ފީފާގެ ޕްލޭން އަށް ތާއީދު ކުރާ މެންބަރު ޤައުމުތަކަށް 40 މިލިއަން އެމެރިކާ ޑޮލަރު ދޭން ހުށަހަޅައިފި

ފީފާ އިން ބާއްވާ މުބާރާތްތަކުގެ ހިއްސާ ވިއްކުމަށް އެ އިދާރާގެ ރައީސް ޖިއާނީ އިންފަންޓީނޯ ހުށަހަޅުއްވާފައިވާ ޕްލޭންގެ މައްސަލަ ބޮޑުވެފައި ވަނިކޮށް، އެ ހުށަހެޅުމަށް ތާއީދު ކުރާ ފީފާގެ މެންބަރު ޤައުމު ތަކަށް 40 މިލިއަން އެމެރިކާ ޑޮލަރު ނުވަތަ، 30 މިލިއަން ޕައުންޑު ދިނުމަށް ފީފާ އިން ހުށަހަޅައިފި އެވެ. 

ފީފާގެ 211 މެންބަރު އެސޯސިއޭޝަން އަށް އިންފަންޓީނޯ ފޮނުއްވާފައިވާ ސިޓީގައި ވިދާޅުވެފައި ވަނީ، މި މަޝްރޫއުގެ ދަށުން ދޭން ނިންމާފައިވާ ފައިސާގެ ތެރެއިން ފުރަތަމަ ލިބޭ 20 މިލިއަން ޑޮލަރު ބޭނުންވާ ނަމަ، އަންނަ ސެޕްޓެމްބަރު މަހުގެ 19 ވަނަ ދުވަހުގެ ކުރިން އެ ޤައުމަކުން މި ހުށަހެޅުމަށް ތާއީދު ކުރަން ޖެހޭނެ ކަމަށެވެ. އެ ހުށަހެޅުމަށް އެއްބަސްވާ ޤައުމުތަކަށް، 2027 ވަނަ އަހަރުގެ ޖަނަވަރީ މަހުގެ އެއް ވަނަ ދުވަހުން ފެށިގެން އެ ފައިސާ ލިބޭނެ ކަމަށް ވެސް އެ ސިޓީގައި ބަޔާން ކޮށްފައިވެ އެވެ. 

ފީފާ އިން ރާވާފައި ވަނީ ވޯލްޑް ކަޕް ފަދަ ބޮޑެތި މުބާރާތްތައް ހިންގުމަށް ވަކި ސަބްސިޑަރީ ކުންފުންޏެއް އުފައްދައި، އެ ކުންފުނީގެ ހިއްސާ ބޭރުގެ އިންވެސްޓަރުންނަށް ވިއްކާލުމަށެވެ. މި މަޝްރޫއުގެ ސަބަބުން ގާތް ގަނޑަކަށް 10 ބިލިއަން ޑޮލަރުގެ އާމްދަނީއެއް ލިބޭނެ ކަމަށް ލަފާ ކުރެވޭއިރު، މިއީ ފުޓުބޯޅައިގެ ބިންގާ ގުޑުވާލި ނިންމުމެއްގެ ގޮތުގައި ގިނަ ބަޔަކު ސިފަ ކުރެ އެވެ.

މި ހުށަހެޅުމާ ގުޅިގެން ޔޫރަޕުގެ ފުޓްބޯޅަ އިދާރާ، ޔުއެފާ އިން ވަނީ ފީފާ އަށް ވަރަށް ބޮޑަށް ފާޑު ކިޔައިފައި އެވެ. ޔުއެފާ އިން ބުނެފައި ވަނީ ފީފާ އިން މަސައްކަތް ކުރަނީ ފުޓުބޯޅަ ބޭނުން ކޮށްގެން އެމީހުންނާއި، އެމީހުންގެ ރައްޓެހިން މުއްސަނދިވާން ކަމަށެވެ. އަދި ވަކި މުއްދަތެއްގެ ކުރިން މިކަމަށް ތާއީދު ނުކޮށްފި ނަމަ، ފައިސާ ނުލިބޭނެ ކަމަށް ބުނެ ބިރު ދެއްކުމަކީ މި މަޝްރޫއުގެ ނުބައި ނިޔަތް ހާމަވާ ކަމެއް ކަމަށް ވެސް ޔުއެފާ އިން ބުނެފައިވެ އެވެ.

ބީބީސީ އަށް ފެނިފައިވާ ފަސް ސަފުހާގެ ސިޓީގައި އިންފަންޓީނޯ ވަނީ މި މަޝްރޫއުގެ ސަބަބުން ލިބޭނެ ފައިދާތައް ތަފްސީލު ކޮށްދެއްވާފައި އެވެ. ނަމަވެސް، މި މަޝްރޫއު އިއުލާން ކުރިއިރު ފީފާގެ އަށް ނައިބު ރައީސުންގެ ތެރެއިން ބައެއް ބޭފުޅުންނަށް ވެސް މިކަމުގެ މައުލޫމާތު އެނގިވަޑައި ނުގަންނަވާ ކަމަށް ރިޕޯޓު ތަކުގައި ބުނެފައިވެ އެވެ. މިކަމާ ގުޅިގެން ޔޫރަޕުގެ އިތުރުން، އޭޝިއާ އަދި އުތުރު އެމެރިކާގެ ގައުމު ތަކުން ވެސް ދަނީ ނުރުހުން ފާޅު ކުރަމުންނެވެ.

މި ފާޑު ކިޔުންތަކަށް ރައްދު ދެއްވަމުން އިންފަންޓީނޯ ނެރުއްވި ވީޑިއޯ މެސެޖެއްގައި ވިދާޅުވީ، މިއީ މަޖުބޫރު ކަމެއް ނޫން ކަމަށާއި، މިއީ ހަމައެކަނި ހުށަހެޅުމެއް ކަމަށެވެ. އަދި މިއީ ޑިމޮކްރެޓިކް އުސޫލުން މަޝްވަރާ ކޮށްގެން ކުރިއަށް ގެންދާ ކަމެއް ކަމަށާއި، މިއީ ދުނިޔޭގެ ފުޓުބޯޅަ ކުރިއެރުވުމަށް ލިބޭ ރަނުގެ ފުރުސަތެއް ކަމަށް ވެސް އޭނާ ވިދާޅުވި އެވެ. 

ޔުއެފާ އިން ބުނާ ގޮތުގައި ފުޓުބޯޅައިގެ ކުރިމަގު ބިނާ ކުރަންވާނީ އެސޯސިއޭޝަން ތަކާއި، ކުލަބު ތަކާއި، ލީގުތަކާއި، ކުޅުންތެރިން އަދި ސަޕޯޓަރުންގެ މަސްލަހަތަށް އިސްކަން ދީގެންނެވެ. ފީފާގެ މި ހުށަހެޅުމާ ދެކޮޅަށް ފުޓުބޯޅައިގެ ގިނަ ފަރާތް ތަކަކުން މިހާރު ވެސް ދަނީ ވާހަކަ ދައްކަމުންނެވެ.