2026 ވަނަ އަހަރުގެ ފީފާ ވޯލްޑް ކަޕް ފައިނަލް ކާމިޔާބުކުރާނެ ފޭވަރިޓުންނަކީ ސްޕެއިން ކަމަށް ބެލެވެނީ ކީއްވެގެން ހެއްޔެވެ؟
2026 ވަނަ އަހަރުގެ ވޯލްޑް ކަޕް ފައިނަލްގައި އާޖެންޓީނާ އާއި ސްޕެއިން ބައްދަލުކުރާއިރު، މުޅި މުބާރާތުގައި ދެއްކި މޮޅު ކުޅުމާއެކު ފޭވަރިޓްގެ ގޮތުގައި ބެލެވެނީ ޔޫރަޕްގެ ޗެމްޕިއަން ސްޕެއިން. ނަމަވެސް ލިއޮނަލް މެސީގެ ކެޕްޓަންކަމުގެ ދަށުން ނުކުންނަ އާޖެންޓީނާއަކީ ނަތީޖާ އަނބުރާލުމުގެ ތަޖުރިބާހުރި ވަރުގަދަ ޓީމަކަށް ވުމުން، މި މެޗު ވެގެންދާނީ ފުޓްބޯޅައިގެ އާ ތަރި ލަމީން ޔަމާލް އާއި މެސީގެ ވަރުގަދަ ކުރިމަތިލުމަކަށް.
ސްޕެއިންގެ ފޯވާޑް ނަންބަރު 19 ލަމީން ޔަމާލް (ވ) އަދި އާޖެންޓީނާގެ ފޯވާޑް ނަންބަރު 10 ލިއޮނަލް މެސީ | ގެޓީ އިމޭޖަސް
ގަތަރުގައި 2022 ވަނަ އަހަރު ބޭއްވި ވޯލްޑް ކަޕްގެ ފައިނަލްގައި، ލުސައިލް ސްޓޭޑިއަމްގައި ހޯދި ކާމިޔާބީއަށްފަހު، ދުނިޔޭގެ ތަށި ދިފާއުކުރާ ތިންވަނަ ޓީމަށް ވުމުގެ ފުރުޞަތު އާޖެންޓީނާއަށް މިވަނީ ލިބިފަ އެވެ.
އާޖެންޓީނާ ޓީމަކީ ފުޓްބޯޅައިގެ ލެޖެންޑް ލިއޮނަލް މެސީގެ ކެޕްޓަންކަމުގެ ދަށުން ކުޅޭ، ދެކުނު އެމެރިކާގެ ޗެމްޕިއަނުންނެވެ. އަދި މި މުބާރާތުގައި ނަތީޖާ އަނބުރާލުމުގެ ރަސްގެފާނުންގެ ގޮތުގައި މިހާރުގެ ޗެމްޕިއަނުން ފާހަގަވި ނަމަވެސް، މި ފަހަރުގެ ފައިނަލްގައި އެއީ އެންމެ ފޭވަރިޓް ޓީމެއް ނޫނެވެ. ބްރެޒިލުން 1962 ވަނަ އަހަރު ތަށި ދިފާޢުކުރި ފަހުން، ފާއިތުވި ބައި ގަރުނަށްވުރެ ގިނަ ދުވަހުގެ ތެރޭގައި އެއްވެސް ޓީމަކަށް ނުކުރެވުނު ކަންކަން ކުރުމަށް އާޖެންޓީނާއަށް އޮތް ހުރަހަކީ، ޔޫރަޕްގެ ޗެމްޕިއަނުންގެ ގޮތުގައި މުބާރާތަށް އައި، އަދި މުބާރާތް ކާމިޔާބުކުރާނެ ކަމަށް އެންމެ ބޮޑަށް ބެލެވޭ ސްޕެއިން އެވެ.
އާދީއްތަ ދުވަހު އޮންނަ ފައިނަލް މެޗުގައި، ތަށި ދިފާޢުކުރަން ނުކުންނަ އާޖެންޓީނާއަށްވުރެ ސްޕެއިންއަށް ކުރިލިބޭ ސަބަބުތަކާއި، ހީނުކުރާ ފަދަ ނަތީޖާއަކުން އާޖެންޓީނާއަށް މެޗު ކާމިޔާބުކުރެވިދާނެ ފުރުޞަތުތައް ގިނަ އެވެ.
ފޭވަރިޓުންނަކީ ސްޕެއިން ކަމަށް ބެލެވެނީ ކީއްވެގެން؟
ސްޕެއިން 2026 ވަނަ އަހަރުގެ މުބާރާތާ ކުރިމަތިލީ ދުނިޔޭގެ ރޭންކިންގެ އެއްވަނަ ޓީމުގެ ގޮތުގަ އެވެ. ނަމަވެސް މުބާރާތުގެ މެދުތެރެއިން ފްރާންސްގެ ވަރުގަދަ އެޓޭކިންގް ކުޅުމުގެ ސަބަބުން އެ މަޤާމަށް ބަދަލުތަކެއް އައެވެ. ފްރާންސްގެ ކީލިއަން އެމްބާޕޭ އާއި ބެލޮންޑިއޯ ހޯދާފައިވާ އުސްމާން ޑެމްބެލޭގެ ކުޅުމަށް މައިކަލް އޮލީސޭ އާއި ބްރެޑްލީ ބާކޯލާގެ ފަރާތުން ބޮޑު އެހީތެރިކަމެއް ލިބުނެވެ. އަދި ފްރާންސްގެ އުުންމީދީ ތަރި ޑެސިރޭ ދުއޭއަށް ޖެހުނީ ބެންޗުން އެހީތެރިކަން ފޯރުކޮށްދޭށެވެ.
ފީފާ ވޯލްޑް ކަޕް 2026 ގެ ސެމީ ފައިނަލްގައި ފްރާންސާއި ސްޕެއިން ބައްދަލުކުރި މެޗުގެ ތެރެއިން، ފްރާންސްގެ ޖާޒީ ނަންބަރު 10 ކީލިއަން އެމްބާޕޭ އާއި ސްޕެއިންގެ ޖާޒީ ނަންބަރު 19 ލަމީން ޔަމާލް ބޯޅަ ހޯދުމަށް މަސައްކަތް ކުރަނީ. | ގެޓީ އިމޭޖަސް
ޔޫރަޕްގެ ފުޓްބޯޅައިގެ މި ދެ ބާރު ސެމީ ފައިނަލްގައި ބައްދަލުކުރިއިރު، ގިނަ ބަޔަކު ގަބޫލުކުރީ ސްޕެއިން ބަލިކޮށް ފްރާންސް ތަށި އުފުލާލާނެ ކަމަށެވެ. ނަމަވެސް ކަންތައްވީ އެހެންނެއް ނޫނެވެ.
ސްޕެއިންއިން 2-0 އިން ފްރާންސް ބަލިކުރިއިރު، އެމްބާޕޭ އާއި ޑެމްބެލޭއަށް މެޗުގައި ނުފޫޒު ފޯރުވޭނެ އެއްވެސް ފުރުޞަތެއް ސްޕެއިންއަކުން ނުދެ އެވެ. ފްރާންސްގެ ކުޅުންތެރިން މެޗުގެ ތެރެއަށް ވަނުމަށް ކުރި މަސައްކަތްތައް ސްޕެއިންއިން ވަނީ ނާކާމިޔާބުކޮށްލާފަ އެވެ. މުބާރާތުގެ ފުރަތަމަ މެޗުގައި އަލަށް ވާދަކުރި ކޭޕް ވާޑްއާ އެއްވަރުވުމުން ސްޕެއިންއަށް އަމާޒުވި ފާޑުކިއުންތަކަށް ފަހު، އެ ޓީމުން ވަނީ އުރުގުއޭ، ޕޯޗުގަލް އަދި ބެލްޖިއަމް އަތުން އުނދަގުލުން މޮޅުވެފަ އެވެ. ނަމަވެސް ފްރާންސާ ދެކޮޅަށް ދެއްކި މޮޅު ކުޅުމާއެކު، ސްޕެއިންގެ އިތުބާރު މިވަނީ އަލުން އިއާދަވެފަ އެވެ.
އާޖެންޓީނާއިން ސަމާލުވާންޖެހޭ ސްޕެއިންގެ ވަރުގަދަ ސިފަތަކަކީ ކޮބާ؟
މި ސުވާލުގެ ޖަވާބު ހޯދުމަށްވުރެ، ސްޕެއިންގެ ބަލިފައިތަކަކީ ކޮބައިތޯ ބެލުން މާ ފަސޭހަވާނެ އެވެ. ސަބަބަކީ އެ ޓީމުން ބަލިފައެއް ނުފެންނާތީ އެވެ. ސެމީ ފައިނަލާ ހަމައަށް އެ ޓީމުގެ ފަރާތުން ފެނުނު އާދައިގެ ކުޅުމަކީ އެންމެން ހައިރާންވި ކަމެކެވެ.
2026 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތުގެ ސެމީ ފައިނަލްގައި ފްރާންސާއި ސްޕެއިން ބައްދަލުކުރި މެޗުގައި، ސްޕެއިންގެ ޖާޒީ ނަންބަރު 21 މިކޭލް އޮޔަރްޒަބަލް އެ ޓީމުގެ ފުރަތަމަ ލަނޑު ކާމިޔާބުކުރުމަށްފަހު އުފާފާޅުކުރަނީ. | ގެޓީ އިމޭޖަސް
މުބާރާތް ފެށުމުގެ ކުރިން ކޯޗު ލުއިސް ޑި ލަ ފުއެންޓޭ ވަނީ "އެއްބައިވަންތަ" ސްޕެއިންއެއްގެ ވާހަކަ ދައްކައި، ކުޅުންތެރިންނާއި މުޅި ޤައުމުގެ ރޫޙު އާލާކޮށްފަ އެވެ. ސްޕެއިންގެ ސްކޮޑުގައި ރެއާލް މެޑްރިޑްގެ އެއްވެސް ކުޅުންތެރިއަކު ނުހިމެނުމުން، ޔޫރަޕްގެ ޗެމްޕިއަނުންގެ މިހާރުގެ ފެންވަރާ މެދު ސުވާލު އުފެދުނެވެ. ނަމަވެސް 26 ކުޅުންތެރިންގެ ސްކޮޑުގައި ބާސެލޯނާގެ 8 ކުޅުންތެރިން ހިމެނެ އެވެ.
"އަހަރެން ގަބޫލުކުރާ ގޮތުގައި ދުނިޔޭގެ އެންމެ މޮޅު ޓީމަކީ ސްޕެއިންގެ ޤައުމީ ޓީމު،" ޑި ލަ ފުއެންޓޭ ބުންޏެވެ. "އަހަރެން ބަލަނީ ކުޅުންތެރިން އައީ ކޮން ކްލަބަކުންތޯއެއް ނޫން. މުހިންމީ ގައުމީ ޓީމަށް ކުޅުމަކީ ފަޚުރެއް ކަމަށް ދެކޭ، އެއްބައިވަންތަ ޓީމެއްގެ ގޮތުގައި ތިބި ކުޅުންތެރިން."
ޑި ލަ ފުއެންޓޭއަށް އޮތީ ހަމައެކަނި ބާސެލޯނާގެ ކުޅުންތެރިންގެ މައްސަލައެއް ނޫނެވެ. ސެމީ ފައިނަލްގައި ކުޅުނު ސްޕެއިންގެ މިޑްފީލްޑާއި އެޓޭކަށް ބަލާއިރު، ފަބިއަން ރޫއިޒްއަކީ ޕީއެސްޖީގެ މުހިންމު ކުޅުންތެރިއެކެވެ. އެލެކްސް ބައޭނާއަކީ އެތުލެޓިކޯ މެޑްރިޑްގެ ތަރިއެކެވެ. ރޮޑްރީއަކީ މެންޗެސްޓަރ ސިޓީއާއެކު 2024 ވަނަ އަހަރުގެ ބެލޮންޑިއޯ ކާމިޔާބުކުރި މާސްޓްރޯ އެވެ. އަދި ކުރިއަށް ކުޅޭ މިކޭލް އޮޔަރޒަބަލް އަންނަނީ ރެއާލް ސޮސިއެޑާޑްގެ ނަން ދުނިޔެއަށް މަޝްހޫރުކޮށްދެމުންނެވެ. އުމުރުން 29 އަހަރުގެ އޮޔަރޒަބަލް މި މުބާރާތުގައި މިހާތަނަށް ޖަހާފައިވާ 5 ލަނޑާއެކު، ތަށި ލިބިއްޖެނަމަ އޭނާ ވެގެންދާނީ ސްޕެއިންގެ ފުޓްބޯޅަ ތާރީޚުގެ ބަތަލަކަށެވެ.
މީގެ އިތުރުން، ސްޕެއިން ޓީމުގެ މައިބަދައަކީ ބާސެލޯނާގެ ކުޅުންތެރިންނެވެ. ލަމީން ޔަމާލްއަކީ މިހާރު ދުނިޔޭގެ ފުޓްބޯޅައިގެ އާ ތަރިއެވެ. މުބާރާތުގެ ކުރިން ލިބުނު އަނިޔާއެއްގެ ސަބަބުން މި މުބާރާތުގައި އޭނާގެ ފަރާތުން މާ ބޮޑު ކުޅުމެއް ނުފެނުނު ނަމަވެސް، އޭނާއަކީ މެސީ އާއި ރޮނާލްޑޯގެ ފަހުން ދުނިޔޭގެ ފުޓްބޯޅަ ކޮންޓްރޯލް ކުރާނެ ތަރި ކަމަށް ގިނަ ބަޔަކު ގަބޫލުކުރެ އެވެ. އުމުރުން 19 އަހަރުގެ ޔަމާލް ޔޫރޯ 2024 ކާމިޔާބުކުރުމުގައި މުހިންމު ދައުރެއް އަދާކުރިއިރު، ސަޕޯޓަރުން ތިބީ ވޯލްޑް ކަޕްގައި އޭނާގެ ޖާދޫ ފެންނާނެ ވަގުތެއްގެ އިންތިޒާރުގަ އެވެ.
ޑެނީ އޮލްމޯއަކީ އެޓޭކްތައް ރާވާ މޭސްތިރި އެވެ. އަދި އުމުރުން އެންމެ 19 އަހަރުގެ ޕައު ކުބާސީއަކީ މިހާރު ސްޕެއިންގެ ޑިފެންސްގެ އެންމެ މުހިންމު އެއް ތަރި އެވެ. ސްޕެއިންގެ ވަރުގަދަކަން ހާމަވާ އެންމެ ބޮޑު ހެއްކަކީ، ޔޫރޯ 2024 ގައި މުހިންމު ދައުރެއް އަދާކުރި އެތުލެޓިކް ބިލްބާއޯގެ ނިކޯ ވިލިއަމްސްއަށް މި މުބާރާތުގައި ކުޅުމުގެ ފުރުޞަތު ވަރަށް މަދުން ނޫނީ ނުލިބޭތީ އެވެ.
ސްޕެއިން އާއި އާޖެންޓީނާގެ ފައިނަލް މެޗުން ފެންނާނީ ކޮން ކަހަލަ ކުޅުމެއް؟
ސެމީ ފައިނަލްގައި އާޖެންޓީނާއިން އިންގްލެންޑް އަތުން 2-1 އިން މޮޅުވި ގޮތަށް، ފައިނަލް މެޗު ފެންނާނެ ކަމަކަށް ނުބެލެވެ އެވެ. އިންގްލެންޑް ޓީމުގައި ރެއާލް މެޑްރިޑް، ބަޔާން މިއުނިކް އަދި އާސެނަލް ފަދަ ކްލަބްތަކުގެ ތަރިން ތިބިއިރު، މެޗުގެ 55 ވަނަ މިނެޓާ ހަމައަށް އާޖެންޓީނާގެ މައްޗަށް އެ ޓީމުން ކުރިހޯދި އެވެ. ނަމަވެސް އިންގްލެންޑުން ފަހަތަށް ޖެހުމުގެ ނަތީޖާއަކަށްވީ، މެޗު ނިމުނުއިރު 64 އިންސައްތަ ބޯޅަ ކޮންޓްރޯލް އާޖެންޓީނާއަށް ލިބުމެވެ.
އިންގްލެންޑަކީ ބޯޅަ ހިފަހައްޓައިގެން ކުޅޭ ޓީމެއް ނޫން ނަމަވެސް، ސްޕެއިންއަކީ އެކަމަށް މަޝްހޫރު ޓީމެކެވެ. އެމީހުން މަސައްކަތް ކުރާނީ މެދުތެރެ ކޮންޓްރޯލްކޮށްގެން މެސީއަށް ލިބޭ ފުރުޞަތުތައް ހަނިކުރުމަށެވެ. ސްޕެއިންއިން ލީޑު ނެގި ނަމަވެސް، އިންގްލެންޑްގެ ކޯޗު ތޯމަސް ޓުޗެލް ހެދި ގޯސް ޑި ލަ ފުއެންޓޭ ނަހަދާނެ އެވެ. އޭނާ އަންގާނީ މުޅި މެޗުގައި ރޮޑްރީ އާއި ރޫއިޒް މެޗު ކޮންޓްރޯލް ކުރުމަށެވެ.
ސްޕެއިންއާ ދެކޮޅަށް އާޖެންޓީނާއަށް އޮތް އެންމެ ބޮޑު އުއްމީދަކީ މެސީތަ؟
2026 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތުގެ ސެމީ ފައިނަލްގައި އިންގްލެންޑާއި އާޖެންޓީނާ ބައްދަލުކުރި މެޗުގައި، އާޖެންޓީނާގެ ދެވަނަ ލަނޑު ކާމިޔާބުކުރުމަށްފަހު އެ ޓީމުގެ ފޯވާޑް ނަންބަރު 22 ލައުޓާރޯ މާޓިނޭޒް، ކެޕްޓަން ލިއޮނަލް މެސީއާއެކު އުފާފާޅުކުރަނީ. | ގެޓީ އިމޭޖަސް
ވިއްސަކަށް އަހަރު ދުވަހު ބާސެލޯނާ އާއި ސްޕެއިންގެ ފުޓްބޯޅައިގައި ރަސްކަންކުރި ލިއޮނަލް މެސީއަކީ އާޖެންޓީނާގެ ތަށި ދިފާޢުކުރުމުގެ އެންމެ ބޮޑު އުއްމީދެވެ. މި މުބާރާތުގައި މިހާތަނަށް 8 ލަނޑު ޖަހާފައިވާ މެސީ ވަނީ، އުމުރުން 39 އަހަރުގައިވެސް އޭނާއަކީ ޓީމުގެ ލީޑަރުކަން ސާބިތުކޮށްދީފަ އެވެ. އިންގްލެންޑާ ދެކޮޅަށް ކުޅުނު މެޗުގައި އޭނާ އެކަހެރިކޮށް ފެނުނު ނަމަވެސް، އާޖެންޓީނާއިން ނަތީޖާ އަނބުރާލި ދެ ލަނޑު ޖެހުމުގައިވެސް އެހީތެރިވީ މެސީއެވެ. އޭގެ ތެރެއިން އެއް ލަނޑު ލައުޓާރޯ މާޓިނޭޒް ޖެހިއިރު، އެއީ އޭނާ މި މުބާރާތުގައި ޖެހި ތިންވަނަ ލަނޑެވެ.
އިޓަލީގެ އިންޓަރ މިލާނަށް ކުޅޭ މާޓިނޭޒް ފައިނަލްގައިވެސް ބެންޗުން ކުޅެން އެރުމުގެ ފުރުޞަތު ބޮޑެވެ. އޭގެ ބަދަލުގައި އެތުލެޓިކޯ މެޑްރިޑްގެ ހޫލިއަން އަލްވަރޭޒް އާއި ގިއުލިއާނޯ ސިމިއޯނީ ފްލޭންކްތަކުން ފެނުމުގެ ފުރުޞަތު ބޮޑެވެ. މި ކުޅުންތެރިންގެ ފަހަތުގައި އޮތީ އިންގްލެންޑަށްވެސް ފޫއަޅުވާނުލެވުނު ވަރުގަދަ މިޑްފީލްޑެކެވެ. އެއީ މުޅި މެޗުގައި ވަރުބަލިކަމެއް ނެތި ދުވާނެ އެލެކްސިސް މެކް އެލިސްޓާ، ލިއަންޑްރޯ ޕަރޭޑޭސް އަދި އެންޒޯ ފެނާންޑޭޒްއެވެ.
އާޖެންޓީނާގެ ޑިފެންސަށް ސްޕެއިން އާއި ޔަމާލް ހުއްޓުވިދާނެތަ؟
އާޖެންޓީނާގެ ޑިފެންސްގެ މެދުގައި ތިބި ލިސަންޑްރޯ މާޓިނޭޒް އާއި ކްރިސްޓިއަން ރޮމޭރޯއާ މެދު ޚިޔާލުތަފާތުވުންތައް އެބަހުއްޓެވެ. މެންޗެސްޓަރ ޔުނައިޓެޑްގެ ކުރީގެ ޑިފެންޑަރު ގޭރީ ނެވިލް ސިފަކުރި ގޮތުގައި އެއީ ދުނިޔޭގެ "އެންމެ މޮޅު، އަދި އެންމެ ދަށް" ޑިފެންސް ޕެއާ އެވެ. ނެވިލް ބުނި ގޮތުގައި ބައެއް ފަހަރު އެމީހުންގެ ފަރާތުން ފެންނަނީ ވަރަށް އާދައިގެ ގޯސްތަކެވެ. ނަމަވެސް އަނެއްބައި ފަހަރު އެމީހުންނަކީ ހުއްޓުވަން އުނދަގޫ ބައެކެވެ.
2026 ވަނަ އަހަރުގެ ފީފާ ވޯލްޑް ކަޕް ކޮލިފައިންގެ ގްރޫޕް ޖޭގައި އާޖެންޓީނާ އާއި އަލްޖީރިއާ ބައްދަލުކުރި މެޗުގެ ތެރެއިން، އަލްޖީރިއާއިން ފޮނުވާލި ހިލޭ ޖެހުމެއް ދިފާއު ކުރުމަށް އާޖެންޓީނާގެ ކުޅުންތެރިން މަސައްކަތް ކުރަނީ | ގެޓީ އިމޭޖަސް
ޓޮޓެންހަމްއަށް ކުޅޭ ރޮމޭރޯ ވަނީ ނެވިލްގެ މި ވާހަކަތަކަށް ރައްދުދީފަ އެވެ. އުމުރުން 28 އަހަރުގެ މި ދެ ކުޅުންތެރިން ފައިނަލް މެޗުގައި އެމީހުންގެ އެންމެ ފަހު ވަގުތާ ހަމައަށް ހިތްވަރު ދައްކާނެ އެވެ. މާޓިނޭޒްގެ އިސްކޮޅުގައި 1.75 މީޓަރު ހުރުމުން، އޭނާއާ މެދު ޕޯލް ސްކޯލްސް ފަދަ ކުޅުންތެރިން ފާޑުކީ ނަމަވެސް، އޭނާއަކީ ސަޕޯޓަރުންގެ ލޯބި ހޯދާފައިވާ ހިތްވަރުގަދަ ކުޅުންތެރިއެކެވެ.
ސްޕެއިންގެ އޮޔަރޒަބަލް، މާޓިނޭޒްއަށްވުރެ 6 ސެންޓިމީޓަރު އިސްކޮޅުން ދިގު ނަމަވެސް، މެޗުގެ ނަތީޖާ ނިންމާނީ ހަމައެކަނި އިސްކޮޅަކުން ނޫނެވެ. މުޅި ދުނިޔޭގެ ސަމާލުކަން ހުއްޓިފައިވަނީ ބާސެލޯނާގެ މާޒީ، މިހާރު އަދި މުސްތަޤުބަލަށެވެ. ފައިނަލްގައި ފެންނާނީ މެސީގެ ޖާދޫ ހެއްޔެވެ؟ ނުވަތަ ޔަމާލްގެ މޮޅު ކުޅުން ހެއްޔެވެ؟ މިއީ ހަމައެކަނި ސަޕޯޓަރުންގެ އިންތިޒާރެއް ނޫނެވެ. މިއީ މުޅި ފުޓްބޯޅަ އިންޑަސްޓްރީވެސް އިންތިޒާރުކުރާ، 2026 ވަނަ އަހަރުގެ ވޯލްޑް ކަޕްގެ އެންމެ ފޯރިގަދަ ވަގުތެވެ.
