ލެވަންޑޯސްކީގެ ފަހު މެޗުގައި ލަނޑު ޖެހި ނަމަވެސް، ބާސެލޯނާ ބަލިވެއްޖެ

ސްޕެނިޝް ލީގުގެ ފަހު މެޗުގައި ވެލެންސިއާއާ ދެކޮޅަށް ކުޅެ ބާސެލޯނާ ބަލިވިއިރު، ޕޮލެންޑުގެ ފޯވާޑް ރޮބާޓް ލެވަންޑޯސްކީ ފަހު މެޗުގައި ލަނޑު ޖަހައިފި އެވެ.

ވެލެންސިއާގެ އަމިއްލަ ދަނޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗުގައި އެ ޓީމުން ވަނީ 3-1 އިން ބާސެލޯނާ ބަލިކޮށްފަ އެވެ. މެޗުގައި ބާސެލޯނާ އިން ލަނޑު ޖަހައި ކުރި ހޯދާފައި ވަނިކޮށް، ވެލެންސިއާ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ. އެ މެޗުގެ ކުރިން ބާސެލޯނާ އިން ވަނީ ލީގުގެ ޗެމްޕިއަންކަން ހޯދައިފަ އެވެ.

މެޗުގެ ދެ ވަނަ ހާފުގެ 61 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޕޮލެންޑުގެ ފޯވާޑް ރޮބާޓް ލެވަންޑޯސްކީ އެވެ. މިއީ މި ސީޒަނަށް ފަހު ބާސެލޯނާ ދޫކޮށްލަން ނިންމާފައިވާ ލެވަންޑޯސްކީ އެ ޓީމަށް ކުޅެދިން އެންމެ ފަހު މެޗެވެ. ބާސެލޯނާގެ އެއްބަސްވުން ހަމަވުމުން، ލެވަންޑޯސްކީ އެ ކުލަބު ދޫކޮށްލާނެ އެވެ.

ބާސެލޯނާ އިން ލީޑު ނެގިތާ ފަސް މިނެޓު ފަހުން ވެލެންސިއާ އަށް ނަތީޖާ ހަމަހަމަ ކޮށްދިނީ ހަވީ ގުއެރާ އެވެ. އޭގެ ފަހުން 71 ވަނަ މިނެޓުގައި ލުއިސް ރިއޯޖާ ވަނީ ވެލެންސިއާގެ ދެ ވަނަ ލަނޑު ޖަހައި ލީޑު ނަގައިފަ އެވެ. އަދި މެޗުގައި ވެލެންސިއާގެ ތިން ވަނަ ލަނޑު ޖަހައި ލީޑު ފުޅާ ކޮށްދިނީ ގުއިޑޯ ރޮޑްރިގޭޒް އެވެ.

މި ސީޒަންގެ ސްްޕެނިޝް ލީގުގައި ބާސެލޯނާ އިން 38 މެޗު ކުޅެފައިވާއިރު، ހަ މެޗުން މި ވަނީ ބަލިވެފަ އެވެ. އެއް މެޗު އެއްވަރުވެފައިވާއިރު، 31 މެޗުން ވަނީ މޮޅުވެފަ އެވެ. އެއް ވަނައިގައި ބާސެލޯނާ އޮތީ 94 ޕޮއިންޓާ އެކު އެވެ.