ވޯލްޑް ކަޕް ޗެމްޕިއަން ޓީމަށް ފީފާއިން "އަނގޮޓި" ދެނީ

އާދީއްތަ ދުވަހު އާޖެންޓީނާ އާއި ސްޕެއިން ބައްދަލުކުރާ ވޯލްޑް ކަޕް ފައިނަލް މެޗުން މޮޅުވާ ޓީމަށް، ފީފާގެ ފަރާތުން "ވޯލްޑް ކަޕް ރިންގް" ނުވަތަ އަނގޮޓި ހަދިޔާކުރާ ގޮތަށް ހަމަޖައްސައިފި އެވެ.

އެމެރިކާގެ ރައީސް ޑޮނަލްޑް ޓްރަމްޕް ވެސް މި ފައިނަލް މެޗު ބައްލަވާލެއްވުމަށް ވަޑައިގަތުމަށް ވަނީ ހަމަޖެހިފައެވެ.

މޮޅުވާ ޓީމަށް އަނގޮޓި ދިނުމަކީ އެމެރިކާގެ ކުޅިވަރުތަކުގައި އޮންނަ އާދަކާދައެކެވެ. އެގޮތުން އެމެރިކާގެ އެން.އެފް.އެލް ސުޕަ ބޯލް ކާމިޔާބުކުރާ ޓީމުތަކަށް ވެސް މިފަދަ އަނގޮޓި ހަދިޔާކުރެ އެވެ.

ދުނިޔޭގެ ޗެމްޕިއަންކަން ހޯދާ ޓީމަށް 30 އަނގޮޓި ދިނުމަށް ހަމަޖެހިފައިވާއިރު، އިތުރު 1،996 އަނގޮޓި ސަޕޯޓަރުންނަށް ވިއްކުމަށް ވަނީ ނިންމާފަ އެވެ. ކޮންމެ އަނގޮޓިއެއްގެ ފަރުމާގައި ވޯލްޑް ކަޕް ތަށީގެ ކުޑަ މޮޑެލްއެއް ހިމެނޭއިރު، އަނގޮޓީގެ ބޭންޑުގައި ލިޔުމެއް ކަނޑާނެގިފައި ހުންނާނެ އެވެ.

މުބާރާތުގެ ތަށި ހަވާލުކޮށްދެއްވުމަށް ހަމަޖެހިފައިވާ ރައީސް ޓްރަމްޕް، މިހާތަނަށް ކުޅުނު 102 މެޗުގެ ތެރެއިން އެއްވެސް މެޗަކަށް ވަޑައިގެންފައެއް ނުވެ އެވެ. އެގޮތުން މުބާރާތުގެ ގަދަ 16 އާ ހަމައިން ބެލްޖިއަމް އަތުން ބަލިވެ އެމެރިކާ ކެޓިއިރު، އެމެރިކާ ކުޅުނު އެއްވެސް މެޗެއް ބައްލަވާލެއްވުމަށް އެމަނިކުފާނު ވަޑައެއް ނުގަންނަވަ އެވެ.

ކެނެޑާގައި ރޯވެފައިވާ އަލިފާންގަނޑުތަކުގެ ސަބަބުން ވައި ނުސާފުވެ، ނިއު ޔޯކަށް މޫސުމީ އިންޒާރެއް ނެރެފައިވީ ނަމަވެސް، މެޓްލައިފް ސްޓޭޑިއަމްގައި ކުޅޭ ފައިނަލް މެޗަށް މީގެ ސަބަބުން އެއްވެސް އަސަރެއް ކުރާނެ ކަމަކަށް ނުބެލެވެ އެވެ.

ފައިނަލް މެޗަށް ޓްރަމްޕް ވަޑައިގަންނަވާނެ ކަމަށް ފީފާގެ ރައީސް ޖިއާނީ އިންފަންޓީނޯ ކުރިން ވިދާޅުވެފައިވާއިރު، ވައިޓް ހައުސްގެ ޕްރެސް ސެކްރެޓަރީ ކެރޮލިން ލީވިޓް މިހާރު ވަނީ އެކަން ކަށަވަރުކޮށްދެއްވާފަ އެވެ.

މި ފަހަރުގެ ވޯލްޑް ކަޕްގައި ކުރިމަތިވި އެންމެ ބޮޑު ހިޔާލުތަފާތުވުމުގެ މަރުކަޒަކީ އިންފަންޓީނޯ އާއި ޓްރަމްޕާ ދެމެދު އޮތް ގުޅުމެވެ. އެމެރިކާގެ ފޯވާޑް ފޮލަރިން ބަލޯގަންއަށް ދެއްކި ރަތް ކާޑު މުރާޖައާ ކުރުމަށް އެދިވަޑައިގެން، އެމެރިކާގެ ރައީސް ވަނީ ފީފާގެ ރައީސަށް ގުޅުއްވާފަ އެވެ.

ބަލޯގަންއަށް އައި އޮޓޮމެޓިކް ސަސްޕެންޝަން އުވާލުމަށް ނިންމި ނިންމުމަށް ގިނަ ބައެއްގެ ފާޑުކިޔުން އަމާޒުވިއިރު، މުބާރާތުގެ އިންސާފުވެރިކަމާ މެދު ވެސް ވަނީ ސުވާލު އުފެދިފަ އެވެ.

މި ނިންމުމާ އެކު ބެލްޖިއަމާ ދެކޮޅަށް ކުޅުނު ނޮކައުޓް މެޗުގައި ބަލޯގަންއަށް ކުޅުމުގެ ފުރުސަތު ލިބުނު ނަމަވެސް، އެ މެޗުން އެމެރިކާ ވަނީ 4-1 ގެ ނަތީޖާއަކުން ބަލިވެފަ އެވެ.

މި މުބާރާތުގައި ފްރާންސާއި އިންގްލެންޑުން ވެސް އެ ގައުމުތަކުގެ ކުޅުންތެރިންނަށް ދެއްކި ކާޑުތައް މުރާޖައާ ކުރަން އެދުނު ނަމަވެސް، ބަލޯގަންގެ ކާޑު ފިޔަވައި އެހެން އެއްވެސް ރަތް ނުވަތަ ރީނދޫ ކާޑެއްގެ ސަސްޕެންޝަން ފީފާއިން އުވާލާފައެއް ނުވެ އެވެ.

ރައީސް ޓްރަމްޕަކީ މީގެ ކުރިން ވެސް ކުޅިވަރުގެ ބޮޑެތި މުނާސަބަތުތަކަށް ވަޑައިގަންނަވާ ބޭފުޅެކެވެ. އެގޮތުން ސުޕަ ބޯލް، ޔޫ.އެސް އޯޕަން ޓެނިސް މުބާރާތް، އެން.ބީ.އޭ ފައިނަލްސް އަދި ރައިޑާ ކަޕްގައި ބައިވެރިވެވަޑައިގެންފައިވާއިރު، އެމަނިކުފާނުގެ ރިޔާސީ ދެ ދައުރުގެ ތެރޭގައި ޔޫ.އެފް.ސީގެ އިވެންޓްތައް ވައިޓް ހައުސްގައި ބާއްވާފައިވެ އެވެ.

ވޯލްޑް ކަޕް ބާއްވާ ގައުމުތަކުގެ އިސްވެރިން ފައިނަލް މެޗުތަކަށް ވަޑައިގަތުމަކީ އާންމުކޮށް ހިނގާ ކަމެކެވެ.

މިފަހަރުގެ މުބާރާތް އެމެރިކާ އިން ބާއްވަނީ ކެނެޑާ އާއި މެކްސިކޯއާ ގުޅިގެންނެވެ. މުބާރާތުގެ ފަހު ދެ މެޗު ވެސް ކުޅުމަށް ހަމަޖެހިފައިވަނީ އެމެރިކާގަ އެވެ.

ތިންވަނަ ހޮވާ މެޗުގައި ހޮނިހިރު ދުވަހުގެ ރޭ ރާއްޖޭގަޑިން 02:00 (ބީ.އެސް.ޓީ ގަޑިން 22:00) ގައި މިއާމީގައި އިންގްލެންޑާއި ފްރާންސް ބައްދަލުކުރާއިރު، އާޖެންޓީނާ އާއި ސްޕެއިން ބައްދަލުކުރާ ފައިނަލް މެޗު އޮންނާނީ އާދީއްތަ ދުވަހުގެ ރޭ ރާއްޖޭގަޑިން 00:00 (ބީ.އެސް.ޓީ ގަޑިން 20:00) ގައެވެ.