ރައީސް އަޙްމަދު އަލް-ޝަރާ: އިސްރާއީލާއެކު ސަލާމަތީ އެއްބަސްވުމަކަށް ސޫރިޔާއިން މަސައްކަތް ކުރަނީ

އިސްރާއީލާއެކު ސަލާމަތީ އެއްބަސްވުމެއް ގާއިމުކުރުމަށްޓަކައި، ބައިނަލްއަގުވާމީ އެހީތެރިކަމާއެކު ސޫރިޔާގެ ސަރުކާރުން ހަރަކާތްތެރިވަމުންދާކަން އެ ގައުމުގެ ރައީސް އަޙްމަދު އަލް-ޝަރާ ހާމަކުރައްވައިފި އެވެ.

އަލްޖަޒީރާގެ "އަލް މުގާބަލާ" ޕްރޮގްރާމަށް ދެއްވި ޚާއްސަ އިންޓަވިއުއެއްގައި އަލް-ޝަރާ ވިދާޅުވީ، އިސްރާއީލާއެކު ވެވޭ މި އެއްބަސްވުމަކީ ސަރަހައްދީ ފެންވަރުގައި ގާއިމުކުރެވޭ ފުރިހަމަ ސުލްހައަކަށް ހުޅުވިގެންދާ ދޮރަކަށް ވާނެ ކަމަށް އުންމީދު ކުރައްވާ ކަމަށެވެ. އަދި މިފަދަ އެއްބަސްވުމެއްގެ ސަބަބުން، 1973 ވަނަ އަހަރުން ފެށިގެން އިސްރާއީލުން ގަވާއިދާ ޚިލާފަށް ހިފާފައިވާ ސޫރިޔާގެ ގޯލާން ހައިޓްސްގެ މިލްކުވެރިކަމަށް އެއްވެސް އުނިކަމެއް ނާންނާނެ ކަމުގެ ޔަގީންކަން ރައީސް ދެއްވި އެވެ.

ރައީސް އަލް-ޝަރާ އިތުރަށް ވިދާޅުވީ، ސޫރިޔާއިން އިސްރާއީލާއެކު ކުރިމަތިލުންތަކަކަށް ދާން ބޭނުންނުވާ ކަމަށާއި، މި ސަލާމަތީ އިންތިޒާމުގެ ސަބަބުން މިހާރު އޮތް ނުތަނަވަސްކަމަށް ދާއިމީ އަދި ފުރިހަމަ ހައްލެއް ހޯދުމަށް މަގުފަހިވެގެންދާނެ ކަމަށެވެ.

މި މަޝްވަރާތައް ފެށިފައި މިވަނީ، 2024 ވަނަ އަހަރުގެ ޑިސެމްބަރު މަހު ބައްޝާރުލް އަސަދުގެ ސަރުކާރު ވެއްޓި، އަލް-ޝަރާ ވެރިކަމާ ހަވާލުވެވަޑައިގަތް ފަހުން، ސޫރިޔާގެ ދެކުނުގެ ސަރަހައްދުތަކަށް އިސްރާއީލުން ތަކުރާރުކޮށް ހަމަލާދީ، އެ ގައުމުގެ ސަރަހައްދަށް ވަދެގަންނަމުންދާ ދަނޑިވަޅެއްގަ އެވެ.

ލުބުނާނުގެ ހާލަތާއި ސަރަހައްދީ ނުރައްކާ

ލުބުނާނުގެ މަސްރަހާ ގުޅޭގޮތުން ވާހަކަދައްކަވަމުން އަލް-ޝަރާ ވިދާޅުވީ، އަވަށްޓެރި ލުބުނާނަށް އަސްކަރީ ގޮތުން ވަދެގަތުމުގެ އެއްވެސް ވިސްނުމެއް ސޫރިޔާގެ ނެތް ކަމަށާއި، އެކަމާ ގުޅޭގޮތުން ފެތުރެމުންދާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ.

އޭގެ ބަދަލުގައި، ލުބުނާނަށް މިހާރު ކުރިމަތިވެފައިވާ ދަތި ހާލަތުން އަރައިގަނެ، އެ ގައުމުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ސޫރިޔާ ސަރުކާރުން ލުބުނާނުގެ ކަމާބެހޭ ފަރާތްތަކާއެކު މަޝްވަރާ ކުރަމުންދާ ކަމަށް އޭނާ ވިދާޅުވި އެވެ.

ލުބުނާނުގެ ދެކުނުގެ ސަރަހައްދުތައް މިހާރު އޮތީ އިސްރާއީލުގެ އިސްތިއުމާރުގެ ދަށުގަ އެވެ. ހިޒްބުﷲ އާއި އިސްރާއީލާ ދެމެދު ހިނގަމުންދާ ހަނގުރާމައިގެ ތެރެއިން، ލުބުނާނު ސަރުކާރުން މަސައްކަތް ކުރަމުންދަނީ އެ ސަރަހައްދުތައް އަނބުރާ ހޯދައި، ގައުމުގެ ހުރިހާ ހަތިޔާރެއް ސަރުކާރުގެ ފުރިހަމަ ކޮންޓްރޯލްގެ ދަށަށް ގެނައުމަށެވެ.

މީގެ އިތުރުން، ހަތިޔާރު ގެންގުޅުން ހަނިކުރުމަށާއި، ހަނގުރާމައާއި ސުލްހައާ ގުޅޭ އެންމެހާ ނިންމުންތައް ނިންމުމުގެ ފުރިހަމަ ބާރު ލުބުނާނުގެ ދައުލަތަށް އޮންނަންޖެހޭނެ ކަމަށް ދިމިޝްގުން ގަބޫލުކުރާ ކަމަށް ރައީސް ވިދާޅުވި އެވެ.

އަލް-ޝަރާ ފާހަގަކުރެއްވި ގޮތުގައި، ލުބުނާނުގެ މައްސަލައަށް ހަމައެކަނި ސަލާމަތީ ނަޒަރަކުން ބަލައިގެން ހައްލެއް ނުލިބޭނެ އެވެ. އޭގެ ބަދަލުގައި އެކި ދާއިރާތަކުން ފުރިހަމަ ހައްލެއް ބޭނުންވާ ކަމަށް އޭނާ ވިދާޅުވި އެވެ.

ލުބުނާނުގެ މަސްރަހު ގޯސްވެ، ހަމަނުޖެހުމެއްގެ ތެރެއަށް އެ ގައުމު ވެއްޓިއްޖެނަމަ، އޭގެ ނޭދެވޭ އަސަރު ސޫރިޔާއަށް ވަގުތުން ކުރާނެ ކަމަށާއި، އަދި އީރާނާ ދެކޮޅަށް އެމެރިކާއާއި އިސްރާއީލުން ކުރާ ހަނގުރާމަ ސަރަހައްދަށް ފެތުރިއްޖެނަމަ، މުޅި ސަރަހައްދަށް އޭގެ ނުރައްކާ ކުރިމަތިވާނެ ކަމުގެ އިންޒާރުވެސް ރައީސް ދެއްވި އެވެ.

ދަތިކުރުމުގެ ފިޔަވަޅުތަކާއި، އެސް.ޑީ.އެފް އަދި ގެއްލިފައިވާ މީހުން

ސޫރިޔާގެ ދާޚިލީ އަދި އިގްތިސާދީ ހާލަތާ ގުޅޭގޮތުން ވާހަކަދައްކަވަމުން އަލް-ޝަރާ ވިދާޅުވީ، އެމެރިކާއާއި އެހެނިހެން ގައުމުތަކުން ސޫރިޔާއާ ދެކޮޅަށް އަޅާފައިވާ އިގްތިސާދީ ފިޔަވަޅުތައް އުވާލުމަކުން އެކަނި ނުފުދޭނެ ކަމަށެވެ. އަދި ޓެރަރިޒަމަށް ވާގިވެރިވާ ގައުމުތަކުގެ ލިސްޓުން ސޫރިޔާ އުނިކުރުމަކީ ކޮންމެހެން ކުރަންޖެހޭ ކަމެއް ކަމަށް އޭނާ ފާހަގަކުރެއްވި އެވެ.

ސޫރިޔާގެ އުތުރާއި އިރުމަތީގެ ބައެއް ސަރަހައްދުތައް ކޮންޓްރޯލް ކުރަމުންދާ ކުރުދީންގެ އިސްނެގުމާއެކު އުފައްދާފައިވާ "ސީރިއަން ޑިމޮކްރެޓިކް ފޯސަސް" (އެސް.ޑީ.އެފް) އާއެކު ވެފައިވާ އެއްބަސްވުމާ ގުޅޭގޮތުން ރައީސް ވިދާޅުވީ، އެ އެއްބަސްވުން ތަންފީޒުކުރުމުގައި ލަސްތަކެއް އުޅޭ ކަމަށެވެ.

އެހެންނަމަވެސް، ސަރުކާރުން އެ އެއްބަސްވުމަށް ފުރިހަމައަށް އިހުތިރާމްކުރާ ކަމަށާއި، އެ މަސައްކަތް ކާމިޔާބުވާނެ ކަމުގެ ފުރިހަމަ އިތުބާރު އެބައޮތް ކަމަށް އޭނާ ވިދާޅުވި އެވެ.

މީގެ އިތުރުން، 2011 އިން 2024 އަށް ސޫރިޔާގައި ކުރި ހަނގުރާމައިގެ ތެރޭގައި ގެއްލިފައިވާ މީހުންގެ މައްސަލަ ބެލުމަށްޓަކައި ސަރުކާރުން ޚާއްސަ ކޮމިޓީއެއް އެކުލަވާލާފައިވާކަން ރައީސް އަލް-ޝަރާ އިއުލާން ކުރެއްވި އެވެ.

އދ. އިން އަންދާޒާކުރާ ގޮތުގައި ހަނގުރާމައިގެ ތެރޭގައި ގަދަކަމުން ގެއްލުވާލާފައިވާ މީހުންގެ އަދަދު ގާތްގަނޑަކަށް 100،000 އަށް އަރަ އެވެ. ނަމަވެސް ސޫރިޔާގެ "ނޭޝަނަލް ކޮމިޝަން އޮން މިސިންގ ޕާސަންސް" އިން ގަބޫލުކުރާ ގޮތުގައި ގެއްލިފައިވާ މީހުންގެ އަދަދު 300،000 އަށް އެރުން އެކަށީގެންވެ އެވެ.

އަލް-ޝަރާ ވިދާޅުވީ، މި ކޮމިޓީން މަސައްކަތް ކުރާނީ ބައިނަލްއަގުވާމީ މިންގަނޑުތަކާ އެއްގޮތަށް ކަމަށާއި، މި ދާއިރާގެ ތަޖުރިބާހުރި ގައުމުތަކާ ގުޅިގެން އެ މަސައްކަތް ކުރިއަށް ގެންދާނެ ކަމަށެވެ.