ބާސެލޯނާގެ ދަނޑު މަރާމާތުކުރުމުގެ މަސައްކަތުގައި އުޅުނު މުވައްޒަފަކު މަރުވެއްޖެ

ސްޕެއިންގެ ގަދަބާާރު ބާސެލޯނާގެ ރަސްމީ ދަނޑު، ކޭމްޕް ނޯ ސްޓޭޑިއަމްގެ މަރާމާތުގެ މަސައްކަތް ކުރަމުން ދަނިކޮށް، އެ ތަނުގައި މަސައްކަތް ކުރި މުވައްޒަފަކު މަރުވެއްޖެ އެވެ. 

ހޮނިހިރު ދުވަހު ބާސެލޯނާ އިން ނެރުނު ކުރު ބަޔާނެއްގައި ބުނެފައި ވަނީ، ހުކުރު ދުވަހު އެ ކުލަބުގެ ސްޓޭޑިއަމްގައި މަސައްކަތް ކުރަމުން ދަނިކޮށް ހިނގި އެކްސިޑެންޓެއްގައި މުވައްޒަފަކު މަރުވެފައިވާ ކަމަށެވެ. އަދި އެކަމާ ގުޅިގެން އެ ކުލަބުން ނުހަނު ހިތާމަ ކުރާ ކަމަށް ވެސް ބާސެލޯނާ އިން ބުނެފައިވެ އެވެ. އަދި މި ހާދިސާގައި މަރުވި މުވައްޒަފުގެ އާއިލާ އާއި، ރައްޓެހިން އަދި އޭނާ އާއެކު މަސައްކަތް ކުރި މުވައްޒަފުންނަށް އެ ކުލަބުން ވަނީ ތައުޒިޔާ ފޮނުވާފައި އެވެ. 

ކެޓަލަންގެ ފުލުހުންނާ ހަވާލާދީ މީޑިއާތަކުން ރިޕޯޓު ކޮށްފައިވާ ގޮތުގައި، މި ހާދިސާގައި މަރުވެފައިވަނީ އުމުރުން 54 އަހަރުގެ ފިރިހެނެކެވެ. އޭނާ މަރުވީ ބޮލަށް ލިބުނު ބާރުގަދަ ހަމަލާއެއް، ނުވަތަ އެއްޗަކުން ޖެހުމުގެ ސަބަބުން ކަމަށް ފުލުހުން ބުނެފައިވެ އެވެ. ނަމަވެސް މި ހާދިސާ ހިނގަން މެދުވެރިވި ސީދާ ސަބަބާ ގުޅޭ ގޮތުން އެސޯސިއޭޓެޑް ޕްރެސް (އޭޕީ) އިން ސުވާލު ކުރުމުން، ފުލުހުން އިތުރު ތަފްސީލެއް ދީފައި ނުވެ އެވެ. 

ބާސެލޯނާގެ ދަނޑުގެ މަރާމާތުގެ މަސައްކަތް އެ ކުލަބުން ފަށާފައި ވަނީ 2023 ވަނަ އަހަރު އެވެ. އަދި ދަނޑުގެ ބޮޑު ބައެއްގެ މަސައްކަތް ނިންމައި، މިދިޔަ އަހަރުގެ ނޮވެމްބަރު މަހުން ފެށިގެން ވަނީ ދަނޑު ބޭނުން ކުރަން ފަށައިފަ އެވެ. ނަމަވެސް، ބާސެލޯނާ އިން ދަނޑު ބޭނުން ކުރަން ފަށާފައި ވަނީ މަދު އަދަދެއްގެ ސަޕޯޓަރުންނަށް ވަދެވޭ ގޮތަށެވެ. 

ސްޕެނިޝް ލީގުގެ ޗެމްޕިއަންކަން ފާާއިތުވި ދެ ސީޒަންގައި ވެސް ހޯދާފައިވާ ބާސެލޯނާ އިން، އައު ސީޒަންގެ ފުރަތަމަ މެޗުގައި ނުކުންނާނީ އެލްޗޭއާ ދެކޮޅަށެވެ. އަދި އައު ސީޒަންގައި އެ ކުލަބުގެ އަމިއްލަ ދަނޑުގައި ކުޅޭ ފުރަތަމަ މެޗަށް ވާނީ، އޯގަސްޓު މަހުގެ 28 ވަނަ ދުވަހު އެތުލެޓިކް ބިލްބާއޯއާ ދެކޮޅަށް ކުޅޭ މެޗެވެ. 

މިހާރު ކުރިއަށްދާ ބޮޑު މަޝްރޫއު އެއްކޮށް ނިމުމުން، ކޭމްޕް ނޯ ސްޓޭޑިއަމްގައި އެއްފަހަރާ 105،000 ސަޕޯޓަރުންނަށް ތިބެވޭނެ އެވެ. މިއާއެކު އެ ސްޓޭޑިއަމް ވެގެން ދާނީ މުޅި ޔޫރަޕުގައި ވެސް އޮތް އެންމެ ޖާގަ ބޮޑު އެއް ސްޓޭޑިއަމް އަށެވެ.