ބާސެލޯނާ އިން ފުރުސަތު އެބަ އޮތް، ގޮތް ނިންމާނީ އެންމެ ރަނގަޅު ކުލަބެއް ބެލުމަށް ފަހު: ސިލްވާ

ސްޕެއިންގެ ބާސެލޯނާ އިން ފުރުސަތު އެބަ އޮތް ކަމަށާއި، ނަމަވެސް އޭނާ ދެން ބަދަލު ވާނެ ކުލަބެއް ނިންމާނީ އެންމެ ރަނގަޅު ކުލަބެއް ބެލުމަށް ފަހު ކަމަށް ޕޯޗުގަލްގެ ބެނާޑޯ ސިލްވާ ބުނެފި އެވެ. 

އުމުރުން 31 އަހަރުގެ ސިލްވާ ވަނީ ސިޓީ އާއެކު ސޮއި ކޮށްފައިވާ އެއްބަސްވުން ހަމަވުމާ އެކު، އެ ކުލަބު ދޫކޮށްލަން ނިންމައިފަ އެވެ. އެހެންކަމުން ކުރިއަށް އޮތް ސީޒަންގައި އޭނާ ފެނިގެން ދާނީ އެހެން ކުލަބަކުންނެވެ. ސިލްވާ ހޯދުމަށް ގިނަ ކުލަބު ތަކަކުން މަސައްކަތް ކުރަމުން އަންނައިރު، އޭގެ ތެރޭގައި ބާސެލޯނާ ހިމެނޭ ކަމަށް ރިޕޯޓުތައް ބުނެ އެވެ. 

މުސްތަޤުބަލާ ގުޅޭ ގޮތުން ވާހަކަ ދައްކަމުން ސިލްވާ ބުނީ، ބާސެލޯނާ އަކީ އޭނާ އަށް އޮތް ފުރުސަތެއް ކަމަށެވެ. ނަމަވެސް، އަންނަ ސީޒަންގައި ފެންނާނެ ކުލަބަކާ މެދު މިހާތަނަށް ވަކި ނިންމުމެއް ނިންމާފައި ނުވާނެ ކަމަށް ސިލްވާ ބުންޏެވެ. ސިލްވާ ބުނީ އޭނާ ހޯދުމަށް ގިނަ ކުލަބު ތަކަކުން މަސައްކަތް ކުރަމުން އަންނައިރު، ކޮންމެ ކުލަބަކަށް ވެސް އޭނާ އިޙުތިރާމް ކުރާ ކަމަށެވެ. 

މީގެ އިތުރުން ސިލްވާ ބުނީ ކުރިއަށް އޮތް ދުވަސް ތަކުގެ ތެރޭގައި އޭނާ ބަދަލު ވާނެ ކުލަބެއް ނިންމާނެ ކަމަށެވެ. އެގޮތުން އޭނާ އެންމެ ބޮޑަށް ބަލާނީ، އެ ކުލަބަކުން އެންމެ ބޮޑަށް އޭނާ ބޭނުންވާ ކުލަބު ކަމަށާއި، އެ ކުލަބަކުން އޭނާ އަށް އެންމެ ބޮޑު ލޯތްބެއް ލިބޭނީ ކޮން ކުލަބެއްތޯ ކަމަށް ސިލްވާ ވަނީ ބުނެފައި އެވެ. އެކަން ފާހަގަކޮށް ސިލްވާ ބުނީ، ކޮންމެ ކުޅުންތެރިޔަކަށް ވެސް އެ ކުލަބަކުން ލިބޭ ލޯތްބާއި، ޤަދަރު އަދި އިޙުތިރާމް އަކީ ވަރަށް މުހިންމު އެއްޗެއް ކަމަށެވެ. 

މީގެ ކުރިން ވެސް ބާސެލޯނާ އިން ސިލްވާ ހޯދުމަށް މަސައްކަތް ކުރިއިރު، އޭނާ އެ ކުލަބަށް ބަދަލުވާން އުޅޭ ކަމުގެ އަޑު ތަކެއް ވެސް އޮތީ ފެތުރިފައި އެވެ. ނަމަވެސް ސިލްވާ ވަނީ އެ ފަހަރު ސިޓީގައި މަޑު ކުރަން ނިންމައިފަ އެވެ. މިފަހަރު ސިލްވާ ހޯދުމަށް ބާސެލޯނާ އިން މަސައްކަތް ކުރަމުން އަންނައިރު، ސައުދީ ޕްރޯ ލީގުގެ ބައެއް ކުލަބު ތަކުން ވެސް އޭނާ އަށް ޝައުޤުވެރިކަން ފާޅު ކޮށްފައިވާ ކަމަށް ރިޕޯޓުތައް ބުނެ އެވެ. 

މިވަގުތު ސިލްވާ އަންނަނީ ޕޯޗުގަލްގެ ޤައުމީ ޓީމާ އެކު، އެމެރިކާ އާއި ކެނެޑާ އަދި މެކްސިކޯގައި ފަށާ ފީފާ ވޯލްޑް ކަޕަށް ތައްޔާރު ވަމުންނެވެ. އެހެންކަމުން، ސިލްވާގެ މުސްތަޤުބަލާ މެދު އޭނާ ނިންމާ ނިންމުމެއް ހާމަ ކުރާނީ ވޯލްޑް ކަޕަށް ފަހު ކަމަށް ބެލެވެ އެވެ.