ދުޝްމަނުން އަމާން ދިނުމުން ނޫނީ ހަމަލާތައް ނުހުއްޓާނެ ކަމަށް އީރާނުން ބުނެފި

އީރާނުގެ ދުޝްމަނުން "މުޅިން ބޯލަނބައި އަމާންދޭދެން" އެމެރިކާގެ އަމާޒުތަކަށް ދެމުންދާ ހަމަލާތައް ކުރިއަށް ގެންދާނެ ކަމަށް އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުޙައްމަދު ބާގިރު ޒުލްގަދަރު ވިދާޅުވެއްޖެ އެވެ. އޭނާ ވިދާޅުވީ މި ހަމަލާތަކަކީ މިނާބް އަދި ލާމަރްދުގައި ކުޑަކުދިން މަރާ ހިންގި ގަތުލުއާންމުގެ ބަދަލުހިފުމުގެ ގޮތުން ދެމުންދާ ހަމަލާތަކެއް ކަމަށެވެ.

ހޮނިހިރު ދުވަހު އާންމުކުރެއްވި މެސެޖެއްގައި ޒުލްގަދަރު ވިދާޅުވީ، އެ ސަރަހައްދުން ފެންނަ ކޮންމެ ދުންގަނޑަކީ އެމެރިކާގެ އަސްކަރީ، ސަލާމަތީ ނުވަތަ މާލީ މަރުކަޒަކަށް އަމާޒުކޮށް ދީފައިވާ ހަމަލާއެއްގެ ނިޝާނެއް ކަމަށެވެ.

އީރާނުގެ ހަނގުރާމަވެރިން މެދުކެނޑުމެއްނެތި އަމާޒުތަކަށް ދެމުންދާ މި ހަމަލާތަކަކީ، ހޭލައިތިބި އީރާނުގެ ރައްޔިތުންގެ ރުޅިވެރިކަން އިސްތިއުމާރީ ބާރުތަކަށް ދައްކާލުން ކަމަށް އޭނާ އިތުރަށް ވިދާޅުވި އެވެ. އަދި މާތްﷲގެ އިރާދަފުޅާއެކު، ދުޝްމަނުން މުޅިން ބޯލަނބައި އަމާންދެންދެން އަދި މިނާބް އާއި ލާމަރްދުގެ މައުސޫމް ކުޑަކުދިންގެ ލޭގެ ބަދަލު ހިފެންދެން މި ހަމަލާތައް ކުރިއަށްދާނެ ކަމަށްވެސް ޒުލްގަދަރު ވިދާޅުވި އެވެ.

އީރާނާ ދެކޮޅަށް އެމެރިކާ އާއި އިސްރާއީލުން ގުޅިގެން ފެބްރުއަރީ މަހުގެ 28 ވަނަ ދުވަހު ފެށި ޣައިރު ގާނޫނީ އުދުވާނީ ހަނގުރާމައަށް މިހާރު ވަނީ ފަސް މަސް ފުރިފަ އެވެ.

އީރާނުން ދެމުންދިޔަ ބަދަލުހިފުމުގެ ހަމަލާތަކާއި ހުރްމުޒް ކަނޑުއޮޅީގެ ކޮންޓްރޯލް އީރާނުން ހޯދުމާ ގުޅިގެން، އޭޕްރިލް މަހުގެ 8 ވަނަ ދުވަހު، 40 ދުވަހަށްފަހު އެމެރިކާ އާއި އިސްރާއީލަށް ހަނގުރާމަ ހުއްޓާލުމުގެ އެއްބަސްވުމަކަށް އަންނަން މަޖުބޫރުވި އެވެ.

ނަމަވެސް، ޖޫން 17 ވަނަ ދުވަހު ޕާކިސްތާނުން މެދުވެރިވެގެން އެކުލަވާލި ފަހުމުނާމާއާ ޚިލާފަށް، ހުރްމުޒް ކަނޑުއޮޅިން ހުއްދަނެތި އަސްކަރީ އުޅަނދުތައް ދަތުރުކުރުވަން އެމެރިކާއިން މަސައްކަތް ކުރުމުން، އެ އެއްބަސްވުން ދެމެހެއްޓުމަށްޓަކައި އީރާނުގެ ކަނޑުގެ ސިފައިން ވަނީ އެ އުޅަނދުތައް ހުއްޓުވާފަ އެވެ. މިއާއެކު އެމެރިކާއިން ވަނީ އަލުން އީރާނަށް ހަމަލާދޭން ފަށާފަ އެވެ.

ވޭތުވެދިޔަ 13 ރޭ މެދުކެނޑުމެއްނެތި އެމެރިކާގެ އަސްކަރިއްޔާއިން ދަނީ އީރާނުގެ އެކި ސަރަހައްދުތަކަށް ވައިގެ މަގުން ހަމަލާދެމުންނެވެ. މީގެ ތެރޭގައި މުވާސަލާތީ އިންފްރާސްޓްރަކްޗަރާއި، ފާލަންތަކާއި، ފެން ސާފުކުރާ ޕްލާންޓްތައް ފަދަ އާންމުންގެ ޚިދުމަތްތަކާ ގުޅޭ ތަންތަނަށް އަމާޒުކޮށް ދިން ހަމަލާތަކުގައި 55 މީހުން މަރުވެ، 645 މީހުން ވަނީ ޒަޚަމްވެފަ އެވެ.

މި ހަމަލާތަކުގެ ރައްދުގައި އީރާނުގެ ހަތިޔާރު އެޅި ފައުޖުތަކުން ދަނީ އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ޑްރޯން އަދި މިސައިލް ހަމަލާތައް ދެމުންނެވެ.