އިންފަންޓީނޯގެ ވިސްނުން ބަދަލު ނުކުރާނަމަ ވޯލްޑް ކަޕް ހިމެނޭހެން، ފީފާގެ މުބާރާތްތައް ބޮއިކޮޓް ކުރަން ޔުއެފާ އިން ނިންމައިފި

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ބޮޑެތި މުބާރާތްތަކުގެ ހިއްސާ ވިއްކަން ނިންމި ނިންމުމާ ދެކޮޅު ހެދުމުގެ ގޮތުން، ޔުއެފާގެ މެންބަރު ޤައުމުތަކުން ވަރުގަދަ ނިންމުމެއް ނިންމައިފި އެވެ.

އެގޮތުން ބުރާސްފަތި ދުވަހު ބޭއްވި ބައްދަލުވުމެއްގައި ޔުއެފާގެ މެންބަރު ޤައުމުތަކުން ނިންމާފައި ވަނީ، ފީފާގެ ރައީސް ޖިއާނީ އިންފަންޓީނޯ ހުށަހަޅާފައިވާ އެ ހުށަހެޅުން އަނބުރާ ނުގެންގޮސްފި ނަމަ، ފީފާ އިން ބާއްވާ ހުރިހާ މުބާރާތްތަކެއް ބޮއިކޮޓް ކުރުމަށެވެ. އޭގެ ތެރޭގައި ފީފާ ވޯލްޑް ކަޕް ވެސް ހިމެނޭނެ އެވެ. 

ޔުއެފާގެ މި ކުއްލި ބައްދަލުވުމުގައި އެ އެސޯސިއޭޝަންގެ 55 މެންބަރު އެސޯސިއޭޝަންތަކުން ވަނީ މި ނިންމުމަށް އެއްބަސްވެފައި އެވެ. އެ ބައްދަލުވުމަށް ފަހު ޔުއެފާ އިން ނެރެފައިވާ ބަޔާނެއްގައި ބުނެފައި ވަނީ، ވޯލްޑް ކަޕް އަކީ އިންވެސްޓްމަންޓް މުދަލެއް ނޫން ކަމަށެވެ. ބަޔާނުގައި ބުނެފައި ވަނީ ދުނިޔޭގެ ޤައުމީ އެސޯސިއޭޝަން ތަކަށް މިހާރު ދީފައި ވަނީ އަލްޓިމޭޓަމެއް ކަމަށާއި، ފުޓުބޯޅައިގެ އެންމެ ބޮޑު މުބާރާތްތައް އަވަސް އަރުވާލައިގެން ދިޔުމަށް އެއްބަސްވުމަށް، ނުވަތަ އެކަމުގެ ނަތީޖާ ބަަލައިގަތުމަށް ކަމަށް ވެސް ބަޔާނުގައި ބުނެފައިވެ އެވެ. 

އެއާއެކު ޔުއެފާ އިން ބުނެފައި ވަނީ ފީފާގެ އެ ވިސްނުން އަނބުރާ ނުގެންދާ ނަމަ، ނުވަތަ އެފަދަ ކަމެއް ނުކުރާނެ ކަމުގެ ޔަޤީންކަން ނުދޭ ނަަމަ، އެ ޙާލަތެއްގައި ޔުއެފާގެ އެއްވެސް ޤައުމެއްގެ ޓީމެއް ފީފާގެ އެއްވެސް މުބާރާތެއްގައި ބައިވެރި ނުވާނެ ކަމަށެވެ. އިންފަންޓީނޯގެ ވިސްނުމުގައި ހުރި ބަދަލުތަކުގެ ސަބަބުން، އެކަމުގެ ނޭދެވޭ އަސަރު ފުޓުބޯޅަ އަށް ކުރާނެ ކަމަށް ވެސް ޔުއެފާ އިން ދެކެ އެވެ. 

ފީފާ އިން ހުށަހަޅާފައި ވަނީ ވޯލްޑް ކަޕް މުބާރާތަށް ޕްރައިވެޓް އިންވެސްޓަރުން ގެނެސް، އެ މުބާރާތުގެ 20 ޕަސެންޓަށް ވުރެ ގިނަ ބައެއް ބޭރުގެ އިންވެސްޓަރުންނަށް ވިއްކާލުމުގެ ހުށަހެޅުމެކެވެ. މި ހުށަހެޅުމުގައި ބައިވެރިވާން ޝައުގުވެރިކަން ފާޅުކޮށްފައިވާ ފަރާތްތަކުގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕްގެ ދަނބިދަރިކަލުން ޖެރާޑް ކުޝްނާގެ ބޭބެ، ޖޯޝުއާ ކުޝްނާ ހިމެނެ އެވެ.

ވޯލްޑް ކަޕް ބޮއިކޮޓް ކުރުމަކީ އަލަށް ހިނގާނެ ކަމެއް ނޫނެވެ. އެގޮތުން އިންގްލެންޑުން ވަނީ އެންމެ ފުރަތަމަ އޮތް ތިން ވޯލްޑް ކަޕް ބޮއިކޮޓް ކޮށްފައި އެވެ. އޭގެ ފަހުން 1966 ވަނަ އަހަރު އެފްރިކާގެ ޤައުމުތަކުން ވެސް ވޯލްޑް ކަޕް ބޮއިކޮޓް ކުރިއިރު، ސޯވިއެޓް ޔޫނިއަން އިން ވަނީ 1974 ވަނަ އަހަރުގެ ވޯލްޑް ކަޕް ބޮއިކޮޓް ކޮށްފައި އެވެ. 

ނަމަވެސް، ޔޫރަޕުގެ ހުރިހާ ޤައުމެއް ގުޅިގެން، އެކު އެކީގައި ވޯލްޑް ކަޕް ބޮއިކޮޓް ކުރުމަށް މީގެ ކުރިން ނިންމާފައި ނުވެ އެވެ. ޔުއެފާ އަކީ ފީފާގެ އެންމެ ބާރުގަދަ ކޮންފެޑަރޭޝަން އެވެ. ފީފާގެ 211 މެންބަރުންގެ ތެރެއިން، ގިނައީ ޔުއެފާގެ މެންބަރުންނެވެ. މިހާތަނަށް ބޭއްވި ފިރިހެނުންގެ 23 ވޯލްޑް ކަޕްގެ ތެރެއިން، 13 ވޯލްޑް ކަޕް ކާމިޔާބު ކޮށްފައި ވަނީ ޔޫރަޕުގެ ޓީމުތަކުންނެވެ. އަންހެން ވޯލްޑް ކަޕް ނުވަ ފަހަރު ބޭއްވިިއިރު، ހަތަރު ފަހަރު ކާމިޔާބު ކުރީ ޔޫރަޕުގެ ޓީމުތަކުންނެވެ.