އެމެރިކާއިން އީރާނުގެ ދެކުނުގެ ސަރަހައްދުތަކަށް ހަމަލާދީފި، އީރާނުން ގަލްފުގެ ގައުމުތަކަށް ހަމަލާދީ ބަދަލު ހިފަނީ: އެންމެ ފަހުގެ މައުލޫމާތު

 ޖެހިޖެހިގެން ހަވަނަ ރޭ، އެމެރިކާއިން ވަނީ އީރާނަށް އަމާޒުކޮށް ވަރުގަދަ ހަމަލާތަކެއް ދީފަ އެވެ. މީގެ ބަދަލުގައި އީރާނުން ވެސް ވަނީ ގަލްފުގެ އެކި ގައުމުތަކަށާއި، ސަރަހައްދުގެ އެހެން ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތަކެއް ދީފަ އެވެ.

އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، ހަނގުރާމަ ހުއްޓާލުމަށް 60 ދުވަހުގެ މަޝްވަރާ މުއްދަތެއް ކަނޑައެޅުމަށް ޖޫން 22 ވަނަ ދުވަހު ސްވިޒަލޭންޑްގައި ދެ ފަރާތުން ބައްދަލުކުރި ފަހުން، އެމެރިކާއިން ދިން ހަމަލާތަކުގައި 38 މީހުން މަރުވެ 400 އަށްވުރެ ގިނަ މީހުން ޒަޚަމްވެފައިވާ ކަމަށް އީރާނުން ބުނެ އެވެ. މީގެ ތެރޭގައި ރޭ އެމެރިކާއިން ދިން ހަމަލާތަކުގައި މަރުވި އަށް މީހުން ވެސް ހިމެނެ އެވެ.

އެމެރިކާ އިން ހަމަލާދިނީ އީރާނުގެ ކޮން ސަރަހައްދުތަކަކަށް؟

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނި ގޮތުގައި، ހުކުރު ދުވަހުގެ ގްރީނިޗް މީން ޓައިމުން 01:40 ހާއިރު، އީރާނަށް އަމާޒުކޮށް ދިން ވަރުގަދަ ހަމަލާތަކުގެ އެންމެ ފަހުގެ ބުރު ވަނީ ނިންމާލާފަ އެވެ. ނަމަވެސް، އީރާނުގެ ކޮން ސަރަހައްދުތަކަކަށް ކަމެއް އެމެރިކާގެ އަސްކަރިއްޔާއިން ތަފްސީލެއް ނުދެ އެވެ.

އެހެންނަމަވެސް، އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި އެމެރިކާގެ ސިފައިން ވަނީ އީރާނުގެ އެކި ސަރަހައްދުތަކުގައި ހުރި މަދުވެގެން ހަ ފާލަމަކަށާއި، ރޭލު ސްޓޭޝަނަކަށާއި އެ ނޫންވެސް ބައެއް ތަންތަނަށް ހަމަލާދީފަ އެވެ. މި ހަމަލާތަކުގައި މަދުވެގެން އަށް މީހުން މަރުވެ، ގިނަ ބަޔަކު ވަނީ ޒަޚަމްވެފަ އެވެ.

އީރާނުގެ ފާރްސް ނިއުސް އެޖެންސީން ބުނި ގޮތުގައި، ދެކުނުގެ ހުރްމުޒްގާން ޕްރޮވިންސްގައި ހަމަލާދީފައިވާ ހަ ފާލަމަކީ:

- ބަންދަރު އައްބާސް އާއި ޚުމައިރު އަދި ލާރާ ގުޅުވައިދޭ ގަރީވާ ފާލަން

- ލަތިދާން އަވަށާ ކައިރީގައި އޮންނަ ފާލަން

- ކަހޫރެސްތާން-ލާރް މަގުގައި އޮންނަ ދެ ފާލަން

- ބަންދަރު އީ-ޚަމީރު، ކޭޝާރު އަދި ބަންދަރު އައްބާސް ގުޅުވައިދިނުމަށް ހަދަމުންދާ ފާލަން

- ޚުމައިރު ޑިސްޓްރިކްޓްގެ މާރު އަވަށުގައި އޮންނަ ފާލަން

އީރާނުގެ މިނިސްޓްރީ އޮފް އެނާޖީން ބުނާ ގޮތުގައި، އެމެރިކާގެ އެންމެ ފަހުގެ ހަމަލާތަކުގެ ސަބަބުން ބަންދަރު އައްބާސް އާއި ކައިރި އަވަށްތަކުގެ ކަރަންޓު ވިއުގައަށް ވަނީ ގެއްލުން ލިބިފަ އެވެ. މީގެ ސަބަބުން އީރާނުގެ ދެކުނުގެ ސަރަހައްދުތަކުން ކަރަންޓު ކެނޑިފައިވާ ކަމަށާއި، ބައެއް ސަރަހައްދުތަކަށް އަލުން ކަރަންޓު ދޭން ފަށާފައިވާ ކަމަށް ވެސް އެ މިނިސްޓްރީން ބުނެ އެވެ.

އީރާނުން ހަމަލާދިނީ ގަލްފުގެ ކޮން ގައުމުތަކަކަށް؟

ހުކުރު ދުވަހުގެ ހެނދުނު، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވަނީ، ދެ ގައުމުގެ ދެމެދުގައި ހަމަނުޖެހުންތައް އަލުން ފެށުނު ފަހުން އެމެރިކާގެ މަރުކަޒުތަކަށް އަމާޒުކޮށް ބަދަލުހިފުމުގެ 13 ވަނަ ބުރުގެ ހަމަލާ ދީފައިވާ ކަމަށް ބުނެފަ އެވެ.

ބަހްރައިން:

ހުކުރު ދުވަހުގެ ހެނދުނު ބަހްރައިންގައި ވައިގެ ހަމަލާތަކުގެ އިންޒާރުދޭ ސައިރަންތައް ވަނީ އަޅާފަ އެވެ. އެ ގައުމުގެ މިނިސްޓްރީ އޮފް އިންޓީރިއާ އިން ވަނީ ރައްޔިތުން ކެތްތެރިކަން އިސްކުރުމަށް އިލްތިމާސްކޮށްފަ އެވެ.

ގަތަރު:

ހުކުރު ދުވަހުގެ ހެނދުނުގެ ވަގުތެއްގައި، އީރާނުން ފޮނުވާލި މިސައިލެއް ހިމެނޭހެން ބައެއް ހަމަލާތައް ގަތަރަށް އަމާޒުވުމާ ގުޅިގެން، އެ ގައުމުގެ ކަމާބެހޭ ފަރާތްތަކުން ވަނީ ގަޑިއެއްހާއިރުގެ ތެރޭގައި ދެ އިންޒާރެއް ނެރެފަ އެވެ. ގަތަރުގެ މިނިސްޓްރީ އޮފް ޑިފެންސް އިން ބުނި ގޮތުގައި އެ ހަމަލާތައް ވަނީ ދިފާއީ ނިޒާމުން ހުއްޓުވާފަ އެވެ. ނަމަވެސް، ދޯހާގެ މަތިން ހަމަލާތައް ހުއްޓުވުމުގެ ތެރޭގައި ވެއްޓުނު ބައިތަކަކުން ކުޑަކުއްޖަކަށް އަނިޔާވެގެން ފަރުވާދެމުންދާ ކަމަށް އެ ގައުމުގެ މިނިސްޓްރީ އޮފް އިންޓީރިއާ އިން ރިޕޯޓްކޮށްފައިވެ އެވެ.

އޮމާން:

އީރާނުގެ އައި.އާރު.ޖީ.ސީ އިން ހުކުރު ދުވަހު ބުނި ގޮތުގައި، އޮމާންގެ ޣާނިމް ސަރަހައްދުގައި ހުރި އެމެރިކާގެ އެއާ ކޮންޓްރޯލް ރާޑަރަކާއި، އީރާނާއި އޮމާން ވަކިކުރާ ހުރްމުޒް ކަނޑުއޮޅީގައި ހުރި މެރިޓައިމް ކޮންޓްރޯލް ރާޑަރެއް ވަނީ ހަލާކުކޮށްލާފަ އެވެ. ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް އެޖެންސީން ބުނި ގޮތުގައި، ބުރާސްފަތި ދުވަހު އޮމާންގެ ޚަސަބްގެ އިރުމަތިން 19 ނޯޓިކަލް މޭލު (ގާތްގަނޑަކަށް 35 ކިލޯމީޓަރު) ބޭރުން ދަތުރުކުރަމުންދިޔަ ތެޔޮ ޓޭންކަރަކަށް ވެސް ނޭނގޭ އެއްޗަކުން ވަނީ ހަމަލާދީފަ އެވެ.

ކުވެއިތު:

އީރާނުގެ މެހެރު ނިއުސް އެޖެންސީން ރިޕޯޓްކޮށްފައިވާ ގޮތުގައި، ކުވެއިތުގައި ހުންނަ އެމެރިކާގެ އަސްކަރީ މަރުކަޒަކަށް ހަމަލާދީ، މިސައިލް ޑިފެންސް ރާޑަރަކާއި، ހަތިޔާރު ރައްކާކުރާ މުހިންމު ގުދަންތަކެއްގެ އިތުރުން 'ހައިމާސް' (HIMARS) މަރުކާގެ ދެ މިސައިލް ލޯންޗަރަކަށް ހަމަލާދީފައިވާ ކަމަށް އައި.އާރު.ޖީ.ސީ އިން ހުކުރު ދުވަހު ވަނީ ބުނެފަ އެވެ.

އުރުދުން:

އުރުދުންގެ އަސްކަރިއްޔާއިން ހުކުރު ދުވަހު ބުނި ގޮތުގައި، އެ ގައުމަށް އަމާޒުކޮށް އީރާނުން ފޮނުވާލި ތިން މިސައިލެއް ވަނީ ދިފާއީ ނިޒާމުގެ އެހީގައި ވައްޓާލާފަ އެވެ. މި ހާދިސާގައި އެއްވެސް މީހަކަށް އަނިޔާވެފައި ނުވާ ކަމަށާއި، ވެއްޓުނު ބައިތައް ނައްތާލުމުގެ މަސައްކަތް އުރުދުންގެ ރޯޔަލް އިންޖިނިއަރިން ކޯޕްސް އިން ކުރަމުންދާ ކަމަށް އަސްކަރިއްޔާއިން ބުނެ އެވެ.

ސީރިއާ:

ތަސްނީމް ނިއުސް އެޖެންސީން ހުކުރު ދުވަހު ރިޕޯޓްކޮށްފައިވާ ގޮތުގައި، ސީރިއާގެ އަލް-ތަންފް އަސްކަރީ މަރުކަޒުގައި ހުންނަ އެމެރިކާގެ ސްޕެޝަލް އޮޕަރޭޝަންސް ކޮމާންޑް ސެންޓަރަށް އައި.އާރު.ޖީ.ސީ އިން ވަނީ ހަމަލާދީފަ އެވެ. އައި.އާރު.ޖީ.ސީ އިން ބުނި ގޮތުގައި މިއީ އީރާންޝަހަރުގައި އީރާނުގެ ސިފައިން މަރާލުމުގެ ބަދަލުހިފުމުގެ ގޮތުން ދިން ހަމަލާއެކެވެ.

އީރާނާއި އެމެރިކާގެ ވެރިން ބުނަނީ ކީކޭ؟

އީރާނުގެ އަސްކަރީ ތަރުޖަމާނު އިބްރާހީމް ޒުލްފަގާރީ ވަނީ، ހުރްމުޒް ކަނޑުއޮޅީގެ ހަމަޖެހުން ނަގާލަނީ އެމެރިކާއިން ކަމަށް ތުހުމަތުކޮށް، 40 ދުވަހުގެ މި ހަނގުރާމައަށްފަހު އެ ކަނޑުއޮޅި ކުރިން އޮތް ހާލަތަށް ދުވަހަކުވެސް ނުދާނެ ކަމަށް ބުނެފަ އެވެ.

ބުދަ ދުވަހު ޖޯ ރޯގަންގެ ޕޮޑްކާސްޓެއްގައި ވާހަކަދައްކަވަމުން އެމެރިކާގެ ނައިބު ރައީސް ޖޭ.ޑީ ވޭންސް ވިދާޅުވީ، އީރާނާއެކު އެމެރިކާއިން ކުރަމުންދާ ހަނގުރާމައިގައި އެއްބަސްވުމަކަށް އައުމާ ދެކޮޅަށް، އިސްރާއީލު ސަރުކާރުގެ ބައެއް މެންބަރުން އެމެރިކާގެ އާންމު ރައްޔިތުންގެ ޚިޔާލު ބަދަލުކުރުމަށް މަސައްކަތް ކުރި ކަމަށެވެ.

"އަޅުގަނޑަށް ޔަގީންކަމާއެކު އެނގޭ އިސްރާއީލު ސަރުކާރުގެ ތެރޭގައި ތިބި ބަޔަކު، އަޅުގަނޑުމެން އެ ސިޔާސަތާ ދުރަށް ޖެއްސުމަށް މަސައްކަތް ކުރިކަން. އެއީ އެމީހުން ބޭނުންވަނީ އަސްކަރީ ހަރަކާތްތައް ކުރިއަށް ގެންދަން ކަމަށްވާތީ،" ވޭންސް ވިދާޅުވި އެވެ.