އިސްރާއީލުން ލުބުނާނުން ފައިބުމަށް އިންކާރުކޮށް ހަމަލާތައް ވަރުގަދަކޮށްފި
ލުބުނާނުން ފޭބުމަށް އެމެރިކާއިން ބާރުއަޅަމުންދިޔަ ނަމަވެސް، އިސްރާއީލުން ވަނީ އެ ގައުމުގެ ދެކުނުގެ އަވަށްތަކަށް ދޭ ހަމަލާތައް ވަރުގަދަކޮށް އާންމުންގެ ގެދޮރު ގޮއްވައި ބިމާ ހަމަކުރަން ފަށާފައި. ހިޒްބުاللهގެ ހަތިޔާރު އެއްކޮށް އަތުލެވެންދެން ސިފައިން އެ ގައުމުގައި މަޑުކުރާނެ ކަމަށް އިސްރާއީލުން ބުނާއިރު، މި ހަމަލާތަކުގައި މިހާތަނަށް 4،000 އަށްވުރެ ގިނަ މީހުން މަރުވެ އެތައް މިލިއަން ބަޔަކު ވަނީ ހާލުގައި ޖެހިފައި.
އިސްރާއީލުގެ "ހާމީސް 450" މަރުކާގެ ޑްރޯނަކުން ހުކުރު ދުވަހު ހެނދުނު ދިން ހަމަލާއެއްގައި، ނަބަތިއްޔާ އާއި ކަފަރްސިރް އަދި މެދުތެރޭ ލިޓާނީ ސަރަހައްދު ގުޅުވައިދޭ ކަފަރްދަޖަލް މަގުން ދަތުރުކުރި ޕިކަޕަކަށް ދެ މިސައިލް ފޮނުވާލި. | އެކްސް
އެމެރިކާއިން ތަފާތު އެކި ގޮތްގޮތަށް ވާހަކަދައްކަމުން ދިޔަ ނަމަވެސް، އިސްރާއީލުން ލުބުނާނުގެ ދެކުނަށް ދެމުންދާ ނުރައްކާތެރި ހަމަލާތައް ވަރުގަދަކޮށް، އެ ގައުމުގައި ތިބި އިސްރާއީލުގެ އިސްތިއުމާރީ ފައުޖުތައް ބޭލުމަށް އިންކާރުކޮށްފި އެވެ.
އިސްރާއީލުގެ އިސްތިއުމާރީ ސަރުކާރުން ހުކުރު ދުވަހު ލުބުނާނުގެ ދެކުނުގައިވާ ކަފްރް ދައްޖާލް އަވަށަށް ޑްރޯން ހަމަލާއެއް ދީފައިވާއިރު، މި ހަމަލާގައި ދެ މީހަކު ވަނީ ޒަޚަމްވެފަ އެވެ.
ލުބުނާނުގެ ދެކުނުގެ ސަރަހައްދުތަކުގައި ދިރިއުޅޭ ރައްޔިތުން އެ ސަރަހައްދުތަކުން ބޭރުކޮށްލުމުގެ މަގުސަދުގައި، އެ ގައުމުގެ އާންމު އުމްރާނީ ވަސީލަތްތަކަށް އަމާޒުކޮށް އިސްރާއީލުން ދެމުންދާ ސިލްސިލާ ހަމަލާތަކުގެ ތެރެއިން، އަލް-ޚިޔާމް އަދި އަލް-ގަންތަރާ އަވަށުގައި ބާރުގަދަ ގޮވުންތަކެއް ވަނީ ގޮއްވާލާފަ އެވެ.
ހަމަލާ ބަދަލުކުރުން ހުއްޓާލުމަށް އެއްބަސްވެފައިވާ ކަމަށް ބުނާ ބުނުމާ ޚިލާފަށް، އިސްރާއީލުގެ އިސްތިއުމާރީ ފައުޖުތަކުން ބުރާސްފަތި ދުވަހު ވެސް ލުބުނާނުގެ ގިނަ އަދަދެއްގެ ގެދޮރު ވަނީ ގޮއްވާލާފަ އެވެ.
ލުބުނާނުގެ ނޭޝަނަލް ނިއުސް އެޖެންސީ (އެން.އެން.އޭ) އިން ރިޕޯޓްކޮށްފައިވާ ގޮތުގައި، އިސްރާއީލު ސިފައިން ވަނީ އެ ގައުމުގެ އިސްތިއުމާރުގެ ދަށުގައިވާ ރަށްތަކާއި އަވަށްތަކުގައި ހުރި ގިނަ އަދަދެއްގެ ގެދޮރުގައި ގޮވާތަކެތި ހަރުކޮށް، އެ ތަންތަން ބިމާ ހަމަކޮށްފަ އެވެ.
"އިސްރާއީލުގެ އިސްތިއުމާރީ ފައުޖުތަކުން ވަނީ ބިންތް ޖުބައިލް ޑިސްޓްރިކްޓްގެ ހަދަޘާ އަވަށުގައި ހުރި ގިނަ އަދަދެއްގެ ގެދޮރު ތަޅާލުމުގެ މަސައްކަތް ކުރިއަށް ގެންގޮސްފައި،" އެން.އެން.އޭ އިން ރިޕޯޓްކޮށްފައިވެ އެވެ.
މީގެ އިތުރުން ހޫލާ އަވަށުގައި ގޮވާތަކެތި ހަރުކޮށް ގޮއްވުމުގެ އަމަލުތައް ހިންގާފައިވާ ކަމަށާއި، އަދި ރޭގަނޑުގެ ވަގުތުގައި ޚިޔާމްގެ އުމްރާނީ ވަސީލަތްތައް ހަލާކުކޮށްލާފައިވާ ކަމަށް ވެސް އެ އެޖެންސީން ވަނީ ރިޕޯޓްކޮށްފަ އެވެ.
ބުރާސްފަތި ދުވަހުގެ ފަތިހުގެ ވަގުތެއްގައި ޚިޔާމްގައި ގޮއްވާލި ބާރުގަދަ ފަސް ގޮވުމެއްގެ އަޑު ލުބުނާނުގެ ދެކުނުގެ ގިނަ ސަރަހައްދުތަކަށް ވަނީ އިވިފަ އެވެ.
ރޭގަނޑުގެ ވަގުތުގައި ތައިބޭ އަވަށުގެ އިމާރާތްތައް ތަޅާލަމުންދިޔައިރު، ހަމަ އެވަގުތު އިސްރާއީލުން ދިޔައީ ދައިރު ސިރްޔާންގެ ބޭރު ސަރަހައްދުތަކަށް ބަޑީގެ ހަމަލާތައް ވެސް އަމާޒުކުރަމުންނެވެ.
މި ހަމަލާތައް ދީފައި މިވަނީ، އެމެރިކާގެ ބަޔާންތަކާ ޚިލާފަށް، ލުބުނާނުގައި ތިބި އިސްރާއީލުގެ އިސްތިއުމާރީ ސިފައިން އެ ގައުމުން ބާލާނެ ކަމަށް ތެލް އަވީވުން ރަސްމީކޮށް އިންކާރުކޮށްފައިވާ ދަނޑިވަޅެއްގަ އެވެ.
"ލުބުނާނަށް ވަނުމަށް އަހަރެމެން އެއްވެސް ފަރާތެއްގެ ހުއްދައަކަށް ނޭދެން، އަދި ލުބުނާނުގައި މަޑުކުރުމަށް ވެސް އަހަރެމެން އެއްވެސް ހުއްދައެއް ބޭނުމެއް ނުވޭ،" އިސްރާއީލުގެ މިލިޓަރީ އެފެއާޒް މިނިސްޓަރު އިސްރާއީލް ކަޓްޒް ބުރާސްފަތި ދުވަހު ވިދާޅުވި އެވެ.
އޭނާ އިތުރަށް ވިދާޅުވީ، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އޭނާ ކުރިން ވެސް ސާފުކޮށްދީފައިވާ ފަދައިން، ހިޒްބުاللهގެ ހަތިޔާރު އެއްކޮށް އަތުލެވެންދެން، ލުބުނާނުގެ ސެކިއުރިޓީ ޒޯންގައި އިސްރާއީލު ސިފައިން ތިބޭނެ ކަމަށާއި އެ ސަރަހައްދުގައި އަސްކަރީ ހަރަކާތްތައް ކުރިއަށް ގެންދާނެ ކަމަށެވެ.
ނަމަވެސް، އޭގެ އެއް ދުވަސް ކުރިން އެމެރިކާގެ ރައީސް ޑޮނަލްޑް ޓްރަމްޕް ވަނީ އިސްރާއީލުން ލުބުނާނުން ފޭބުމަށް އެއްބަސްވެފައިވާ ކަމަށް ވިދާޅުވެފަ އެވެ.
"އާދެ، އަޅުގަނޑު ހީކުރަނީ އެމީހުން ފައިބާނެ ކަމަށް. އަދި އެމީހުން އެކަން ކުރަން ބޭނުންވާ ކަމަށް ވެސް އަޅުގަނޑު ގަބޫލުކުރަން. އެހެންވީމާ އިސްރާއީލާއި ލުބުނާނާ ދެމެދު އެއްބަސްވުމެއް އެބައޮތް. އާދެ، އެމީހުން ފައިބާނެ. އަދި އަޅުގަނޑު ހީކުރަނީ ކަންތައްތައް ވަރަށް ރަނގަޅަށް ނިމިގެންދާނެ ކަމަށް،" ބުދަ ދުވަހު ޓްރަމްޕް ވިދާޅުވި އެވެ.
މިދިޔަ ޖޫން މަހުގެ 26 ވަނަ ދުވަހު، އެމެރިކާ މެދުވެރިއެއްގެ ދައުރު އަދާކޮށްގެން ބެއިރޫތު ސަރުކާރާއި ތެލް އަވީވްއާ ދެމެދު ފްރޭމްވޯކް އެއްބަސްވުމެއްގައި ސޮއިކުރެވުނެވެ. ނަމަވެސް މި އެއްބަސްވުމުގެ ސަބަބުން ލުބުނާނުގެ މިނިވަންކަމަށް ބުރޫއަރާއިރު، އޭގެ ބަދަލުގައި އިސްރާއީލުން އަމަލުކުރަންޖެހޭ އެއްވެސް މަޖުބޫރު ކަމެއް ހިމަނާފައެއް ނުވެ އެވެ.
ލުބުނާނުގެ ޕާލަމެންޓުގެ ރައީސް ނަބީހް ބެއްރީ އާއި ހިޒްބުالله ޖަމާއަތުން ވަނީ މި އެއްބަސްވުމުގެ މާއްދާތަކަށް އިންކާރުކޮށް، އިސްރާއީލު ސިފައިން ލުބުނާނުގެ ބިމުން ފައިބަންޖެހޭނެ ކަމަށް ބުނެފަ އެވެ.
މިހާރު ވެސް އިސްރާއީލުން ވަނީ ލުބުނާނުގެ ބިމުގެ މަދުވެގެން ހަ އިންސައްތަ ހިފާފަ އެވެ. އަދި ބޯޑަރު ކައިރީގައިވާ އަވަށްތައް ބިމާ ހަމަކުރަމުންދާއިރު، މި އެއްބަސްވުމުގެ ސަބަބުން، މިދިޔަ މާރިޗު މަހުން ފެށިގެން އެތައް ހާސް ލުބުނާނު ރައްޔިތުންނެއް މަރުވެ، އެއް މިލިއަނަށްވުރެ ގިނަ މީހުން ހާލުގައި ޖެހިފައިވީ ނަމަވެސް، ތެލް އަވީވްއާ ދެކޮޅަށް ބައިނަލްއަގުވާމީ ގާނޫނީ ފިޔަވަޅު އެޅުމަށް ލުބުނާނަށް ވަނީ ހުރަސްތަކެއް ކުރިމަތިވެފަ އެވެ.
މި އެއްބަސްވުމަކީ އިސްރާއީލުގެ އިސްތިއުމާރު ދެމެހެއްޓުމަށް ދެވޭ ގާނޫނީ ސިފައެއް ކަމަށާއި، ލުބުނާނަށް ދެމުންދާ އަސްކަރީ ހަމަލާތައް ހުއްޓުވުމަށް ކުރާ މަސައްކަތްތައް ބަލިކަށިވާ ކަމެއް ކަމަށް ބުނެ ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ. އަދި މިއީ އިސްރާއީލުން ލުބުނާނަށް ހަމަލާދިނުން ހުއްޓާލުމަށާއި އެ ގައުމުގެ މިނިވަންކަމަށް އިހުތިރާމް ކުރުމަށް ގޮވާލާ، ވޮޝިންގްޓަނާއެކު އީރާނުން ޖޫން މަހު އެކުލަވާލި ފަހުމުނާމާ ތަންފީޒުކުރުމަށް ކުރާ މަސައްކަތަށް ވެސް އެޅުނު ހުރަހެކެވެ.
ހިޒްބުالله އާއި އެ ޖަމާއަތާ ގުޅިފައިވާ އަމަލް މޫވްމަންޓުން ވަނީ އެމެރިކާ މެދުވެރިވެގެން އެކުލަވާލި ލުބުނާނު-އިސްރާއީލު އެއްބަސްވުމަށް ފުރުސަތު ނުދޭނެ ކަމަށް ބުނެފަ އެވެ.
ލުބުނާނުގެ ކަމާބެހޭ ފަރާތްތަކުގެ ރިޕޯޓްތަކަށް ބަލާއިރު، މާރިޗު މަހުގެ 2 ވަނަ ދުވަހުން ފެށިގެން އިސްރާއީލުން ލުބުނާނަށް ދެމުންދާ ހަމަލާތަކުގައި މިހާތަނަށް މަދުވެގެން 4،303 މީހުން މަރުވެ، 12،200 އަށްވުރެ ގިނަ މީހުން ވަނީ ޒަޚަމްވެފަ އެވެ. އަދި މި ހަމަލާތަކުގެ ސަބަބުން އެއް މިލިއަނަށްވުރެ ގިނަ މީހުން ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން މަޖުބޫރުވެފަ އެވެ.
