ފަރަންސޭސި ރައީސް ދިމިޝްގުގައި ހުންނެވި ހޮޓާ ކައިރީގައި ބޮންތަކެއް ގޮއްވާލައިފި
7 ޖުލައި 2026 | އަންގާރަ 08:33ސޫރިޔާގެ ވެރިކަން ބަދަލުވި ފަހުން އެ ގައުމަށް ޒިޔާރަތްކުރެއްވި ވިލާތުގެ ފުރަތަމަ ލީޑަރު، ފަރަންސޭސި ރައީސް އެމަނުއެލް މެކްރޯން ހުންނެވި ސަރަހައްދުގައި ބޮންތަކެއް ގޮއްވާލުމަކީ އެ ގައުމުގެ ސަލާމަތީ ކަންކަމަށް އޮތް ބޮޑު ގޮންޖެހުމެއް ކަމަށް ރިޕޯޓުތައް ބުނޭ. މި ހާދިސާއާ ގުޅިގެން ސަލާމަތީ ފިޔަވަޅުތައް ވަރުގަދަކޮށްފައިވާއިރު، މެކްރޯން ވަނީ ސޫރިޔާގެ އާ ރައީސް އަޙްމަދު އަލްޝަރާޢުއާ ބައްދަލުކުރައްވައި ގައުމުގެ ހާލަތާ ގުޅޭގޮތުން މަޝްވަރާކުރައްވާފައި.
ސޫރިޔާގެ ދިމިޝްގުގައި ފަރަންސޭސި ރައީސް އެމަނުއަލް މެކްރޮން މަޑުކުރައްވަން ހަމަޖެހިފައި އޮތް ހޮޓަލެއްގެ ކައިރީގައި ގޮއްވާލި ގޮވާތަކެއްޗާ އެކު ދުމާއި އަލިފާން އުފެދިފައިވާ މަންޒަރު | ރޮއިޓާސް
ސޫރިޔާގެ ރައީސް އަޙްމަދު އަލްޝަރާޢުއާ ބައްދަލުކުރެއްވުމަށް ފަރަންސޭސި ރައީސް އެމަނުއެލް މެކްރޯން އެ ގައުމަށް ކުރައްވަމުން ގެންދަވާ ދަތުރުފުޅުގެ ތެރެއިން، އެމަނިކުފާނު ހުންނެވި ހޮޓާ ކައިރީގައި އަންގާރަ ދުވަހު ބޮންތަކެއް ގޮއްވާލާފައިވާ ކަމަށް ސަލާމަތީ ބާރުތަކުން ބުނެފި އެވެ.
ފަރަންސޭސި ރިޔާސީ ގަނޑުވަރު، އެލިޒޭ ޕެލަސްއިން ބުނި ގޮތުގައި މި ގޮވުންތަކުގެ އަޑު މެކްރޯންއަށް އިވިވަޑައިގެންފައެއް ނުވެ އެވެ. އަދި މި ހާދިސާއަށް ފަހު މާގިނަ އިރުތަކެއް ނުވަނީސް އެމަނިކުފާނު ވަނީ ސޫރިޔާގެ ރައީސް އަޙްމަދު އަލްޝަރާޢުއާ ބައްދަލުކުރައްވާފަ އެވެ.
ރިޕޯޓުތައް ބުނާ ގޮތުގައި މި ގޮވުންތަކުން ހާމަވެގެންދަނީ ސޫރިޔާގެ ސަލާމަތީ ކަންކަން ބެލެހެއްޓުމުގައި ހުރި ބޮޑެތި ގޮންޖެހުންތަކެވެ. 2024 ވަނަ އަހަރު ބައްޝާރުލް އަސަދުގެ ވެރިކަން ވައްޓާލައި، އާ ސަރުކާރުން ސޫރިޔާގެ ވެރިކަމާ ހަވާލުވި ފަހުން، މެކްރޯންއަކީ އެ ގައުމަށް ޒިޔާރަތްކުރެއްވި ވިލާތުގެ އިއްތިހާދަށް ނިސްބަތްވާ ގައުމެއްގެ ވެރިޔާ އެވެ.
ގޮވުންތައް ހިނގި ސަރަހައްދުން އަލިފާނާއި ދުން އަރަނީ
މަންޒަރުދުށް މީހަކު ރޮއިޓާސް އަށް ބުނި ގޮތުގައި އެ ސަރަހައްދުން ގޮވުންތަކުގެ އަޑު އިވުމާއެކު ދުން އަރަމުންދާ މަންޒަރު ވަނީ ފެނިފަ އެވެ. ސަލާމަތީ ބާރުތަކުން ބުނި ގޮތުގައި މި ހާދިސާއާ ގުޅިގެން އެ ސަރަހައްދުގެ މަގުތައް ބަންދުކޮށް، ސަލާމަތީ ފިޔަވަޅުތައް ވަނީ ވަރުގަދަކޮށްފަ އެވެ.
އެލިޒޭ ޕެލަސްއިން ބުނި ގޮތުގައި ރައީސް މެކްރޯން ދަތުރުކުރެއްވި މޮޓޯކޭޑަށް މި ގޮވުންތަކުގެ އަޑެއް ނީވެއެވެ. އަދި މެކްރޯންއާއެކު ދަތުރުކުރި ނޫސްވެރިންގެ ޓީމުގައި ހިމެނޭ ރޮއިޓާސްގެ ނޫސްވެރިޔާ ވެސް ބުނީ، ހެނދުނުގެ ހަރަކާތްތަކުގެ ތެރޭގައި އެއްވެސް ގޮވުމެއްގެ އަޑު ނީވޭ ކަމަށާއި، އެއްވެސް ހާސްކަމެއް ހިނގާފައިވާ ތަން ފެނިފައި ނުވާ ކަމަށެވެ.
ސޫރިޔާގެ ދައުލަތުގެ ޓީވީން ފަހުން ރިޕޯޓްކޮށްފައިވާ ގޮތުގައި، ރައީސް މެކްރޯން އާއި ރައީސް އަލްޝަރާޢު ވަނީ ސޫރިޔާގެ ރިޔާސީ ގަނޑުވަރުގައި ބައްދަލުކުރައްވާފަ އެވެ.
ސޫރިޔާގެ ދާޚިލީ ހަނގުރާމައިގެ ތެރޭގައި، އައިސިސް ފަދަ ހަނގުރާމަވެރި އެކި ޖަމާއަތްތަކުން ވަނީ އެ ގައުމުގެ އެކި ސަރަހައްދުތަކުގައި ބާރުގަދަކޮށްފަ އެވެ.
އަސަދުގެ އާއިލާއިން ދިގުމުއްދަތަކަށް ކުރި ހަރުކަށި ވެރިކަން ނިމުމަކަށް ގެނައުމަށްފަހު، ރައީސް އަލްޝަރާޢު ވަނީ ސޫރިޔާގައި ހުރިހާ ފަރާތްތަކެއް ބައިވެރިވާ އާ ނިޒާމެއް ގާއިމުކުރައްވާނެ ކަމަށް ވައުދުވެވަޑައިގެންފަ އެވެ. ނަމަވެސް، އެމަނިކުފާނުގެ މި ވައުދުފުޅަށް މިހާރު ކުރިމަތިވަމުންދާ ހަމަނުޖެހުންތަކުގެ ސަބަބުން ވަނީ ގޮންޖެހުންތަކާ ކުރިމަތިވެފަ އެވެ.
މަސްދަރު: ރޮއިޓާސް، އަލް އަރަބިއްޔާ
