ލެވަންޑޯސްކީ ނެތް ތަން ފޫބައްދަން އުނދަގޫ ވާނެ: ފްލިކް

މި ސީޒަނަށް ފަހު ބާސެލޯނާ ދޫކޮށްލަން ނިންމާފައިވާ ޕޮލެންޑުގެ ފޯވާޑު ރޮބާޓް ލެވަންޑޯސްކީ ނެތް ތަން ފޫބައްވަން އުނދަގޫ ވާނެ ކަމަށް، ބާސެލޯނާގެ ކޯޗު ހަންސީ ފްލިކް ބުނެފި އެވެ.

ބާސެލޯނާ އާއެކު ލެވަންޑޯސްކީ ސޮއި ކޮށްފައިވާ އެއްބަސްވުމުގެ މުއްދަތު އަންނަ ޖޫން މަހުގެ ނިޔަލަށް ހަމަވާއިރު، ލެވަންޑޯސްކީ ވަނީ ބާސެލޯނާ ދޫކޮށްލަން ނިންމައިފަ އެވެ. ބާސެލޯނާ އާއި ލެވަންޑޯސްކީ ވެސް އެކަން އިއުލާާން ކޮށްފައިވާއިރު، އާދީއްތަ ދުވަހުގެ ރޭ ސްޕެނިޝް ލީގުގައި ރެއާލް ބެޓިސްއާ ދެކޮޅަށް ބާސެލޯނާ އިން ކުޅުނު މެޗަކީ އަމިއްލަ ދަނޑުގައި ލެވަންޑޯސްކީގެ ފަހު މެޗެވެ. އެ މެޗަށް ފަހު ބާސެލޯނާގެ ކުޅުންތެރިންނާއި ސަޕޯޓަރުން ވަނީ ލެވަންޑޯސްކީ އަށް އަލްވަދާއު ކިޔައިފަ އެވެ.

އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، ލެވަންޑޯސްކީ ނެތް ތަން ފޫބެއްދުމަކީ ބާސެލޯނާ އަށް ފަސޭހަ ކަމަކަަށް ނުވާނެ ކަމަށެވެ. އެކަން ފާހަގަކޮށް ފްލިކް ބުނީ، މިދިޔަ އަހަރު ތަކުގައި އުފެދުނު އެންމެ މޮޅު ސްޓްރައިކަރަކީ ލެވަންޑޯސްކީ ކަމަށެވެ. ލެވަންޑޯސްކީގެ ބަދަލުގައި އެ ފެންވަރުގެ އެހެން ކުޅުންތެރިޔަކު ހޯދަން ފަސޭހަ ނުވާނެ ކަމަށާއި، ބާސެލޯނާ އަށް ހޯދޭ ކުޅުންތެރިޔަކު ބަލަން މަޑު ކުރަން ޖެހޭނެ ކަމަށް ފްލިކް ބުންޏެވެ.

ބާސެލޯނާގައި ލެވަންޑޯސްކީ މޮޅު ކުޅުމެއް ދެއްކިއިރު، ފްލިކް ބުނީ ލެވަންޑޯސްކީ ވަނީ އޭނާގެ ހިތުގައި ބާސެލޯނާ އަށް ޚާއްސަ ޝަރަފެއް ދީފައި ކަމަށެވެ. ބާސެލޯނާގައި ލެވަންޑޯސްކީ އަށް އިރުޝާދު ދިނުމަކީ އޭނާ އަށް ލިބޭ އުފަލެއް ކަމަށް ފާހަގަކޮށް ފްލިކް ބުނީ، ލެވަންޑޯސްކީ އަކީ ވަރަށް ރަނގަޅު މީހެއް ކަމަށާއި، އަދި އޭނާ އަކީ ވަރަށް ހުނަރުވެރި، މޮޅު ކުޅުންތެރިޔެއް ކަމަށެވެ. ފާއިތުވި 20 އަހަރަށް ބަލާއިރު ވެސް، ލެވަންޑޯސްކީ އަކީ އެންމެ މޮޅު "ނަންބަރު9" ކަމަށް ވެސް ފްލިކް ވަނީ ބުނެފަ އެވެ.

ބާސެލޯނާ ދޫކޮށްލަން ލެވަންޑޯސްކީ ނިންމާފައިވާއިރު، އޭނާ ވަނީ މިހާތަނަށް ބާސެލޯނާ އަށް ކުޅެދިން 192 މެޗުގައި 119 ލަނޑު ޖަހައިފަ އެވެ. ބާސެލޯނާ އާއެކު ލެވަންޑޯސްކީ ހަތް ތައްޓެއް ކާމިޔާބު ކޮށްފައިވާއިރު، އޭގެ ތެރޭގައި ސްޕެނިޝް ލީގު ތިން ފަހަރު ކާމިޔާބު ކުރުން ވެސް ހިމެނެ އެވެ. ބާސެލޯނާ ދޫކޮށްލުމަށް ފަހު ދެން ބަދަލު ވާނެ ކުލަބެއް ލެވަންޑޯސްކީ މިހާތަނަށް ނިންމާފައި ނުވާ ކަމަށް ރިޕޯޓުތައް ބުނެ އެވެ.

ލެވަންޑޯސްކީ އަށް ތައުރީފުކޮށް ފްލިކް ވާހަކަ ދައްކާފައިވާއިރު، މީގެ ކުރިން ފްލިކް ވަނީ ޖަރުމަނުގެ ބަޔާން މިއުނިކް ގައި ވެސް އޭނާ އަށް އިރުޝާދު ދީފަ އެވެ.