ޓްރަމްޕް ބޭނުންވަނީ އދ.ގެ ސެކްރެޓަރީ ޖެނަރަލަށް އިންފަންޓީނޯ ގެންނަވަން

އދ.ގެ ކުރިއަށް އޮތް ދައުރުގެ ސެކްރެޓަރީ ޖެނަރަލްގެ މަގާމަށް ފީފާގެ ރައީސް ޖިއާނީ އިންފަންޓީނޯ ގެންނަވަން އެމެރިކާގެ ރައީސް ޑޮނަލްޑް ޓްރަމްޕް ބޭނުންވާކަން ހާމަވެއްޖެ އެވެ. 

އދ.ގެ މިހާރުގެ ސެކްރެޓަރީ ޖެނަރަލްގެ މަގާމުގައި ހުންނެވި އެންޓޯނިއޯ ގުޓަރޭސްގެ ދައުރު މިއަހަރުގެ ޑިސެމްބަރު މަހު ހަމަވާއިރު، އެމެރިކާގެ ނިއު ޔޯކް ޕޯސްޓް އިން ބުނެފައި ވަނީ ޓްރަމްޕް ބޭނުން ވަނީ އެ މަގާމަށް އިންފަންޓީނޯ ގެންނަވާށެވެ. 

އުމުރުން 56 އަހަރުގެ އިންފަންޓީނޯއާ ޓްރަމްޕްއާ ދެމެދު ގާތް ގުޅުމެއް އުފެދުނީ މިއަހަރު އެމެރިކާގައި ބޭއްވި ވޯލްޑް ކަޕް އިންތިޒާމު ކުރުމުގެ ތެރެއިންނެވެ. މި ގުޅުމުގެ ތެރެއިން ފީފާ އިން އަލަށް ތައާރަފުކުރި "ޕީސް ޕްރައިޒް" ނުވަތަ ސުލްހައިގެ އިނާމު ވެސް މިދިޔަ ޑިސެމްބަރު މަހު ވަނީ ޓްރަމްޕް އަށް އަރުވާފައި އެވެ. ޓްރަމްޕްގެ އަރިސް މަސްދަރަކުން ބުނި ގޮތުގައި، އިންފަންޓީނޯ އަކީ މުޅި ދުނިޔޭގެ އިހުތިރާމް ލިބިފައިވާ، މީހުން އެއްބައިވަންތަ ކުރުމުގެ ހާއްސަ ގާބިލުކަމެއް ހުރި ބޭފުޅެއް ކަމަށް ޓްރަމްޕް ގަބޫލުފުޅު ކުރައްވަ އެވެ.

އދ.ގެ ސެކްރެޓަރީ ޖެނެރަލްގެ މަގާމަށް އިންފަންޓީނޯ އައްޔަންކުރުމަށްޓަކައި ސަލާމަތީ މަޖިލީހުގެ 15 މެންބަރުންގެ ތާއީދު ބޭނުންވާނެ އެވެ. މީގެ ތެރޭގައި ވީޓޯ ކުރުމުގެ ބާރު ލިބިފައިވާ ފަސް ގައުމު ހިމެނޭއިރު، އެއަށް ފަހު އާންމު މަޖިލީހުން އެ ނިންމުން ފާސް ކުރަން ޖެހޭނެ އެވެ. މި މަގާމަށް މިހާރު ކުރިމަތިލާފައިވާ ހަތް ކެންޑިޑޭޓުންނަކީ އެހާ ވަރުގަދަ ބައެއް ނޫން ކަމަށް ޓްރަމްޕްގެ ސަރުކާރުން ދެކެ އެވެ.

އޭގެ ތެރޭގައި ހިމެނޭ ޗިލީގެ ކުރީގެ ރައީސް މިޝޭލް ބެޗެލެޓް އަށް އެމެރިކާގެ ދެކޮޅުވެރިކަން އޮތްއިރު، އާޖެންޓީނާގެ ރަފައެލް ގްރޮސީ އަށް ފޯކްލޭންޑް އައިލެންޑްސްގެ މައްސަލައިގައި އިނގިރޭސިވިލާތުގެ ދެކޮޅުވެރިކަން ކުރިމަތިވެދާނެ ކަމަށް ބެލެވެ އެވެ.

ޓްރަމްޕްގެ މި ވިސްނުންފުޅުގެ ސަބަބުން، ލެޓިން އެމެރިކާ ނުވަތަ ކެރީބިއަން ސަރަހައްދުގެ ބޭފުޅަކަށް މިފަހަރު ފުރުސަތު ދިނުމަށް އޮތް ނުރަސްމީ އުސޫލަށް ބަދަލު އަންނާނެ އެވެ. ނަމަވެސް ޓްރަމްޕްގެ ގްލޯބަލް ޕާޓްނާޝިޕް އެންވޯއީ ޕައޮލޯ ޒަމްޕޮލީ ވިދާޅުވީ، އިންފަންޓީނޯ އަކީ 193 ގައުމު ހިމެނޭ އދ. ހިންގޭނެ ފަދަ ތަޖުރިބާކާރެއް ކަމަށެވެ. ފީފާގެ 200 އަށްވުރެ ގިނަ މެންބަރު ގައުމު އިންފަންޓީނޯ މެނޭޖުކުރައްވާ ގޮތުން އެކަން ސާބިތުވާ ކަމަށް އޭނާ ވިދާޅުވި އެވެ.

އދ. އިން ދުނިޔޭގެ ބޮޑެތި ހަމަނުޖެހުންތައް ހައްލު ކުރުމުގައި އެކަށީގެންވާ މަސައްކަތެއް ނުކުރާ ކަމަށް ވިދާޅުވެ، ޓްރަމްޕް ވަނީ މީގެ ކުރިން ވަރަށް ބޮޑަށް ފާޑު ވިދާޅުވެފައި އެވެ. އަދި އެމެރިކާގެ ވެރިކަމާ އަލުން ހަވާލުވެ ވަޑައިގަތުމަށް ފަހު އދ. އަށް އެމެރިކާ އިން ދޭ އެހީތައް ކަނޑާލައި، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވެސް އެމެރިކާ ވަނީ ވަކިވެފައި އެވެ. އެހެންކަމުން އިންފަންޓީނޯ ފަދަ ބޭފުޅަކު އެ މަގާމަށް ވަޑައިގެންނެވުމަކީ އދ. އާއި ޓްރަމްޕްގެ ސަރުކާރާ ދެމެދު އޮތް ގުޅުން ރަނގަޅު ވެދާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ދެކެ އެވެ.

މި މަގާމަށް އިންފަންޓީނޯ ވަޑައިގެންފި ނަމަ، އޭނާގެ އާމްދަނީ އަށް ބޮޑު ބަދަލެއް އަންނާނެ އެވެ. ފީފާގެ ރައީސްގެ ގޮތުގައި އޭނާ އަށް އަހަރަކު ހަ މިލިއަން އެމެރިކާ ޑޮލަރު ލިބޭއިރު، އދ. ގެ ސެކްރެޓަރީ ޖެނެރަލްގެ މުސާރަ އަކީ އަހަރަކު ގާތް ގަނޑަކަށް 418،000 ޑޮލަރެވެ.

އިންފަންޓީނޯ ވަނީ ފީފާގެ ކުރިއަށް އޮތް ދައުރުގައި ވެސް ވާދަ ކުރައްވާނެކަން ރަސްމީކޮށް އިއުލާން ކުރައްވައިފަ އެވެ. އދ.ގެ ސެކްރެޓަރީ ޖެނަރަލްގެ މަގާމާ ގުޅޭ ގޮތުން މިހާތަނަށް އިންފަންޓީނޯ ވަކި އެއްޗެއް ވިދާޅުވެފައި ނުވެ އެވެ.