ސޫރިޔާގެ ވެރިރަށް ދިމިޝްގުގައި ބާރުގަދަ އެއްޗެއް ގޮއްވާލައިފި

ސޫރިޔާގެ ވެރިރަށް ދިމިޝްގުގައި ހުންނަ ޖަސްޓިސް ޕެލެސް  ކައިރީގައި ހުރި ކޮފީ ފިހާރައެއްގައި ބުރާސްފަތި ދުވަހު އެއްޗެއް ގޮވައި، ގިނަ ބަޔަކު ޒަޚަމްވެއްޖެ ކަމަށް ރިޕޯޓް ކޮށްފި އެވެ.

ޙާދިސާގައި މަދުވެގެން 15 މީހުން ޒަޚަމްވި ކަމަށާއި ބައެއް މީހުންގެ ހާލު ސީރިއަސް ކަމަށް ވެސް ރިޕޯޓު ކޮށްފައިވެ އެވެ.

މި ހާދިސާއާ ގުޅިގެން އޭއެފްޕީގެ ރިޕޯޓަރުން ބުނި ގޮތުގައި، އެ ސަރަހައްދުގެ މަގުތަކުގައި އޮތް ބާރުބޮޑު ޓްރެފިކްގެ ތެރެއިން ސައިރަން އަޅަމުން އެމްބިއުލަންސްތައް ވަރަށް ބާރު ސްޕީޑުގައި ހާދިސާ ހިނގި ސަރަހައްދަށް ދަތުރުކުރަމުންދާ މަންޒަރު ވަނީ ފެނިފަ އެވެ.

ސޫރިޔާގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ޖަސްޓިސް ޕެލެސް ކައިރީގައި ހިނގި މި ގޮވުމުގެ ސަބަބުން ގިނަ ބަޔަކަށް އެކިވަރުގެ އަނިޔާތައް ވަނީ ލިބިފަ އެވެ. އަދި މި ގޮވުން ގޮވަން މެދުވެރިވި ސަބަބާއި، އެއީ ކޮން ބާވަތެއްގެ ގޮވުމެއްތޯ ބެލުމަށް ކަމާބެހޭ އިދާރާތަކުން މިހާރު ދަނީ ތަހުގީގު ކުރަމުންނެވެ.