދުވަހުން ހަދަން ހަވާލުކުއިރު މިއަދާ ހަމައަށް 752 ދުވަސްވެފައި. ދެން ޕްރޮޖެކްޓް އަޅުގަނޑަށް ހީވަނީ ކައުންޓު އެ ކުރީ ވިދާޅުވި ބޯޑު ޖަހާ ވާހަކަ. މިހާރު ޕްރޮޖެކްޓެއް ފަށަން ރައީސް ވަޑައިގަންނަވާއިރުގައި މި ޖަހަނީ އެތާނގައި ބޯޑެއް، އިނެގިއުރޭޝަން ބޯޑެއް. ދެން ގޮސްފައި އޭގެ އަހަރު، ދެ އަހަރު ފަހުން އަނެއްކާވެސް އެ ބޯޑު ބަދަލުކުރަން. މިހާރު އެއީ އަނެއްކާ އާ ޕްރޮޖެކްޓުތަކެއް ގޮތަށް ހިނގާ ކަމެއް. ބޯޑުތައް ބަދަލު ކުރުން

 އަހުމަދު ޣާލިބު 

ޣާލިބު އިތުރަށް ވިދާޅުވީ، ސަރުކާރުގެ މައިގަނޑު މަގުސަދަކީ ރައްޔިތުންނަށް އޮޅުވާލައިގެން 2028 އާ ހަމައަށް ދިއުން ކަމަށެވެ. ނަމަވެސް ރައްޔިތުންގެ ވިސްނުމާއި ފިކުރު ހުރި ގޮތް ސަރުކާރަށް އަންދާޒާ ނުކުރެވޭ ކަމަށާއި، ރައްޔިތުންނަށް ގައުމުގެ ހާލަތު ވަރަށް ސާފުކޮށް އެނގޭ ކަމަށެވެ.