އިސްރާއީލުގެ ޑްރޯން ހަމަލާއެއްގައި ލުބުނާނުގައި ހަތަރު މީހުން މަރު

އިސްރާއީލާއި ހިޒްބުاللهއާ ދެމެދު ހަނގުރާމަ ހުއްޓާލުމުގެ އެއްބަސްވުމެއް ގާއިމުކޮށްފައި އޮތް ނަމަވެސް، ހޯމަ ދުވަހު ލުބުނާނުގެ ދެކުނުގައި ދުއްވާފައި ދިޔަ ކާރަކަށް އިސްރާއީލުން ދިން ހަމަލާއެއްގައި ތިން އަންހެނުން ހިމެނޭހެން ހަތަރު މީހަކު މަރުވެއްޖެ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓުކޮށްފި އެވެ.

ލުބުނާނުގެ ރަސްމީ ނިއުސް އެޖެންސީ (އެން.އެން.އޭ) އިން ބުނި ގޮތުގައި، ނަބަތިއްޔާ އަލް-ފައުގާގައި ހުންނަ އެމީހުންގެ އާއިލީ ގެ އަށް ޒިޔާރަތް ކުރުމަށްފަހު އެނބުރި ދަނިކޮށް، އިސްރާއީލުގެ ޑްރޯންއަކުން ދިން މި ހަމަލާގައި މަރުވެފައިވަނީ ސްކޫލެއްގެ ޕްރިންސިޕަލަކާއި، އޭނާގެ މަންމައާއި، ބޭރު ގައުމަކަށް ނިސްބަތްވާ އަންހެން މަސައްކަތްތެރިއެއްގެ އިތުރުން ސޫރިޔާއަށް ނިސްބަތްވާ ފިރިހެން މަސައްކަތްތެރިއެކެވެ.

ހަނގުރާމަ ހުއްޓާލުމުގެ އެއްބަސްވުމަށް ދެ ހަފުތާ ވެފައިވީ ނަމަވެސް، އިސްރާއީލުން ދަނީ ލުބުނާނުގެ ދެކުނުގެ ސަރަހައްދުތަކަށް، ހާއްސަކޮށް ނަބަތިއްޔާ ސަރަހައްދަށް ދޭތެރެ ދޭތެރެއިން ހަމަލާތައް ދެމުންނެވެ. އިސްރާއީލުން ބުނަމުންދަނީ އެ ހަމަލާތަކަކީ ހިޒްބުاللهގެ މަރުކަޒުތަކަށާއި އެ ޖަމާއަތުގެ ހަނގުރާމަވެރިންނަށް އަމާޒުކޮށް ދޭ ހަމަލާތަކެއް ކަމަށެވެ. މި ހަމަލާތަކާ ގުޅިގެން ދެ ފަރާތުންވެސް ދަނީ އެއްބަސްވުމާ ހިލާފުވަމުންދާ ކަމަށް ބުނެ އެކަކު އަނެކަކަށް ތުހުމަތު ކުރަމުންނެވެ.

ސަރަހައްދީ ހަނގުރާމަ ހުއްޓާލުމަށް އެމެރިކާއާއި އީރާނާ ދެމެދު މިދިޔަ މަހު ސޮއިކުރި އެއްބަސްވުމުގެ ދަށުން، ޖޫން މަހުގެ 21 ވަނަ ދުވަހުން ފެށިގެން ލުބުނާނުގައި ވަނީ ހަނގުރާމަ ހުއްޓާލުމުގެ އަމަލީ މަސައްކަތް ފަށާފަ އެވެ.

އޭގެ ދުވަސްތަކެއް ފަހުން ވޮޝިންގްޓަންގައި ކުރެވުނު މަޝްވަރާތަކަށްފަހު، ލުބުނާނާއި އިސްރާއީލުން ވަނީ ދާއިމީކޮށް ހަމަލާތައް ހުއްޓާލުމަށް މަގުފަހިކުރުމުގެ ގޮތުން އެމެރިކާގެ އެހީތެރިކަމާއެކު އެކުލަވާލި އޮނިގަނޑެއްގެ މައްޗަށް އެއްބަސްވެފަ އެވެ.

ހިޒްބުالله ޖަމާއަތުން ވަނީ މި އޮނިގަނޑު ގަބޫލުކުރުމަށް އިންކާރުކޮށްފަ އެވެ.

މި އެއްބަސްވުމުގައި ބުނެފައިވަނީ އީރާނުގެ މަދަދުލިބޭ ހިޒްބުالله ޖަމާއަތުން ހަތިޔާރު ބެހެއްޓުމަށާއި، ލުބުނާނުގެ ދެކުނުން އިސްރާއީލު ސިފައިން ފޭބުމަށާއި، އަދި އެ ސަރަހައްދުގައި ލުބުނާނުގެ އަސްކަރިއްޔާ ބޭތިއްބުމަށެވެ. އެހެން ނަމަވެސް، އިސްރާއީލު ސިފައިން އެ ސަރަހައްދުން އެއްކޮށް ފައިބާނެ ވަކި ތާރީޚެއް ކަނޑައަޅާފައެއް ނުވެ އެވެ.

އާދީއްތަ ދުވަހު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަނެއްކާވެސް ވިދާޅުވީ، އިސްރާއީލުގެ އުތުރުގެ ރައްޔިތުންނާއި އެ ގައުމުގެ ހުރިހާ ރައްޔިތުން ރައްކާތެރިކުރުމަށްޓަކައި ބޭނުންވާހާ ހިނދަކު، ލުބުނާނުގެ ދެކުނުގައި އިސްރާއީލުގެ އަސްކަރިއްޔާ ދެމިއޮންނާނެ ކަމަށެވެ.

ލުބުނާނުގެ ކަމާބެހޭ ފަރާތްތަކުން ހާމަކޮށްފައިވާ ގޮތުގައި، މާރިޗު މަހުގެ 2 ވަނަ ދުވަހުން ފެށިގެން އިސްރާއީލުން ދެމުންދާ ހަމަލާތަކުގައި މިހާތަނަށް ގާތްގަނޑަކަށް 4،300 މީހުން ވަނީ މަރުވެފަ އެވެ.

ޔޫއެން އިން ބުނާ ގޮތުގައި، މި ހަނގުރާމައިގެ ސަބަބުން އެއް މިލިއަނަށްވުރެ ގިނަ މީހުން ގެދޮރު ދޫކޮށް ގޮސްފައިވާއިރު، ޖޫން މަހުގެ 22 ވަނަ ދުވަހުން ފެށިގެން މިހާތަނަށް 640،000 އަށްވުރެ ގިނަ މީހުން ވަނީ އަނބުރާ އެމީހުންގެ ގެދޮރަށް ރުޖޫއަވެފަ އެވެ.