ފަސް އަހަރު ދުވަހުގެ އެއްބަސްވުމެއްގެ ދަށުން ގޯޑަން ބާސެލޯނާ އަށް ބަދަލުވެއްޖެ

ނިއުކާސަލް ޔުނައިޓެޑަށް ކުޅެމުން އައި އެންތަނީ ގޯޑަން، ސްޕެއިންގެ ބާސެލޯނާ އަށް ބަދަލުވެއްޖެ އެވެ.

އުމުރުން 25 އަހަރުގެ ކުޅުންތެރިޔާ ބާސެލޯނާ އަށް ބަދަލުވެފައި ވަނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. ބާސެލޯނާ އާއެކު ގޯޑަން ސޮއި ކުރި އެއްބަސްވުމުގެ މުއްދަތު ހަމަވާނީ 2031 ވަނަ އަހަރުގެ ޖޫން މަހުގެ ނިޔަލަށެވެ. ބާސެލޯނާ އިން ވަނީ ގޯޑަން އެ ކުލަބުގެ އެއްބަސްވުމުގައި ސޮއި ކޮށްފައިވާކަން ރަސްމީކޮށް އިއުލާން ކޮށްފަ އެވެ. ގޯޑަންގެ ޑީލްގައި ބާސެލޯނާ އިން ޖުމުލަ 80 މިލިއަން ޔޫރޯ ޚަރަދު ކުރާނެ އެވެ.

ބާސެލޯނާގެ އެއްބަސްވުމުގައި ސޮއި ކުރުމަށް ފަހު ވާހަކަ ދައްކަމުން ގޯޑަން ބުނީ، ބާސެލޯނާ އަށް ކުޅުމަކީ އޭނާގެ އުމުރުން އެންމެ ތިން އަހަރުގައި ވެސް އުންމީދު ކުރި ކަމެއް ކަމަށެވެ. ކުޑަ ކުއްޖެއްގެ ގޮތުގައި ހުރިއިރު ވެސް، އޭނާ ބާސެލޯނާ އަށް ކުޅޭނެކަން އިނގޭތީ ސްޕެނިޝް ބަހުން ވާހަަކަ ދައްކަން ދަސްކޮށްފައިވާ ކަމަށް ވެސް ގޯޑަން ވަނީ ބުނެފަ އެވެ. އެކަން ފާހަގަކޮށް ގޯޑަން ބުނީ ނިއުކާސަލް ޔުނައިޓެޑުގެ ފިޒިއޯގެ ގޮތުގައި މަސައްކަތް ކުރަނީ ސްޕެއިންގެ މީހެއް ކަމަށާއި، ބާސެލޯނާ އަށް ކުޅެން ބޭނުންވާ ވާހަކަ އޭނާ ގާތު ވެސް ބުނަމުން އައި ކަމަށެވެ.

މީގެ އިތުރުން ގޯޑަން ބުނީ އޭނާ ބޭނުން ވަނީ ބާސެލޯނާގައި ކާމިޔާބީ ތަކެއް ހޯދަން ކަމަށާއި، އެ ކުލަބުގައި މޮޅު ކުޅުމެއް ދައްކަން ބޭނުންވާ ކަމަށެވެ. ބާސެލޯނާ އަކީ ވަރުގަދަ ޓީމެއް ކަމަށާއި، ބާސެލޯނާގައި ތިބި ކުޅުންތެރިންނަކީ މޮޅު ބައެއް ކަމަށް ގޯޑަން ބުންޏެވެ. އޭނާ ބުނީ ބާސެލޯނާގައި ޖާޒީގައި މެޗެއް ކުޅުމުގެ ފުރުސަތު ލިބުމަކީ އޭނާގެ ކެރިއަރުގައި ލިބޭނެ އެންމެ ބޮޑު ހިތްހަމަ ޖެހުން ކަމަށެވެ. އެހެންވެ ބާސެލޯނާ އާއެކު ފަށާ ދަތުރަށް ތައްޔާރަށް ހުރި ކަމަށް ގޯޑަން ވަނީ ބުނެފަ އެވެ.

ގޯޑަން ހޯދުމަށްޓަކައި ބާސެލޯނާ އިން އެންމެ ފުރަތަމަ ދެއްކީ 70 މިލިއަން ޔޫރޯ ކަމަށް ބުނެފައިވެ އެވެ. މީގެ އިތުރުން ބާސެލޯނާގައި ގޯޑަން ދައްކާ ކުޅުމާއި، އެ ކުލަބުގައި އޭނާ ހޯދާ ކާމިޔާބީ ތަކަށް ބެލުމަށް ފަހު އިތުރު 10 މިލިއަން ޔޫރޯ ދައްކާނެ ކަމަށް ބުނެފައިވެ އެވެ. އެހެންކަމުން ބާސެލޯނާ އިން ގޯޑަން ހޯދުމަށް ޖުމުލަ 80 މިލިއަން ޔޫރޯ ޚަރަދު ކުރާނެ އެވެ. ސްޕެއިންގެ މީޑިއާ ތަކުގައި ބުނެފައިވާ ގޮތުން، މިއީ މި ފަހުން ކުޅުންތެރިޔަކު ހޯދުމަށް ބާސެލޯނާ އިން ކުރާ އެންމެ ބޮޑު ހޭދަ އެވެ.

ނިއުކާސަލް އާއެކު ހޭދަ ކުރި ހަތަރު ސީޒަންގެ ތެރޭގައި ގޯޑަން ވަނީ އެ ކުލަބަށް ކުޅެދިން 152 މެޗުގައި 39 ލަނޑު ޖަހައިފަ އެވެ. ނިއުކާސަލް އާއެކު އޭނާ ވަނީ ކަރަބޯ ކަޕެއް ވެސް ކާމިޔާބު ކޮށްފަ އެވެ. ބާސެލޯނާ އިން ގޯޑަން ގެނެސްފައިވާއިރު، އޭނާ ހޯދުމަށް ޔޫރަޕުގެ ބައެއް އެހެން ކުލަބު ތަކުން ވެސް ޝަޤުވެރިކަން ގެންގުޅުނު ކަމަށް ރިޕޯޓު ތަކުގައި ވަނީ ބުނެފަ އެވެ.