ބާސެލޯނާ އިން ގޯޑަން ހޯދުމުގެ ޑީލް ކާމިޔާބު ކޮށްފި

ނިއުކާސަލް ޔުނައިޓެޑަށް ކުޅެމުން އަންނަ ހުނަރުވެރި ފޯވަރޑް އެންތަނީ ގޯޑަން ހޯދުމުގެ ޑީލް ސްޕެއިންގެ ބާސެލޯނާ އިން ކާމިޔާބު ކޮށްފި އެވެ.

އުމުރުން 25 އަހަރުގެ ކުޅުންތެރިޔާ ހޯދުމަށް ބާސެލޯނާ އިން ހުށަހެޅި ރަސްމީ ބިޑު، ނިއުކާސަލްގެ ބޯޑުން ވަނީ ޤަބޫލު ކޮށްފަ އެވެ. މީގެ އިތުރުން ނިއުކާސަލްގެ އޯނަރުން ވެސް މި ހުށަހެޅުން ޤަބޫލު ކޮށްފައިވާ ކަމަށް ރިޕޯޓު ތަކުގައި ވަނީ ބުނެފަ އެވެ. 

ގޯޑަން ހޯދުމަށްޓަކައި ބާސެލޯނާ އިން އެންމެ ފުރަތަމަ ދައްކާނީ 70 މިލިއަން ޔޫރޯ ކަމަށް ބުނެފައިވެ އެވެ. މީގެ އިތުރުން ބާސެލޯނާގައި ގޯޑަން ދައްކާ ކުޅުމާއި، އެ ކުލަބުގައި އޭނާ ހޯދާ ކާމިޔާބީ ތަކަށް ބެލުމަށް ފަހު އިތުރު 10 މިލިއަން ޔޫރޯ ދައްކާނެ ކަމަށް ބުނެފައިވެ އެވެ. އެހެންކަމުން ބާސެލޯނާ އިން ގޯޑަން ހޯދުމަށް ޖުމުލަ 80 މިލިއަން ޔޫރޯ ޚަރަދު ކުރާނެ ކަމަށް ބުނެފައިވެ އެވެ. 

ސްޕެއިންގެ މީޑިއާ ތަކުގައި ބުނެފައިވާ ގޮތުން، މިއީ މި ފަހުން ކުޅުންތެރިޔަކު ހޯދުމަށް ބާސެލޯނާ އިން ކުރާ އެންމެ ބޮޑު ހޭދަ އެވެ. ބާސެލޯނާގެ ޑީލް ފުރިހަމަ ކުރުމަށްޓަކައި ބުރާސްފަތި ދުވަހުގެ ވަގުތެއްގައި ގޯޑަން ބާސެލޯނާ އަށް ދަތުރު ކުރާނެ އެވެ. އަދި ބާސެލޯނާގެ އެއްބަސްވުމުގައި ސޮއި ކުރުމުގެ ކުރިން މެޑިކަލް ޓެސްޓުތައް ފުރިހަމަ ކުރުމަށް ފަހު، ރަސްމީކޮށް އެއްބަސްވުމުގައި ސޮއި ކުރާނެ ކަމަށް ރިޕޯޓު ތަކުގައި ބުނެފަ އެވެ. 

މީޑިއާ ތަކުގައި ބުނެފައިވާ ގޮތުން ބާސެލޯނާ އާއެކު ގޯޑަން ސޮއި ކުރާނީ ފަސް އަހަރު ދުވަހުގެ އެއްބަސްވުމެއްގަ އެވެ. އެހެންކަމުން 2031 ވަނަ އަހަރުގެ ޖޫން މަހުގެ ނިޔަލަށް އޭނާ ބާސެލޯނާގައި ހުންނާނެ އެވެ. ގޯޑަން ވަނީ އެންމެ ފަހުން 2024 ވަނަ އަހަރު ނިއުކާސަލްގެ އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާން އޮތީ ވެސް 2030 ވަނަ އަހަރު އެވެ. ނަމަވެސް، ބާސެލޯނާގެ ހުށަހެޅުމާ އެކު ގޯޑަން ވަނީ އެ ކުލަބަށް ބަދަލުވާން ނިންމައިފަ އެވެ. 

ނިއުކާސަލް އާއެކު ހޭދަ ކުރި ހަތަރު ސީޒަންގެ ތެރޭގައި ގޯޑަން ވަނީ އެ ކުލަބަށް ކުޅެދިން 152 މެޗުގައި 39 ލަނޑު ޖަހައިފަ އެވެ. ނިއުކާސަލް އާއެކު އޭނާ ވަނީ ކަރަބޯ ކަޕެއް ވެސް ކާމިޔާބު ކޮށްފަ އެވެ. ބާސެލޯނާ އިން ގޯޑަން ހޯދުމުގެ ޑީލް ކާމިޔާބު ކޮށްފައިވާއިރު، އޭނާ ހޯދުމަށް ޔޫރަޕުގެ ބައެއް އެހެން ކުލަބު ތަކުން ވެސް ޝަޤުވެރިކަން ގެންގުޅުނު ކަމަށް ރިޕޯޓު ތަކުގައި ވަނީ ބުނެފަ އެވެ.