އީރާނުގެ ދިފާއީ ސިޔާސަތަކީ "ލޮލަކަށް ލޮލެއް": އިސް ޑިޕްލޮމެޓް
23 ޖުލައި 2026 | ބުރާސްފަތި 06:29އީރާނުގެ އުމްރާނީ ވަސީލަތްތަކަށް އެމެރިކާއިން ހަމަލާދީފިނަމަ ވަރުގަދަ ރައްދެއް ދޭނެ ކަމުގެ އިންޒާރު އެ ގައުމުގެ އިސްވެރިން ދެއްވައިފި. މި އިންޒާރުގައި ހުރްމުޒް ކަނޑުއޮޅިން ތެޔޮ އުފުލާ އުޅަނދުތައް ދަތުރުކުރުން މުޅިން ހުއްޓުވާނެ ކަމަށާއި، އެފަދަ އުދުވާނަކަށް އެހީތެރިވާ ކޮންމެ ފަރާތަކަށް ހަމަލާދޭނެ ކަމަށް ވަނީ ބުނެފައި. އީރާނުން މިފަދަ ހަރުކަށި ރައްދެއް ދޭން ނިންމީ އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރުތަކާ ގުޅިގެން.
އީރާނުގެ ޚާރިޖީ ވަޒީރު އައްބާސް އަރަގްޗީ | ގެޓީ އިމޭޖަސް
އީރާނުގެ ދިފާއީ ސިޔާސަތަކީ ވަރަށް ސާފު ސިޔާސަތެއް ކަމަށާއި، އެއީ "ލޮލަކަށް ލޮލެއް" ބަދަލުހިފުމުގެ އުސޫލު ކަމަށް އީރާނުގެ އެންމެ އިސް ޑިޕްލޮމޭޓް، ޚާރިޖީ ވަޒީރު އައްބާސް އަރާގްޗީ އަންގާރަ ދުވަހު އެކްސްގައި ކުރެއްވި ޕޯސްޓެއްގައި ވިދާޅުވެއްޖެ އެވެ.
އޭނާ އިތުރަށް ވިދާޅުވީ، އީރާނުގެ އުމްރާނީ ވަސީލަތްތައް ހިމެނޭހެން އެ ގައުމަށް ދޭ ކޮންމެ އުދުވާނީ ހަމަލާއަކަށް، ވަރުގަދަ އަދި ހަރުކަށި ރައްދެއް ދިނުމަށް މަޖުބޫރުވާނެ ކަމަށެވެ.
މީގެ އިތުރުން، އެފަދަ އުދުވާނެއްގައި އެއްވެސް ސިފައެއްގައި އެހީތެރިކަން ފޯރުކޮށްދޭ ކޮންމެ ފަރާތަކީވެސް، ހަމަލާދިނުން ހުއްދަ އަމާޒުތަކެއްގެ ގޮތުގައި ބަލާނެ ކަމަށް އޭނާ ވިދާޅުވި އެވެ.
އީރާނުން މި އިންޒާރު ދީފައިވަނީ، ކަނޑުގެ ސަރަހައްދުން ގަވާއިދާ ހިލާފަށް އުޅަނދުފަހަރު ދަތުރުކުރުން ހުއްޓުވުމަށް އިސްލާމީ ޖުމްހޫރިއްޔާ (އީރާނުން) ކުރަމުންދާ މަސައްކަތްތަކާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް، އީރާނުގެ ފާލަންތަކަށާއި އިންޖީނުގެތަކަށް އެމެރިކާ ސިފައިން ހަމަލާދޭނެ ކަމަށް ވިދާޅުވުމާ ގުޅިގެންނެވެ.
ޚާރިޖީ ވަޒީރުގެ މި ވާހަކަތަކަކީ، އެމެރިކާގެ އިންޒާރުތަކާ ގުޅިގެން އީރާނުގެ އަސްކަރީ މަތީ ކޮމާންޑާއި، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ އެއިރޯސްޕޭސް ފޯސްއިން މީގެ ކުރިން ދީފައިވާ އިންޒާރުތަކާ އެއްގޮތް ވާހަކަތަކެކެވެ.
ޚާތަމް އަލް-އަންބިޔާ ސެންޓްރަލް ހެޑްކުއާޓާސްއިން ވަނީ، އެމެރިކާއިން ދީފައިވާ އިންޒާރުތަކާ އެއްގޮތަށް އަމަލުކޮށްފިނަމަ، ހުރްމުޒް ކަނޑުއޮޅިން ދުނިޔޭގެ ތެޔޮ އުފުލާ އުޅަނދުފަހަރު ދަތުރުކުރުން މުޅިން ހުއްޓުވާނެ ކަމަށް ބުނެފަ އެވެ. އެ އިދާރާއިން ބުނި ގޮތުގައި، ހުރްމުޒް ކަނޑުއޮޅި މިހާރު އޮތީ ބަންދުކޮށްފަ އެވެ. އަދި އެއްވެސް އުޅަނދަކަށް އެ ސަރަހައްދުން ދަތުރުކުރުމުގެ ހުއްދަ ދެވޭނީ، ހަމައެކަނި ކަނޑައެޅިފައިވާ ވަކި މަގަކުން، ކުރިން އިއުލާންކޮށްފައިވާ އުސޫލުތަކާ އެއްގޮތަށް ކަމަށްވެސް ބުނެފައިވެ އެވެ.
އައި.އާރް.ޖީ.ސީ އެއިރޯސްޕޭސް ފޯސްގެ ކޮމާންޑަރު، ބްރިގޭޑިއާ ޖެނެރަލް ސައްޔިދު މަޖީދު މޫސާވީ ވެސް ވަނީ، އީރާނުގެ ފާލަންތަކަށް ނުވަތަ އިންޖީނުގެތަކަށް އެމެރިކާއިން ދޭ ކޮންމެ ހަމަލާއަކަށް ވަގުތުން ރައްދު ދޭނެ ކަމުގެ އިންޒާރު ދެއްވާފަ އެވެ.
އޭނާ އެކްސްގައި ލިޔުއްވާފައިވާ ގޮތުގައި، އީރާނުގެ ފާލަންތަކަށާއި އިންޖީނުގެތަކަށް ހަމަލާދީފިނަމަ، "ކުޑަކުދިން މަރާ މީހުންނަށް" ވާގިވެރިވާ ފަރާތްތަކާއި އެމީހުންނަށް ފުރުސަތު ދޭ ގައުމުތަކުން ކަރަންޓު ކެނޑި، އަނދިރިކަމުގެ ތެރެއަށް ދާނެކަން ކަށަވަރެވެ.
