ބެޓިސް އަތުން މޮޅުވެ، ޗެމްޕިއަން ބާސެލޯނާ އަށް ރެކޯޑެއް

ސްޕެނިޝް ލީގުގައި ރެއާލް ބެޓިސްއާ ދެކޮޅަށް ކުޅުނު މެޗުން، ޗެމްޕިއަން ބާސެލޯނާ މޮޅުވެއްޖެ އެވެ.

ބާސެލޯނާގެ އަމިއްލަ ދަނޑުގައި އާދީއްތަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 28 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ރަފީނިއާ އެވެ. އޭގެ ފަހުން ވެސް ފުރަތަމަ ހާފުގައި ބާސެލޯނާ އިން ވަނީ ލަނޑު ޖަހަން ފުރުސަތު ތަކެއް ހޯދައިފަ އެވެ.

މެޗުގެ ދެ ވަނަ ހާފުގެ 62 ވަނަ މިނެޓުގައި ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ވެސް ރަފީނިއާ އެވެ. ބާސެލޯނާ އިން ދެ ވަނަ ލަނޑު ޖެހިތާ ހަތް މިނެޓު ފަހުން އިސްކޯ ވަނީ ބެޓިސްގެ ހަމައެކަނި ލަނޑު ޖަހައިފަ އެވެ. އެ ލަނޑު އޭނާ ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. މެޗުގެ 74 ވަނަ މިނެޓުގައި ބާސެލޯނާގެ ތިން ވަނަ ލަނޑު ޖެހީ ޔާއޯ ކަންސޭލޯ އެވެ.

މެޗުން މޮޅުވެ ބާސެލޯނާ އެއް ވަަނައިގައި އޮތީ މިހާތަނަށް ކުޅެފެއިވާ 37 މެޗުން 94 ޕޮއިންޓާ އެކު އެވެ. އަމިއްލަ ދަނޑުގައި ބެޓިސް އަތުން ހޯދި މޮޅާ އެކު، ބާސެލޯނާ ވެގެން ގޮސްފައި ވަނީ ސްޕެނިޝް ލީގުގައި އަމިއްލަ ދަނޑުގައި ކުޅުނު 19 މެޗުން ވެސް މޮޅުވި ފުރަތަމަ ޓީމަށެވެ. މި ސީޒަންގެ ސްޕެނިޝް ލީގު ބާސެލޯނާ އިން ކާމިޔާބު ކޮށްފައިވާއިރު، މިއީ ބާސެލޯނާ އިން ޖެހި ޖެހިގެން ލީގު ކާމިޔާބު ކުރި ދެ ވަނަ ފަހަރެވެ.