ދެކުނު ކޮރެއާގެ ވޯލްޑް ކަޕް ތަރި ލީ ކަންގް-އިން އެތުލެޓިކޯ މެޑްރިޑަށް ސޮއިކޮށްފި

އެތުލެޓިކޯ މެޑްރިޑުން ޕީއެސްޖީއަށް ކުޅެމުން އައި ދެކުނު ކޮރެއާގެ ވޯލްޑް ކަޕް ތަރި ލީ ކަންގް-އިން އެ ކްލަބަށް ސޮއިކޮށްފި އެވެ. ސްޕެއިންގެ އެތުލެޓިކޯ މެޑްރިޑުން ވަނީ ފަރަންސޭސިވިލާތުގެ ޕީއެސްޖީއަށް ކުޅެމުން އައި ދެކުނު ކޮރެއާގެ މިޑްފީލްޑަރު ލީ ކަންގް-އިން އެ ޓީމާ ގުޅުމަށް އެއްބަސްވެފައިވާކަން ކަށަވަރުކޮށްދީފަ އެވެ.

އެތުލެޓިކޯ މެޑްރިޑުން ހޮނިހިރު ދުވަހު ހާމަކުރި ގޮތުގައި، ލީ ކަންގް-އިން އެ ކްލަބާއެކު ސޮއިކުރާނީ 2031 ވަނަ އަހަރުގެ ޖޫން މަހުގެ ނިޔަލަށެވެ. މި ޓްރާންސްފާގެ އަގު ރަސްމީކޮށް ހާމަކޮށްފައި ނުވި ނަމަވެސް، ރިޕޯޓްތައް ބުނާގޮތުން އޭނާ އެތުލެޓިކޯއަށް ބަދަލުވީ 35 މިލިއަން އާއި 40 މިލިއަން ޔޫރޯ (39.8 މިލިއަން އާއި 45.5 މިލިއަން އެމެރިކާ ޑޮލަރު) އާ ދެމެދުގެ އަގަކަށެވެ.

އުމުރުން 25 އަހަރުގެ ލީ ވަނީ އެންމެ ފަހުން ބޭއްވި ވޯލްޑް ކަޕްގައި ދެކުނު ކޮރެއާ ކުޅުނު ގްރޫޕް ސްޓޭޖުގެ ތިން މެޗުގައިވެސް ކުޅެފަ އެވެ. ނަމަވެސް އެ މުބާރާތުގެ ދެ މެޗުން ބަލިވުމާ ގުޅިގެން ދެކުނު ކޮރެއާ ވަނީ މުބާރާތުގެ ގްރޫޕް ސްޓޭޖުން ކަޓާފަ އެވެ.

ދެކުނު ކޮރެއާގެ އިންޗިއޯނަށް އުފަން ލީ، ސްޕެއިންގެ ވެލެންސިއާ އެކަޑަމީއާ ގުޅުނީ އުމުރުން އެންމެ 10 އަހަރުގަ އެވެ. އޭނާ ވަނީ ވެލެންސިއާގެ ސީނިއާ ޓީމަށް 62 މެޗު ކުޅެދީފަ އެވެ. އޭގެ ފަހުން މަޔޯކާއަށް ކުޅުމަށްފަހު، 2023 ވަނަ އަހަރު ޕީއެސްޖީއާ ގުޅި، އެ ކްލަބަށް ކުޅުނު 124 މެޗުގައި 16 ލަނޑު ކާމިޔާބުކޮށްދީފައިވެ އެވެ.

ލީ ދެން ފެނިގެންދާނީ ނިމިދިޔަ ސީޒަނުގެ ލަ ލީގާގެ ހަތަރުވަނަ ހޯދައި، ކޮޕާ ޑެލް ރޭގެ ފައިނަލަށް ދަތުރުކުރި އެތުލެޓިކޯ މެޑްރިޑުންނެވެ. އެތުލެޓިކޯގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާ އެންޓޮއިން ގްރީޒްމަން އެމެރިކާގެ އެމްއެލްއެސްއަށް ބަދަލުވުމާ ގުޅިގެން، އެ ޓީމުގެ ކުޅުން އުފެއްދުމުގައި (ކްރިއޭޓިވް މިޑްފީލްޑްގައި) އުފެދުނު ހުސްކަން ފޫބެއްދުމަށް ލީ މުހިންމު ދައުރެއް އަދާކުރާނެ އެވެ.