ޓްރަމްޕްގެ ނުފޫޒުގައި ޖެހިފައިވާ ކަމަށް ބުނެ، އިންފަންޓީނޯގެ މައްސަލަ އޯއައިސީ އަށް ހުށަހަޅަނީ

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯގެ މައްސަލަ، އިންޓަނޭޝަނަލް އޮލިމްޕިކް ކޮމެޓީ (އޯއައިސީ) އަށް ހުށަހަޅަން ނިންމާފައިވާ ކަމަށް އިންސާނީ ހައްގު ތަކަށް މަސައްކަތް ކުރާ ޖަމިއްޔާ އަކުން ހާމަކޮށްފި އެވެ. 

ފެއާސްކުއާ ނަމަކަށް ކިޔާ މި ޖަމިއްޔާ އިން އިންފަންޓީނޯގެ މައްސަލަ ހުށަހަޅަން ނިންމާފައި ވަނީ، އެމެރިކާގެ ރައީސް ޑޮނަލްޑް ޓްރަމްޕްއާ ދެމެދު އޮތް ގުޅުމުގެ ސަބަބުން ވަކި ފަރާތަކަށް ނުޖެހުމުގެ ޤަވާއިދާ ޚިލާފުވެފައިވާ ކަމަށް ބުނެ އެވެ. އެ ޖަމިއްޔާ އިން ބުނެފައި ވަނީ ތަކުރާރުކޮށް އިންފަންޓީނޯ އެކަމާ ޚިލާފުވެފައިވާ ކަމަށާއި، އެހެންވެ އެ މައްސަލަ ހުށަހަޅަން ނިންމީ ކަމަށެވެ. 

އިންފަންޓީނޯ އަކީ 2020 ވަނަ އަހަރުން ފެށިގެން އޯއައިސީގެ މެމްބަރެކެވެ. 

ފެއާސްކުއާ އިން 2025 ވަނަ އަހަރުގެ ޑިސެމްބަރު މަހުގެ ތެރޭގައި ފީފާގެ އެތިކްސް ކޮމެޓީ އަށް ހުށަހެޅި ޝަކުވާއެއްގައި ބުނެފައި ވަނީ، ޓްރަމްޕްގެ އަމަލުތަކާއި، ސިޔާސަތު ތަކަށް އެކި ފަހަރު މަތިން އިންފަންޓީނޯ ތާއީދު ކުރައްވާފައިވާ ކަމަށެވެ. އަދި އެކަމާ ގުޅޭ މިސާލުތައް ވެސް އެ ޖަމިއްޔާ އިން ވަނީ ޝަކުވާގައި ހިމަނައިފަ އެވެ. 

ހަމަ އެހެންމެ، ފީފާ އިން މުޅިން އަލަށް ސުލްޙައިގެ އިނާމެއް ތައާރަފުކޮށް، އެ އިނާމު ޓްރަމްޕް އަށް ދެއްވާފައިވާއިރު، އެކަމުގައި އިންފަންޓީނޯގެ ދައުރު ތަހުގީގު ކޮށްދިނުމަށް ވެސް ވަނީ އެދިފައި އެވެ. ފީފާ އިން ޓްރަމްޕް އަަށް އެރުވި ސުލްޙައިގެ އެވޯޑުގެ ސަބަބުން، އިންފަންޓީނޯ އަދި ފީފާ އަށް ގިނަ ފާޑު ކިޔުން ތަކެއް އަމާޒުވެގެން ދިޔަ އެވެ. 

ފެއާސްކުއާގެ ޝަކުވާފައި ބުނެފައި ވަނީ، ފީފާގެ އެތިކްސް ކޯޑުގެ 15 ވަނަ މާއްދާއާ އިންފަންޓީނޯ ޚިލާފުވެފައިވާ ކަމަށެވެ. އެ މާއްދާގައި ބުނެފައި ވަނީ ސިޔާސީ ގޮތުން ވަކި ފަރާތަކަށް ޖެހިގެން ނުވާނެ ކަމަށެވެ. މި ކޯޑުގެ ދަށުން، އެކަމާ ގުޅުންހުރި މީހުން ވަކި ފަރާތަކަށް ނުޖެހި ތިބުމަކީ މަޖުބޫރު ކޮށްފައިވާ ކަމެކެވެ. އެ ޤަވާއިދާ ޚިލާފު ވެއްޖެ ނަމަ، އެ ފަރާތެއް އެންމެ މަދުވެގެން 10،000 ސްވިސް ފްރޭންކް، ނުވަތަ 12،000 އެމެރިކާ ޑޮލަަރުން ޖޫރިމަނާ ކުރުމާާ އެކު، ފުޓުބޯޅައާ ގުޅުން ހުރި ހުރިހާ ހަރަކާތަކުން ދެ އަހަރު ވަންދެން މަނާ ކުރެވޭނެ އެވެ. 

އައިއޯސީގެ ރައީސް ކާސްޓީ ކޮވެންޓްރީ އަންގާރަ ދުވަހު ވިދާޅުވެފައި ވަނީ، އެތިކްސް ކޮމެޓީ އަށް އެއްވެސް ޝަކުވާއެއް ލިބިފައި ނުވާ ކަމަށެވެ. ނަމަވެސް، އެ ކޮމެޓީ އަށް އެއްވެސް ކަހަލަ ޝަކުވާއެއް ލިބިއްޖެ ނަމަ، އެކަން ބަލާނެ ކަމަށް ވެސް ވިދާޅުވެފައިވެ އެވެ. 

ފީފާގެ އިންވެސްޓިގޭޓަރީ ޗެމްބަރުގެ އިދާރާ އިން ޑިސެމްބަރު މަހު ޝަކުވާ ލިބިފައިވާ ކަަމަށް އެއްބަސްވެފައިވާއިރު، ތަހުގީގު ފަށާފައިވާ ކަމުގެ އެއްވެސް އިޝާރާތެއް ދީފައި ނުވާ ކަމަށް ފެއާސްކުއާ އިން ބުނެފައިވެ އެވެ. 

ފެއާސްކުއާ އިން ވަނީ ވޯލްޑް ކަޕްގެ ފެށުމުގެ ހަފުތާއެއް ކުރިން ފީފާ އަށް ސީރިއަސް އިސްލާޙު ތަކެއް ގެންނަން ޖެހޭ ކަމަށް ގޮވާލައި، ޚާއްސަ ކެމްޕެއިނެއް ވެސް ފަށައިފަ އެވެ.