ސެޓެލައިޓް މެދުވެރިކޮށް ނަގާ ގަލްފް ސަރަހައްދުގެ ފޮޓޯތައް އާންމުކުރުން ފަސްކޮށްދިނުމަށް އެމެރިކާއިން އެދިފައިވާ އެދުމަށް އީޔޫ އިން އެއްބަސްވެއްޖެ

ސެޓެލައިޓް މެދުވެރިކޮށް ނަގާ ފޮޓޯތައް އާންމުކުރުން ފަސްކޮށްދިނުމަށް އެމެރިކާއިން އެދިފައިވާ އެދުމަށް ޔޫރަޕިއަން ޔޫނިއަން (އީޔޫ) އިން އެއްބަސްވެއްޖެ އެވެ. އީޔޫގެ ރަސްމީ ޖާނަލް ގައި ޝާއިއުކޮށްފައިވާ ނިންމުމެއްގައިވާ ގޮތުން، ކޮޕަރނިކަސް ސެޓެލައިޓުން ނަގާ ގަލްފް ސަރަހައްދުގެ ފޮޓޯތައް ފޮނުވުން 24 ގަޑިއިރަށް ލަސްކުރުމަށް ވަނީ ނިންމާފަ އެވެ.

މި އެއްބަސްވުމަށް އީޔޫއިން އައިސްފައި މިވަނީ، ޖުލައި މަހުގެ 7 ވަނަ ދުވަހުން ފެށިގެން އެމެރިކާއިން އަލުން އީރާނަށް ހަމަލާދޭން ފަށާފައިވާ ދަނޑިވަޅެއްގަ އެވެ. ހުރްމުޒް ކަނޑުއޮޅީގެ ކޮންޓްރޯލް ހޯދުމަށް ތެހެރާނާއި ވޮޝިންޓަނުން ކުރަމުންދާ މަސައްކަތްތަކާ ގުޅިގެން، އެ ސަރަހައްދު މިހާރު ވަނީ އަލުން ބޮޑު ހަމަނުޖެހުމެއްގެ ތެރެއަށް ވެއްޓިފަ އެވެ.

ސެޓެލައިޓް ފޮޓޯތައް އާންމުކުރުން ލަސްކޮށްދިނުމަށް އެމެރިކާގެ އޮފިޝަލުން އީޔޫގެ ޚާރިޖީ ސިޔާސަތާ ބެހޭ ވެރިޔާ ކާޖާ ކާލަސްގެ އަރިހުން އެދިފައިވަނީ މެއި މަހުގެ 26 ވަނަ ދުވަހު އެވެ. މި އެދުމުގައި ހިމެނެނީ ގަލްފް ސަރަހައްދުގެ މަތިން ސެންޓިނަލް-1 އަދި ސެންޓިނަލް-2 ސެޓެލައިޓްތަކުން ނަގާ މައުލޫމާތުތަކެވެ.

ޖުލައި 13 ވަނަ ދުވަހު އީޔޫ ކައުންސިލުން ނިންމި ނިންމުމެއްގައި ބުނެފައިވަނީ، މިގޮތަށް އަމަލުކުރުމަކީ "ކޮންމެހެން ބޭނުންތެރި" ކަމެއް ކަމަށެވެ. އެއީ އެ ފޮޓޯތައް އެހެން ގައުމަކުން ނުވަތަ ޖަމާއަތަކުން ބޭނުންކޮށްގެން، އެ ސަރަހައްދުގައި އޮތް އީޔޫގެ މަސްލަހަތަށާއި، މެންބަރު ގައުމުތަކަށް ނުވަތަ އެ ގައުމުތަކުގެ ބައިވެރިންގެ މަސްލަހަތަށް ނުރައްކަލެއް ކުރިމަތިވެދާނެތީ އެކަން ހުއްޓުވުމަށްޓަކައި ކަމަށްވެސް އެ ނިންމުމުގައިވެ އެވެ.

މި ނިންމުން ތަންފީޒުކުރާ ސަރަހައްދަކީ މިހާރު ހަމަލާތައް ބަދަލުކުރަމުންދާ އަދި އެމެރިކާއިން އީރާނާ ދެކޮޅަށް ކަނޑުގެ މަގުން ބްލޮކޭޑެއް ނުވަތަ ބަންދެއް ކުރިމަތިކޮށްފައިވާ ގަލްފް ސަރަހައްދެވެ.