ސައުދީ އަރަބިއްޔާގެ ބަނދަރުތަކަށް މުދާ އުފުލާ އުޅަނދުފަހަރަށް ހަމަލާދީފާނެ ކަމުގެ އިންޒާރު ޔަމަނުގެ ހޫޘީން ޝިޕިން ކުންފުނިތަކަށް ދީފި

ސައުދީ އަރަބިއްޔާގެ ބަނދަރުތަކަށް މުދާ އުފުލާ އުޅަނދުފަހަރަށް އަމާޒުކޮށް ހަމަލާދީފާނެ ކަމުގެ އިންޒާރު، ބައިނަލްއަގުވާމީ ޝިޕިން ކުންފުނިތަކަށް އީމެއިލް މެދުވެރިކޮށް ޔަމަނުގެ ހޫތީން ދީފި އެވެ. ހޫތީން ފޮނުވި މި އީމެއިލްގައި ބުނެފައިވަނީ، ސައުދީގެ ބަނދަރުތަކުން މުދާ ބޭލުމާއި މުދާ އެރުވުމުގެ މަސައްކަތް ކުރާ އުޅަނދުތަކަށް "ކޮންމެ ތަނެއްގައި" ހުއްޓަސް ހަމަލާދީފާނެ ކަމަށެވެ.

ޖުލައި މަހުގެ 20 ވަނަ ދުވަހު ގިނަ އަދަދެއްގެ ޝިޕިން ކުންފުނިތަކަށް ފޮނުވި މި އީމެއިލްގައި ބުނެފައިވަނީ، ސައުދީ އަރަބިއްޔާގެ އެއްވެސް ބަނދަރަކުން މުދާ ބޭލުމާއި، އެ ބަނދަރުތަކަށް މުދާ ބަރުކުރުމަކީ އެ ކުންފުނިތަކަށް މަނާކަމެއް ކަމަށެވެ.

ރޮއިޓާސް ނިއުސް އެޖެންސީއަށް ފެނިފައިވާ މި އީމެއިލްގައި، ޝިޕިން ދާއިރާގެ ކުންފުނިތަކުން މުދާ އުފުލުމުގެ ކަންކަމުގައި މިހާރަށްވުރެ ބޮޑަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް ހޫތީން ވަނީ ވަރުގަދަ އިލްތިމާސެއް ކޮށްފަ އެވެ.

 ސަންއާގައި ހުންނަ ހޫތީންގެ "ހިއުމަނިޓޭރިއަން އޮޕަރޭޝަންސް ކޯޑިނޭޝަން ސެންޓަރު" އިން ފޮނުވި މި އީމެއިލްގައި ބުނެފައިވަނީ، މި އެންގުމާ ޚިލާފުވާ އުޅަނދުތަކަށް ފިޔަވަޅު އަޅާނެ ކަމަށެވެ. މީގެ އިތުރުން، ޔަމަނުގެ ހަތިޔާރު އެޅި ޖަމާއަތްތަކުގެ ބާރު ފޯރާ ކޮންމެ ސަރަހައްދެއްގައި ހުއްޓަސް، އެފަދަ އުޅަނދުތަކަށް ހަމަލާދީފާނެ ކަމުގެ އިންޒާރުވެސް ވަނީ ދީފަ އެވެ.

އީރާނުގެ އެހީތެރިކަން ލިބޭ ހޫޘީން މިދިޔަ އާދީއްތަ ދުވަހު ވަނީ، ސައުދީ އަރަބިއްޔާއާ ދެކޮޅަށް "ކަނޑުގެ މަގުން ބްލޮކޭޑެއް" ނުވަތަ ދަތުރުފަތުރު ހުއްޓުވުމުގެ ހަރަކާތެއް ފަށާފައިވާކަން އިއުލާނުކޮށްފަ އެވެ.

ސައުދީ ސަރުކާރުން ވަނީ ހޫޘީންގެ މި ނިންމުން ކުށްވެރިކޮށްފަ އެވެ. އަދި ބައިނަލްއަގުވާމީ ގާނޫނުތަކުގެ ތެރެއިން، ސައުދީގެ އުޅަނދުފަހަރު ރައްކާތެރިކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށް އެ ގައުމުން ވަނީ ބުނެފަ އެވެ.

2014 ވަނަ އަހަރުގެ ސެޕްޓެމްބަރު މަހުން ފެށިގެން ޔަމަނުގެ ވެރިރަށް ސަންއާގެ އިތުރުން އެ ގައުމުގެ ބައެއް އެހެން ސަރަހައްދުތައް އޮންނަނީ ހޫޘީންގެ ކޮންޓްރޯލްގެ ދަށުގަ އެވެ.

މިކަން މިހެން ހިނގާފައިވަނިކޮށް ޗައިނާއާއި އިންޑިއާއަށް ގެންދިއުމަށް ސައުދީ އަރަބިއްޔާގެ ސާފުނުކުރާ ތެޔޮ ބަރުކޮށްގެން ދަތުރުކުރި ދެ ޓޭންކަރެއް، ހޫޘީ ހަނގުރާމަވެރިން ދިން އިންޒާރާ ގުޅިގެން ރަތްކަނޑުގެ ތެރެއިން އަނބުރާލުމަށްފަހު ސުއޭޒް ކެނަލާ ދިމާލަށް މިސްރާބު ޖަހައިފި ކަމަށް އަލްޖަޒީރާ އިން ރިޕޯޓުކޮށްފައިވެ އެވެ.

ހޫޘީން ހޯމަ ދުވަހު ވަނީ ސައުދީ އަރަބިއްޔާއާ ދެކޮޅަށް ކަނޑުގެ ބްލޮކޭޑެއް ނުވަތަ ދަތުރުފަތުރު ހުރަސްއެޅުމުގެ އަމަލުތަކެއް ހިންގާނެކަން އިއުލާނުކޮށްފަ އެވެ. މިއީ އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގައި ހުޅުވިގެންދިޔަ އާ މައިދާނަކަށް ވުމުގެ ފުރުސަތު އޮތް ކަމެއްގެ ގޮތުގައި ބެލެވޭއިރު، މީގެ ސަބަބުން ގަލްފް ސަރަހައްދުން ބޭރުގައި ދުނިޔޭގެ ހަކަތައިގެ ސަޕްލައިއަށާއި ވިޔަފާރިއަށް އޮތް ނުރައްކާ ވަނީ އިތުރުވެފަ އެވެ.

ޔަމަނުގެ އުތުރު ސަރަހައްދުގެ އިތުރުން، ރަތްކަނޑުގެ ދޮރުމަތީގައި އޮންނަ ބާބުލް މަންދަބު ކަނޑުއޮޅީގެ އައްސޭރިފަށުގެ ކޮންޓްރޯލް އޮންނަނީ ހޫޘީންގެ އަތްދަށުގަ އެވެ. ރަތްކަނޑުގައި އޮންނަ ސައުދީ އަރަބިއްޔާގެ ޔަންބޫ ބަނދަރަކީ، ގަލްފުގެ ދޮރުމަތީގައި އޮންނަ ހުރްމުޒް ކަނޑުއޮޅި ބަންދުކޮށްފި ހާލަތެއްގައި، މެދުއިރުމަތީގެ ދުވާލަކު އެތައް މިލިއަން ފީފާ ތެލެއް ބޭރުކުރުމަށް ބޭނުންކުރާ މައިގަނޑު ބަދަލު މަގެވެ.