ވޯލްޑް ކަޕް ފައިނަލް މެޗު ނިމުމާއެކު އާޖެންޓިނާގެ ޓީމުން ދަނޑުމަތީގައި މާރާމާރީ ހިންގި މައްސަލަ ތަހުގީގު ކުރަން ފީފާ އިން ޕްރޮސެކިއުޓަރަކު އައްޔަނު ކޮށްފި

ވޯލްޑް ކަޕް ފައިނަލް މެޗު ނިމުމާއެކު އާޖެންޓިނާގެ ޓީމުން ދަނޑުމަތީގައި މާރާމާރީ ހިންގާ ދެއްކި ހުތުރު މަންޒަރުތަކުގެ މައްސަލަ ތަހުގީގު ކުރާނެކަން ފީފާއިން ކަށަވަރުކޮށްދީފި އެވެ.

ފީފާގެ ޑިސިޕްލިނަރީ ކޮމިޓީން ވަނީ، މެޓްލައިފް ސްޓޭޑިއަމްގައި ކުޅުނު ފައިނަލް މެޗުގެ ފަހު ފުމެލުމަށްފަހު ހިނގާދިޔަ ކަންތައްތައް ބެލުމަށްޓަކައި ޑިސިޕްލިނަރީ އެންޑް އެތިކްސް ޕްރޮސެކިއުޓަރަކު އައްޔަންކޮށްފަ އެވެ.

މި ހަމަނުޖެހުމުގައި ބައިވެރިވި ކޮންމެ ކުޅުންތެރިއަކަށް ނުވަތަ ކޯޗަކަށް ސަސްޕެންޝަނެއް އަތުވެދާނެ ކަމަށް ބެލެވޭއިރު، އާޖެންޓީނާގެ ފުޓްބޯޅަ އެސޯސިއޭޝަން (އޭއެފްއޭ) ޖޫރިމަނާ ކުރުމަކީވެސް އެކަށީގެންވާ ކަމެކެވެ.

އާދީއްތަ ދުވަހު ކުޅުނު ފައިނަލް މެޗުން 1-0 އިން ބަލިވުމާ ގުޅިގެން، އާޖެންޓީނާގެ ބައެއް ކުޅުންތެރިންނާއި އޮފިޝަލުން ވަނީ، ވޯލްޑް ކަޕް ކާމިޔާބީ ފާހަގަކުރަމުންދިޔަ ސްޕެއިންގެ ކުޅުންތެރިންނާ ކުރިމަތިލައި ހަމަނުޖެހުން ހިންގާފަ އެވެ.

މި ހަމަނުޖެހުމުގައި ނަހުއެލް މޮލީނާ، ލިއަންޑްރޯ ޕަރޭޑޭސް، ތިއާގޯ އަލްމާޑާ އަދި އެސިސްޓަންޓް ކޯޗު ރޮބާޓޯ އަޔާލާ ބައިވެރިވި މަންޒަރު ފެނިފައިވެ އެވެ.

ސްޕެއިންގެ އެރިކް ގާސިއާގެ ކަރުގައި ހިފައި ކޮއްޕާލުމާ ގުޅިގެން، ރެފްރީ ސުލާވްކޯ ވިންޗިޗް ޕަރޭޑޭސްއަށް ރަތް ކާޑު ދެއްކި ކަމަށް ފީފާއިން ފުރަތަމަ ރިޕޯޓުކުރި އެވެ.

ނަމަވެސް، އޭގެ ކުޑައިރުކޮޅެއް ފަހުން ޕަރޭޑޭސްގެ ރަތް ކާޑު ރެކޯޑުން އުނިކޮށްފައިވާއިރު، އެ ވަގުތު އެއްވެސް ޑިސިޕްލިނަރީ ފިޔަވަޅެއް އަޅާފައިނުވާކަން ފީފާއިން ވަނީ ބީބީސީ ސްޕޯޓްސްއަށް ކަށަވަރުކޮށްދީފަ އެވެ.

މެޗުގެ ދެވަނަ ހާފުގެ އިތުރު ވަގުތުގެ ތެރޭގައި އެންޒޯ ފެނާންޑޭޒަށް ދެވަނަ ރީނދޫ ކާޑަކާއެކު ރަތް ކާޑު ދެއްކުމުން، އާޖެންޓީނާ އޮތީ އެއް ކުޅުންތެރިއަކު މަދުކޮށެވެ.

މީގެ އިތުރުން، ސެމީ ފައިނަލްގައި އިންގްލެންޑް އަތުން 2-1 އިން މޮޅުވި މެޗަށްފަހު، ފޯކްލޭންޑް އައިލެންޑްސްއަކީ އާޖެންޓީނާގެ ތަނެއް ކަމަށް ބުނެ ކުޅުންތެރިން ބެނާއެއް ހިފެހެއްޓި މައްސަލައިގައިވެސް ފީފާއިން ވަނީ ފިޔަވަޅު އެޅުމުގެ މަސައްކަތް ފަށާފަ އެވެ.

ވޯލްޑް ކަޕް ފައިނަލަށްފަހު ހިނގީ ކޮން ކަމެއް؟

ނިއު ޖާޒީގައި ކުޅުނު މި މެޗުގެ ކަށިގަނޑުގެ ފަހު ފުމެލުމާއެކު، ލިއޮނަލް މެސީ ހިމެނޭހެން އާޖެންޓީނާގެ ބައެއް ކުޅުންތެރިން ދަނޑުމައްޗަށް ތިރިވި އެވެ.

ސްޕެއިންގެ ކުޅުންތެރިން އުފާފާޅުކުރަމުން ދަނޑުމަތީގައި ދުވަމުންދިޔައިރު، އާޖެންޓީނާގެ ބައެއް ކުޅުންތެރިން ހަރަކާތެއް ނެތި ބަލަން ތިއްބެވެ.

އިތުރު ވަގުތުގެ ތެރޭގައި ބަދަލުކުރި ރޮޑްރީ، އޭނާގެ ޓީމުގެ ކުޅުންތެރިންނާ ބައިވެރިވުމަށް ބެންޗުން ދުވެފައި ދިޔަ އެވެ.

މެންޗެސްޓަރ ސިޓީގެ މި މިޑްފީލްޑަރު މޮލީނާގެ ކައިރިން ދިޔަ ވަގުތު، އާޖެންޓީނާގެ ޑިފެންޑަރު މޮލީނާ، ރޮޑްރީގެ އަތުގައި ނުވަތަ ބަނޑުގައި މުށްކަވައި ޖެހި މަންޒަރު ފެނިފައިވެ އެވެ.

މިއީ މުޅި ހަމަނުޖެހުން ފެށުމަށް މެދުވެރިވި ސަބަބެވެ.

ރޮޑްރީ މޮލީނާއާ ކުރިމަތިލުމާއެކު، އާޖެންޓީނާގެ ކުޅުންތެރިޔާ ވަނީ ވަރަށް ބޮޑަށް ރުޅިވެރިކަން އިސްކޮށް ކުރިއަށް ޖެހިފަ އެވެ.

ގާސިއާ އޭނާގެ ޓީމުގެ ކުޅުންތެރިޔާގެ ދިފާއުގައި ދުވެފައި އައި ވަގުތު، ޕަރޭޑޭސް މީގެ ތެރެއަށް ވަދެ ގާސިއާގެ ކަރުގައި އަތުން ޖެހި އެވެ.

މެޗުގައި ނުކުޅެ ބެންޗުގައި އިން ގަވީ މިކަން ހުއްޓުވަން އުޅުމުން، އަލްމާޑާ ވަނީ އޭނާ ބިންމައްޗަށް ވައްޓާލާފަ އެވެ.

އޭގެ ފަހުން ޕަރޭޑޭސް ވަނީ ގަވީގެ މޫނުގައި އަތްއަޅައި ކޮއްޕާލައި ބިންމައްޗަށް ވައްޓާލާފަ އެވެ.

ދެން ފެނުނީ އަޔާލާ، ގާސިއާގެ ކަރުގައި ހިފަހައިގެން ހުރި މަންޒަރެވެ. އަދި އޭނާ ސްޕެއިންގެ މިޑްފީލްޑަރު ޑެނީ އޮލްމޯގެ ގައިގައި ޖެހި މަންޒަރުވެސް ފެނިފައިވެ އެވެ.

"ޕަރޭޑޭސް މީހެއްގެ މޫނަށް ދެތިން ފަހަރު ވަރަށް ބާރަށް ހަމަލާދިން. އޭނާ ދިޔައީ އެމީހުންނާ ދިމާލަށް،" ބީބީސީގެ ކަވަރޭޖްގައި އެލަން ޝިއަރާ ބުންޏެވެ. "މިއީ ފުޓްބޯޅައިގައި ޖާގަ އޮތް ކަންކަމެއް ނޫން."

"މިއީ އެމީހުންނަށް ކިހާ މުހިންމު މެޗެއްކަން އަހަރެމެންނަށް އެނގޭ، އަދި ބަލިވުމުން ވާނެ ތަދުވެސް އެނގޭ. އެކަމަކު ބަލިވުމުގައިވެސް ގޮތްތަކެއް ހުންނަންވާނެ. އާޖެންޓީނާގެ ފަރާތުން މިކަހަލަ ކަންކަން މާ ގިނައިން ފެނިއްޖެ. މެޗު ނިމުމުން އެމީހުން އަމަލުކުރި ގޮތް ވަރަށް ގޯސް."

ޖޯ ހާޓް އިތުރަށް ބުނި ގޮތުގައި: "މެޗު ނިމިއްޖެ، މިއަދު ހިނގި ކަންތައްތަކާ މެދު އެމީހުންނަށް ޝަކުވާ ކުރެވޭނެ އެއްވެސް ޖާގައެއް ނެތް. މިއީ ވަރަށް ހަޑިހުތުރު އަމަލުތަކެއް."

ނަމަވެސް، މަސްލަހަތު ފިނިކުރަން މަސައްކަތް ކުރި އާޖެންޓީނާގެ ކޯޗު ލިއޮނަލް ސްކަލޯނީ، މެޗަށްފަހު ދިން އިންޓަވިއުގައި މި ހާދިސާތަކުގެ ސީރިއަސްކަން ކުޑަކޮށްލާފަ އެވެ.

"މޮޅުވާއިރުވެސް އަހަރެމެން އަޚްލާގު ހިފަހައްޓަން، އަދި ބަލިވާއިރުވެސް އެކަން އެގޮތަށް އޮންނަންވާނެ،" އޭނާ ބުންޏެވެ. "މިއަދު އަހަރެމެން މި ދައްކައިދެނީ ބަލިވާން އެނގޭކަން."

"އަހަރެމެން މެޗުން ބަލިވެއްޖެ، އެކަން ގަބޫލުވެސް ކުރަން. އެކަމަކު އޭގެ މާނައަކީ ދިރިއުޅުން ހުއްޓުނީއެއް ނޫން، ނޫނީ މި ހިސާބަށް އައުމަށް ކުރި މަސައްކަތް ހަނދާން ނައްތާލީއެއްވެސް ނޫން."

އާޖެންޓީނާއަށް ކުރިމަތިވެދާނެ ފިޔަވަޅަކީ ކޮބައި؟

ފީފާގެ ޑިސިޕްލިނަރީ ކޮމިޓީއަށް އެޅިދާނެ ގިނަ ފިޔަވަޅުތަކެއް އެބަހުއްޓެވެ.

ޑިސިޕްލިނަރީ އެންޑް އެތިކްސް ޕްރޮސެކިއުޓަރަކު އައްޔަންކުރުމުން، ފީފާއިން ބަލާނީ ހަމައެކަނި އަނިޔާވެރި އަމަލުތަކެއް ނޫނެވެ. އޭގެ ބަދަލުގައި ހިންގާފައިވާ ކުށްތަކަށް ފުންކޮށް ބަލާނެ އެވެ.

ކުޅުންތެރިން ނުވަތަ ގައުމީ އެސޯސިއޭޝަންގެ މައްޗަށް ކުށް ސާބިތުވެއްޖެނަމަ، ހަރުކަށި އަދަބެއް ލިބުމުގެ ފުރުސަތު ބޮޑެވެ.

ޑިސިޕްލިނަރީ ކޯޑުގެ 13 ވަނަ މާއްދާގައި ބަޔާންކޮށްފައިވަނީ ބޭއަދަބީ އަމަލުތަކާއި ފެއަރ ޕްލޭގެ އުސޫލުތަކާ ބެހޭގޮތުންނެވެ.

ކުޅުންތެރިންނާއި އޮފިޝަލުންގެ އަމަލުތަކަކީ "އަޚްލާގީ މިންގަނޑުތަކާ ޚިލާފުވުން" އަދި "ފުޓްބޯޅަ ނުވަތަ ފީފާގެ އަގުވެއްޓޭ ފަދަ ގޮތަކަށް އަމަލުކުރުން" ކަމަށް ނިންމިދާނެ އެވެ.

ޑިސިޕްލިނަރީ އެންޑް އެތިކްސް ޕްރޮސެކިއުޓަރު، ކަންތައްތައް ގޯސްވާން މެދުވެރިވި ސަބަބުތަކަށާއި ލުއިދެވިދާނެ ހާލަތްތަކަށް ބަލާނެ އެވެ. އަދި މުޅި ދުނިޔޭގެ ފެންވަރުގެ ސަސްޕެންޝަނެއް ދިނުމުގެ ބާރުވެސް އެ ފަރާތަށް ލިބިގެންވެ އެވެ.

2014 ވަނަ އަހަރުގެ ވޯލްޑް ކަޕްގައި އިޓަލީގެ ޑިފެންޑަރު ޖޯޖިއޯ ކިއެލީނީގެ ގައިގައި ދަތް އެޅި މައްސަލައިގައި އުރުގުއޭގެ ފޯވާޑް ލުއިސް ސުއަރޭޒް ވަނީ ހަތަރު މަސް ދުވަހަށް ފުޓްބޯޅައިން ސަސްޕެންޑް ކޮށްފަ އެވެ.

މީގެ ސަބަބުން ލިވަޕޫލަށް ކުޅެމުންދިޔަ ސުއަރޭޒަށް ޕްރިމިއާ ލީގުގެ ފުރަތަމަ ނުވަ މެޗު ގެއްލުނެވެ.

ނަމަވެސް، އަލްމާޑާ، އަޔާލާ، މޮލީނާ އަދި ޕަރޭޑޭސްއަށް މިހާ ދިގު މުއްދަތުގެ ސަސްޕެންޝަނެއް އައުމަކީ ނާދިރު ކަމެކެވެ.

އެހެންނަމަވެސް، އޭއެފްއޭއަށް ވަނީ ފާއިތުވި އަހަރުތަކުގައި ކުޅުންތެރިންގެ އަޚްލާގީ މައްސަލަތަކާ ކުރިމަތިލާން ޖެހިފަ އެވެ.

2022 ވަނަ އަހަރުގެ ވޯލްޑް ކަޕް ފައިނަލަށްފަހުވެސް، "ބޭއަދަބީ އަމަލުތަކާއި ފެއަރ ޕްލޭގެ އުސޫލުތަކާ ޚިލާފުވުން" އަދި "ކުޅުންތެރިންނާއި އޮފިޝަލުންގެ ނުރަނގަޅު ސުލޫކު"ގެ ދައުވާ އާޖެންޓީނާގެ މައްޗަށް ކުރެވުނެވެ.

ޕެނަލްޓީ ޖަހައިގެން ފްރާންސް ބަލިކޮށް އާޖެންޓީނާ މޮޅުވި ނަމަވެސް، އުފާފާޅުކުރި ގޮތުގެ ސަބަބުން އެމީހުންނަށް ބޮޑެތި ފާޑުކިޔުންތަކެއް އަމާޒުވި އެވެ.

އެގޮތުން އެސްޓަން ވިލާގެ ގޯލްކީޕަރު އެމިލިއާނޯ މާޓިނޭޒް، މުބާރާތުގެ މޮޅު ކީޕަރުގެ އެވޯޑާއެކު ހުތުރު ހަރަކާތެއް ދެއްކުމާއި، ޑްރެސިން ރޫމްގައި ފްރާންސްގެ ތަރި ކީލިއަން އެމްބާޕޭއަށް މަލާމާތްކުރި މަންޒަރު ފެނިފައިވެ އެވެ.

އެ ފަހަރު އާޖެންޓީނާ 18,300 ޕައުންޑުން ޖޫރިމަނާ ކުރި ނަމަވެސް، އެއްވެސް ކުޅުންތެރިއަކަށް ފިޔަވަޅެއް ނާޅަ އެވެ.

އެކަމަކު، 2024 ވަނަ އަހަރު ޗިލީ އަދި ކޮލަމްބިއާއާ ދެކޮޅަށް ކުޅުނު ވޯލްޑް ކަޕް ކޮލިފައިން މެޗުތަކުގައި ހިންގި "ބޭއަދަބީ އަމަލުތަކަކާ" ގުޅިގެން މާޓިނޭޒް ދެ މެޗަށް ސަސްޕެންޑް ކުރި އެވެ.

ޗިލީ އަތުން 3-0 އިން މޮޅުވި މެޗަށްފަހު، ކޮޕާ އެމެރިކާ ތަށީގެ ރެޕްލިކާއެއް ބޭނުންކޮށްގެން މާޓިނޭޒް ވަނީ އޭނާގެ ކުރީގެ ހުތުރު ހަރަކާތް ތަކުރާރުކޮށްފަ އެވެ. އަދި އޭގެ ހަތަރު ދުވަސް ފަހުން ކޮލަމްބިއާ އަތުން 2-1 އިން ބަލިވި މެޗަށްފަހު، ކެމެރާމަނަކު ކައިރިއަށް އައުމުން އޭނާ ގޮށްމުށުން ކެމެރާގައި ޖެހިއެވެ.

2024 ވަނަ އަހަރުގެ ކޮޕާ އެމެރިކާ ކާމިޔާބު ކުރުމަށްފަހު، ޗެލްސީގެ މިޑްފީލްޑަރު އެންޒޯ ފެނާންޑޭޒް އާންމުކުރި ވީޑިއޯއަކާ ގުޅިގެން މާފަށް އެދެން ޖެހުނެވެ. ފްރާންސް ފުޓްބޯޅަ ފެޑަރޭޝަނުން ބުނި ގޮތުގައި އެ ލަވައަކީ "ނަސްލީ ތަފާތުކުރުން އެކުލެވޭ" ލަވައެކެވެ.

މި ފަހަރުގެ ވޯލްޑް ކަޕްގައި، އިންގްލެންޑް މެޗަށްފަހު ބެނާއެއް ހިފެހެއްޓި މައްސަލައިގައިވެސް އޭއެފްއޭ ޖޫރިމަނާ ކުރާނެ ކަމަށް ބެލެވެ އެވެ.

އާޖެންޓީނާގެ ކުޅުންތެރިން އުފާފާޅުކުރީ "ލަސް މަލްވީނަސް ސޮން އާޖެންޓީނަސް" ނުވަތަ "ފޯކްލޭންޑްސްއަކީ އާޖެންޓީނާގެ ތަނެއް" ކަމަށް ލިޔެފައިވާ ފޮތިގަނޑެއް ހިފައިގެން ތިބެ އެވެ.

2014 ވަނަ އަހަރު، ސްލޮވީނިއާއާ ދެކޮޅަށް ކުޅުނު އެކުވެރިކަމުގެ މެޗެއްގެ ކުރިން މިފަދަ މެސެޖެއް ހުރި ބެނާއެއް ހިފެހެއްޓުމުން އޭއެފްއޭ 20,000 ޕައުންޑުން ޖޫރިމަނާ ކުރި އެވެ.

މި ބެނާ ހިފަހައްޓައިގެން ތިބި ޓޮޓެންހަމްގެ ކްރިސްޓިއަން ރޮމޭރޯ، ކުރީގެ ކުޅުންތެރިޔާ ޖިއޮވާނީ ލޮ ސެލްސޯ އަދި މެންޗެސްޓަރ ޔުނައިޓެޑްގެ ލިސަންޑްރޯ މާޓިނޭޒަށް ފީފާއިން ސަސްޕެންޝަނެއް ދިނުމަކީ އެކަށީގެންވާ ކަމެކެވެ.

ޔޫރޯ 2024 ގެ ފައިނަލްގައި އިންގްލެންޑް އަތުން 2-1 އިން ސްޕެއިން މޮޅުވި މެޗަށްފަހު، "ޖިބްރޯލްޓާއަކީ ސްޕެއިންގެ ތަނެއް" ކަމަށް ބުނެ ލަވަކިޔުމުން، ސްޕެއިންގެ ކެޕްޓަން އަލްވާރޯ މޮރާޓާ އާއި ރޮޑްރީ އެއް މެޗަށް ސަސްޕެންޑް ކުރަން ޔޫއެފާއިން ނިންމި އެވެ.

އާޖެންޓީނާގެ އަމަލުތަކާ ގުޅޭގޮތުން ފީފާގެ ޕްރޮސެކިއުޓަރު ކުރާ ތަހުގީގު ނިންމާނެ ވަކި މުއްދަތެއް އަދި ކަނޑައަޅާފައެއް ނުވެ އެވެ.

ފެބްރުއަރީ 18 ވަނަ ދުވަހު، ބެންފީކާ އަތުން ރެއާލް މެޑްރިޑް 1-0 އިން މޮޅުވި މެޗުގައި، ޖިއަލޫންކާ ޕްރެސްޓިއާނީ ރެއާލްގެ ވިނީޝިއަސް ޖޫނިއާއަށް ނަސްލީ ގޮތުން ފުރައްސާރަކުރި ކަމަށް ބުނާ މައްސަލަ ބެލުމަށް ޔޫއެފާއިން އިންސްޕެކްޓަރަކު އައްޔަންކުރި އެވެ.