އެއްބަސްވުން ހަމަވުމުން ބާސެލޯނާ ދޫކޮށްލަން ލެވަންޑޯސްކީ ނިންމައިފި

ސްޕެއިންގެ ބާސެލޯނާ އަށް ކުޅެމުން އަންނަ ޕޮލެންޑުގެ ފޯވާޑު ރޮބާޓް ލެވަންޑޯސްކީ އެ ކުލަބު ދޫކޮށްލަން ނިންމައިފި އެވެ.

އުމުރުން 37 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ 2022 ވަނަ އަހަރު އެވެ. ޖަރުމަނުގެ ބަޔާން މިއުނިކް ދޫކޮށްލުމަށް ފަހު އޭނާ ބާސެލޯނާ އަށް ބަަދަލުވީ ހަތަރު އަހަރުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ އަންނަ ޖޫން މަހުގެ ނިޔަލަށެވެ. އެއްބަސްވުމުގެ މުއްދަތު ހަަމަވުމުން، ހިލޭ ޓްރާންސްފާއެއްގައި ބާސެލޯނާ ދޫކޮށްލަން ނިންމާފައިވާކަން ލެވަންޑޯސްކީ ވަނީ އިއުލާން ކޮށްފަ އެވެ.

ބާސެލޯނާ ދޫކޮށްލަން ނިންމާފައިވާކަން އިއުލާާން ކުރަމުން ލެވަންޑޯސްކީ ބުނީ، ހަތަރު އަހަރު ދުވަހުގެ ބުރަ މަސައްކަތާއި، އެތައް ގޮން ޖެހުން ތަކަށް ފަހު ބަދަލުވުމުގެ ވަގުތު ޖެހިފައިވާ ކަމަށެވެ. ބާސެލޯނާ ދޫކޮށްލާއިރު، އޭނާ އަށް ކުރެވޭ އިޙުސާސް އަކީ "މިޝަން" ކާމިިޔާބުވެފައިވާ ކަމުގެ އިޙުސާސް ކަަމަށް ވެސް ލެވަންޑޯސްކީ ބުންޏެވެ.

ބާސެލޯނާގައި ހޭދަކުރި ހަތަރު ސީޒަންގެ ތެރޭގައި ތިން ފަހަރު ސްޕެނިޝް ލީގު ކާމިޔާބު ކުރެވިފައިވާ ކަމަށާއި، ބާސެލޯނާގެ ސަޕޯޓަރުންގެ ފަރާތުން އެންމެ ފުރަތަމަ ދުވަހުން ފެށިގެން ވެސް ލިބުނު ލޯތްބާއި ސަޕޯޓު ހަނދާން ނުނެތޭނެ ކަމަށް ލެވަންޑޯސްކީ ބުންޏެވެ. ލެވަންޑޯސްކީ ވަނީ ފާއިތުވި ހަތަރު އަހަރުގެ ތެރޭގައި އޭނާ އަށް އެހީތެރިވި އެންމެހާ ފަރާތް ތަކަށް ޝުކުރު އަދާ ކޮށްފަ އެވެ. ބާސެލޯނާ އަކީ އޭނާގެ ކެރިއަރުގެ "މުޅިން ތަފާތު" ޗެޕްޓަރެއްކަން ފާހަގަކޮށް ލެވަންޑޯސްކީ ވަނީ، ބާސެލޯނާގެ ރައީސް ޖޯން ލަޕޯޓާ އަށް ޝުކުރު އަދާ ކޮށްފަ އެވެ.

ބާސެލޯނާގައި ހޭދަ ކުރި ހަތަރު އަހަރުގެ ތެރޭގައި ލެވަންޑޯސްކީ ވަނީ މިހާތަނަށް އެ ކުލަބަށް ކުޅެދިން 191 މެޗުގައި 119 ލަނޑު ޖަހައިފަ އެވެ. ބާސެލޯނާ އާއެކު އޭނާ ވަނީ ހަތް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު ތިން ފަހަރު ކާމިޔާބު ކުރުމުގެ އިތުރުން، ސްޕެނިޝް ސުޕަ ކަޕް ތިން ފަހަރު އަދި ކޮޕާ ޑެލް ރޭ އެއް ފަހަރު ކާމިޔާބު ކުރުން ހިމެނެ އެވެ. 

ބާސެލޯނާ ދޫކޮށްލަން ނިންމި ނަމަވެސް، ދެން އޭނާ ބަދަލުވާނެ ކުލަބެއް ލެވަންޑޯސްކީ ހާމަ ކޮށްފައި ނުވެ އެވެ. މީޑިއާ ތަކުގައި ބުނާ ގޮތުން ޔޫރަޕުގެ ކުލަބު ތަކުގެ އިތުރުން، ސައުދީ ޕްރޯ ލީގުގެ ކުލަބު ތަކުން ވެސް އަންނަނީ ލެވަންޑޯސްކީ އަށް ފާރަލަމުންނެވެ.