ލީގު ޗެމްޕިއަންކަން ހޯދުމަށް ފަހު ކުޅުނު ފުރަތަމަ މެޗުން ބާސެލޯނާ ބަލިވެއްޖެ
އަލަވޭސް އަތުން ބަލިވެ، ބާސެލޯނާ އަށް ވަނީ ލީގުގައި 100 ޕޮއިންޓު ހަމަ ކުރުމުގެ ފުރުސަތު ގެއްލިފައި. އެއް ވަނައިގައި ބާސެލޯނާ އޮތީ 36 މެޗުން 91 ޕޮއިންޓާ އެކު. ލީގުގައި ދެން ބާސެލޯނާ އަށް ބާކީ އޮތީ ދެ މެޗު. އެ ދެ މެޗުން މޮޅުވި ނަމަވެސް، ބާސެލޯނާ އަށް ލިބޭނީ މިހާރު 97 ޕޮއިންޓު.
ބާސެލޯނާ އާއި އަލަވޭސް ބައްދަލު ކުރި މެޗުގެ ތެރެއިން. | ރޮއިޓާސް
ސްޕެނިޝް ލީގުގައި ޑިޕޯޓިވޯ އަލަވޭސްއާ ދެކޮޅަށް ކުޅުނު މެޗުން ބާސެލޯނާ ބަލިވެއްޖެ އެވެ.
އަލަވޭސްގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗުގައި އެ ޓީމުން ވަނީ 1-0 އިން ބާސެލޯނާ ބަލިކޮށްފަ އެވެ. މިއީ މި ސީޒަންގެ ސްޕެނިޝް ލީގުގެ ޗެމްޕިއަންކަން ހޯދުމަށް ފަހު، ބާސެލޯނާ ކުޅުނު ފުރަތަމަ މެޗެވެ.
ބާސެލޯނާއާ ދެކޮޅަށް ކުޅުނު މެޗުގެ ފުރަތަމަ ހާފުގައި އަލަވޭސް އިން ވަނީ ލަނޑު ޖަހައި ލީޑު ނަގައިފަ އެވެ. އެގޮތުން ފުރަތަމަ ހާފުގެ އިތުރު ވަގުތުގައި އެ ޓީމަށް ލީޑު ނަގައިދިނީ އިބްރާހިމް ޑިއަބާޓޭ އެވެ. މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް ބާސެލޯނާ އިން މަސައްކަތް ކުރި ނަމަވެސް، އެކަން ކާމިޔާބެއް ނުވި އެވެ.
އަލަވޭސް އަތުން ބަލިވެ، ބާސެލޯނާ އަށް ވަނީ ލީގުގައި 100 ޕޮއިންޓު ހަމަ ކުރުމުގެ ފުރުސަތު ގެއްލިފަ އެވެ. އެއް ވަނައިގައި ބާސެލޯނާ އޮތީ 36 މެޗުން 91 ޕޮއިންޓާ އެކު އެވެ. ލީގުގައި ދެން ބާސެލޯނާ އަށް ބާކީ އޮތީ ދެ މެޗެވެ. އެ ދެ މެޗުން މޮޅުވި ނަމަވެސް، ބާސެލޯނާ އަށް ލިބޭނީ މިހާރު 97 ޕޮއިންޓެވެ.
ބާސެލޯނާ އިން މިހާތަނަށް 29 ފަހަރު ސްޕެނިޝް ލީގު ކާމިޔާބު ކޮށްފައިވާއިރު، ޖެހި ޖެހިގެން ދެ ވަނަ ސީޒަންގައި ބާސެލޯނާ އިން މި ވަނީ ލީގު ކާމިޔާބު ކޮށްފަ އެވެ.
