އަވަހާރަކޮށްލަފާނެ ކަމުގެ ބިރަށް ޓްރަމްޕް ދަތުރުކުރެއްވި މަތިންދާ ބޯޓު ކުއްލިގޮތަކަށް ބަދަލުކުރި: ރިޕޯޓު

މި މަހު ތުރުކީވިލާތުގައި ބޭއްވި ނޭޓޯ ސަމިޓަށްފަހު އެނބުރި ވަޑައިގަންނަވަނިކޮށް، އެމެރިކާގެ ރައީސް ޑޮނަލްޑް ޓްރަމްޕް ވަރަށް ކުއްލި ގޮތަކަށް ދަތުރުކުރެއްވި މަތިންދާބޯޓު ބަދަލުކުރެއްވި ކަމަށް ނިއުޔޯކް ޓައިމްސްއިން ރިޕޯޓްކޮށްފި އެވެ. މިކަމާ ގުޅުންހުރި ފަރާތްތަކާ ހަވާލާދީ ހުކުރު ދުވަހު އެ ނޫހުން ރިޕޯޓްކޮށްފައިވާ ގޮތުގައި، ޓްރަމްޕް ކުއްލި ގޮތަކަށް ބޯޓު ބަދަލުކުރެއްވީ އެމަނިކުފާނު އަވަހާރަކޮށްލުމަށް އީރާނުން ރާވަމުންދާ ކަމަށް ބުނާ ރިޕޯޓްތަކަކާ ގުޅިގެންނެވެ.

ނިއުޔޯކް ޓައިމްސްއިން ބުނި ގޮތުގައި، އަންކާރާއިން ފުރާވަޑައިގަތުމަށް ޓްރަމްޕް ބޭނުންކުރެއްވީ ކުރިން ބޭނުންކުރެއްވި ބޯއިން 747-8 މަރުކާގެ "އެއާ ފޯސް ވަން" ބޯޓުގެ ބަދަލުގައި، ދިފާއީ ނިޒާމު ވަރުގަދަ ކުރީގެ އެއާ ފޯސް ވަން ބޯޓެވެ. ގަތަރުން ހަދިޔާކޮށްފައިވާ އާ ބޯޓުގައި ދިފާއީ ގާބިލުކަން ކުޑަވުމުން، "އީރާނުގެ މަދަދުލިބޭ ހަނގުރާމަވެރި ޖަމާއަތްތަކުން" ރައީސްގެ ފުރާނައަށް ނުރައްކާކޮށްފާނެ ކަމަށް އޮފިޝަލުން ގަބޫލުކުރެއްވީ އެވެ.

މި ބަދަލު ގެނެސްފައިވަނީ ޓްރަމްޕަށް އަމާޒުކޮށް އީރާނުން ހަމަލާއެއް ދޭން އުޅޭ ކަމުގެ ޖާސޫސީ މައުލޫމާތު އިސްރާއީލުން އެމެރިކާއާ ހިއްސާކުރި ދަނޑިވަޅެއްގަ އެވެ. ނަމަވެސް، ބައެއް އެމެރިކާގެ އޮފިޝަލުން ގަބޫލުކުރާ ގޮތުގައި އިސްރާއީލުން މި މައުލޫމާތު ހިއްސާކުރީ އީރާނަށް ދޭ ހަމަލާތައް ވަރުގަދަ ކުރުމަށް ޓްރަމްޕަށް ބާރުއެޅުމުގެ ގޮތުން ކަމަށް ނިއުޔޯކް ޓައިމްސްއިން ރިޕޯޓްކޮށްފައިވެ އެވެ.

އެމެރިކާއާއި އިސްރާއީލުން އީރާނަށް ދެމުންދާ ބޮމުގެ ހަމަލާތަކުގައި އެ ގައުމުގެ ގިނަ އިސް އޮފިޝަލުންނާއި އަސްކަރީ ކޮމާންޑަރުން ވަނީ މަރާލާފަ އެވެ. މީގެ ތެރޭގައި ފެބްރުއަރީ 28 ވަނަ ދުވަހު ތެހެރާންގައި ހުންނަ އޭނާގެ ގަނޑުވަރަށް ދިން ހަމަލާއެއްގައި އަވަހާރަކޮށްލި އީރާނުގެ ރޫހާނީ ލީޑަރު އަލީ ޚާމަނާއީ ވެސް ހިމެނެ އެވެ.

މި ހާދިސާއަށްފަހު ޓްރަމްޕް ވިދާޅުވީ އޭނާއަކީ އީރާނުން މަރާލަން ބޭނުންވާ މީހުންގެ ލިސްޓުގައި ހިމެނޭ މީހެއް ކަމަށެވެ. އަދި އޭނާ އަވަހާރަކޮށްލަން މަސައްކަތްކޮށްފިނަމަ، އީރާނަށް އެތައް ހާސް މިސައިލް ހަމަލާއެއް ފޮނުވާލާނެ ކަމުގެ އިންޒާރު ވެސް ޓްރަމްޕް ވަނީ ދެއްވާފަ އެވެ.

އީރާނުގެ އާ ލީޑަރު މުޖްތަބާ ޚާމަނާއީ ވަނީ އޭނާގެ ބައްޕަގެ މަރުގެ ބަދަލު ހިފާނެ ކަމަށް މި މަހު ވައުދުވެވަޑައިގެންފަ އެވެ. ނަމަވެސް އޭނާ ޓްރަމްޕްގެ ނަން ސީދާ ވިދާޅެއް ނުވެ އެވެ. އެހެންނަމަވެސް، ކުރީގެ ލީޑަރު ޚާމަނާއީއާއި އެހެނިހެން އޮފިޝަލުންގެ ޖަނާޒާގެ ހިނގާލުންތަކުގައި އީރާނުގެ ގިނަ އަދަދެއްގެ އާންމުން ވަނީ ޓްރަމްޕް މަރާލުމަށް ގޮވާލާފަ އެވެ.