އިސްރާއީލުން ލުބުނާނުގައި ހުރި ހިޒްބުﷲގެ 10 މަރުކަޒަކަށް ހަމަލާދީފި
ލުބުނާނުގެ ދެކުނުގައި ހުރި ހިޒްބުﷲގެ 10 މަރުކަޒަކަށް އިސްރާއީލުން ހަމަލާދީފައިވަނީ، ދެ ގައުމުގެ ދެމެދުގައި ސުލްހައިގެ އެއްބަސްވުމެއް ގާއިމުކޮށްފައި ވަނިކޮށް. މި ހަމަލާތަކުގައި ބައެއް މީހުން ޒަޚަމްވެފައިވާއިރު، ހިޒްބުﷲ އިން ހަތިޔާރު އެޅުން ހުއްޓާލުމުން ނޫނީ އެ ސަރަހައްދުން ފައުޖުތައް ބޭލުމަކީ ކުރާނެ ކަމެއް ނޫން ކަމަށް އިޒްރޭލުގެ ބޮޑުވަޒީރު ވަނީ ވިދާޅުވެފައި.
2026 ޖޫން 20 ވީ ހޮނިހިރު ދުވަހު އިސްރާއީލުން ލުބުނާނުގެ ދެކުނުގެ ސިޓީއެއް ކަމަށްވާ ނަބަޠިއްޔާއަށް އަމާޒުކޮށް ސިލްސިލާ ވައިގެ ހަމަލާތަކެއް ދިނުމާ ގުޅިގެން، އެ ސަރަހައްދުން ދުން އަރަމުންދަނީ. | އޭއެފްޕީ
ލުބުނާނުގެ ދެކުނުގައި ހުރި ހިޒްބުﷲ ޖަމާއަތުގެ ބައެއް މަރުކަޒުތަކަށް ބުރާސްފަތި ދުވަހު ހަމަލާދީފައިވާނެ ކަމަށް އިސްރާއީލުގެ އަސްކަރިއްޔާއިން ބުނެފި އެވެ.
އިސްރާއީލުގެ އަސްކަރިއްޔާއިން ހުކުރު ދުވަހު ނެރުނު ބަޔާނެއްގައި ބުނެފައިވަނީ، ލުބުނާނުގެ ދެކުނުގައި ހުރި ހިޒްބުﷲގެ އިންފްރާސްޓްރަކްޗާގެ 10 މަރުކަޒަކަށާއި، ހަތިޔާރު އުފުލުމަށް ބޭނުންކުރި ލޮރީއަކަށް އިސްރާއީލު ޑިފެންސް ފޯސް (އައިޑީއެފް) އިން ހަމަލާދީފައިވާ ކަމަށެވެ.
އިސްރާއީލުގެ އަސްކަރިއްޔާއިން ބުނި ގޮތުގައި، މި ހަމަލާތައް އަމާޒުކުރީ ލުބުނާނުގެ ދެކުނުގެ ރަށްތައް ކަމަށްވާ ބިންތު ޖްބައިލް، ބައިތު ޔަހޫން، ކޫނީން އަދި ބަރާޝިތު ސަރަހައްދުގައި ހުރި ތަންތަނަށެވެ. އަދި މި ތަންތަނަކީ "ސެކިއުރިޓީ ޒޯން" ގައި ހަރަކާތްތެރިވާ އިސްރާއީލުސިފައިންނަށް ހަމަލާދިނުމަށް ހިޒްބުﷲ އިން ބޭނުންކުރާ ތަންތަން ކަމަށްވެސް އަސްކަރިއްޔާއިން ބުނެފައިވެ އެވެ.
އިސްރާއީލުން ކަނޑައަޅާފައިވާ، އަދި ލުބުނާނުގެ ބޯޑަރުން ފެށިގެން 10 ކިލޯމީޓަރު (ހަ މޭލު) އެތެރެއަށް އޮންނަ "ސެކިއުރިޓީ ޒޯން" ތެރޭގައި ތިބި އިސްރާއީލު ސިފައިންނަށް ދިން ހަމަލާތަކާ ގުޅިގެން، ހިޒްބުﷲގެ މަރުކަޒުތަކަށް ރައްދު ހަމަލާ ދީފައިވާ ކަމަށް އަސްކަރިއްޔާއިން ބުނެ އެވެ.
މީގެ އިތުރުން، އެ ސަރަހައްދު ކައިރިން ހަތިޔާރު ހިފައިގެން ދިޔަ ލޮރީއަށް ހަމަލާދިނީ، އިސްރާއީލު ސިފައިންނަށް ކުރިމަތިވެދާނެ ނުރައްކަލަކުން ސަލާމަތްވުމަށް ކަމަށްވެސް އަސްކަރިއްޔާއިން ހާމަކޮށްފައިވެ އެވެ.
ލުބުނާނަށް އިސްރާއީލުން ހަމަލާ ދީީފައިމިވަނީ އިސްރާއީލާއި ލުބުނާނާ ދެމެދު ސުލްހަ ގާއިމުކުރުމުގެ ގޮތުން، އެމެރިކާ މެދުވެރިވެގެން ތައްޔާރުކުރި އެއްބަސްވުމެއްގައި މިދިޔަ ހަފުތާގައި ދެ ގައުމުން ވަނީ ސޮއިކޮށްފައި ވަނިކޮށެވެ.
އިސްރާއީލުގެ އޮފިޝަލުން ތަކުރާރުކޮށް ވިދާޅުވަމުން ގެންދަވަނީ، ލުބުނާނުގެ އެކި ސަރަހައްދުތަކުން ހިޒްބުﷲ ޖަމާއަތް ހަތިޔާރު އެޅުން ހުއްޓާލުމުން ނޫނީ، ލުބުނާނުގެ ދެކުނުގައި ތިބި އިސްރާއީލު ސިފައިން އެ ސަރަހައްދުން ބޭލުމަކީ ކުރާނެ ކަމެއް ނޫން ކަމަށެވެ.
ލުބުނާނުގެ ރަސްމީ ނިއުސް އެޖެންސީން ރިޕޯޓުކޮށްފައިވާ ގޮތުގައި، ބުރާސްފަތި ދުވަހުގެ ރޭ އިސްރާއީލުން ވަނީ ބިންތު ޖްބައިލް ސަރަހައްދުގެ ބަރާޝިތު ކައިރިއަށާއި، ނަބަޠިއްޔާ އަލް-ފައުގާ އަށް ތިން ހަމަލާއެއް ދީފަ އެވެ.
ޓަޔަރ ކައިރީގައި އޮންނަ ސިއްދީގީން ނަމަކަށް ކިޔާ ރަށަށް ދިން ހަމަލާއެއްގައި ދެ މީހަކު ޒަޚަމްވެފައިވާ ކަމަށްވެސް އެ އެޖެންސީން ވަނީ ރިޕޯޓުކޮށްފަ އެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަންގާރަ ދުވަހު ލުބުނާނުގެ ދެކުނުގައި ތިބި ސިފައިންނާ ބައްދަލުކުރައްވައި ވިދާޅުވީ، ހިޒްބުﷲގެ ނުރައްކާ އޮތްހާ ހިނދަކު، އިސްރާއީލުގެ ފައުޖުތައް އެ ސަރަހައްދުގައި ދެމިތިބޭނެ ކަމަށެވެ.
އިސްރާއީލާ ލުބުނާނާ ދެމެދު ވެފައިވާ އެއްބަސްވުމުގައިވާ ގޮތުން، އިސްރާއީލުން ހިފާފައިވާ ލުބުނާނުގެ ބިންތަކުން ފައިބާނީ، ބެއިރޫތު ސަރުކާރުން ހިޒްބުﷲ ހަތިޔާރު އެޅުން ހުއްޓުވުމުންނެވެ. މި މަސައްކަތް ފެށުމަށް ހަމަޖެހިފައިވަނީ ލުބުނާނުގެ އަސްކަރިއްޔާއާ ހަވާލުކުރާ "ޕައިލެޓް ޒޯން" ތަކަކުންނެވެ.
މާޗް މަހުގެ 2 ވަނަ ދުވަހު ހިޒްބުﷲ އިން އިސްރާއީލަށް ރޮކެޓް ހަމަލާތައް ދޭން ފެށުމާއެކު، ލުބުނާނު ވަނީ މެދުއިރުމަތީގެ ހަނގުރާމައިގެ ތެރެއަށް ދަމައިގަނެވިފަ އެވެ. މީގެ ސަބަބުން އިޒްރޭލުން ވަނީ ވައިގެ މަގުންނާއި އެއްގަމު މަގުން ލުބުނާނަށް އަރައިގަނެ ހަމަލާދޭން ފަށާފަ އެވެ.
ލުބުނާނުގެ ރަސްމީ ހިސާބުތަކުން ދައްކާ ގޮތުގައި، ހަނގުރާމަ ފެށުނީއްސުރެ އިސްރާއީލުން ދިން ހަމަލާތަކުގައި މިހާތަނަށް 4,300 އެއްހާ މީހުން ވަނީ މަރުވެފަ އެވެ.
ހަމަ މި މުއްދަތުގެ ތެރޭގައި، އިސްރާއީލުގެ 38 ސިފައިންނާއި، އަސްކަރިއްޔާއަށް މަސައްކަތްކޮށްދޭ އަމިއްލަ ކޮންޓްރެކްޓަރަކު މަރުވެފައިވާ ކަމަށް އިސްރާއީލުއަސްކަރިއްޔާއިން ވަނީ ރިޕޯޓުކޮށްފަ އެވެ.
މަސްދަރު: އޭއެފްޕީ
