ސޫރިޔާގެ ވެރިރަށް ދިމިޝްގުގައި ބާރުގަދަ އެއްޗެއް ގޮއްވާލައިފި
2 ޖުލައި 2026 | ބުރާސްފަތި 12:58ސޫރިޔާގެ ވެރިރަށް ދިމިޝްގުގެ ޖަސްޓިސް ޕެލެސް ކައިރީގައި ހިނގި މި ގޮވުމާ ގުޅިގެން ގިނަ ބަޔަކަށް އެކިވަރުގެ އަނިޔާތައް ލިބިފައިވާއިރު، އެމްބިއުލަންސްތަކުން ދަނީ ހާދިސާ ހިނގި ސަރަހައްދުގައި ހަރަކާތްތެރިވަމުން.
ދިމިޝްގުގައި އެއްޗެއް ގޮވި ސަރަހައްދުގެ ހާލަތު ފެންނަ މަންޒަރެއް | އަލްއަރަބިއްޔާ
ސޫރިޔާގެ ވެރިރަށް ދިމިޝްގުގައި ހުންނަ ޖަސްޓިސް ޕެލެސް ކައިރީގައި ހުރި ކޮފީ ފިހާރައެއްގައި ބުރާސްފަތި ދުވަހު އެއްޗެއް ގޮވައި، ގިނަ ބަޔަކު ޒަޚަމްވެއްޖެ ކަމަށް ރިޕޯޓް ކޮށްފި އެވެ.
ޙާދިސާގައި މަދުވެގެން 5 މީހުން މަރުވެ، 16 މީހުން ޒަޚަމްވި ކަމަށާއި ބައެއް މީހުންގެ ހާލު ސީރިއަސް ކަމަށް ވެސް ރިޕޯޓު ކޮށްފައިވެ އެވެ.
މި ހާދިސާއާ ގުޅިގެން އޭއެފްޕީގެ ރިޕޯޓަރުން ބުނި ގޮތުގައި، އެ ސަރަހައްދުގެ މަގުތަކުގައި އޮތް ބާރުބޮޑު ޓްރެފިކްގެ ތެރެއިން ސައިރަން އަޅަމުން އެމްބިއުލަންސްތައް ވަރަށް ބާރު ސްޕީޑުގައި ހާދިސާ ހިނގި ސަރަހައްދަށް ދަތުރުކުރަމުންދާ މަންޒަރު ވަނީ ފެނިފަ އެވެ.
ގޮއްވާލި ސަރަހައްދުގެ މަންޒަރު
ސޫރިޔާގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ޖަސްޓިސް ޕެލެސް ކައިރީގައި ހިނގި މި ގޮވުމުގެ ސަބަބުން ގިނަ ބަޔަކަށް އެކިވަރުގެ އަނިޔާތައް ވަނީ ލިބިފަ އެވެ. އަދި މި ގޮވުން ގޮވަން މެދުވެރިވި ސަބަބާއި، އެއީ ކޮން ބާވަތެއްގެ ގޮވުމެއްތޯ ބެލުމަށް ކަމާބެހޭ އިދާރާތަކުން މިހާރު ދަނީ ތަހުގީގު ކުރަމުންނެވެ.
މަސްދަރު: އަލް އަރަބިއްޔާ
