ޓްރަމްޕްގެ މަޖާ ވާހަކަފުޅުތަކެއް: ވިދާޅުވީ ތިން އިންތިޚާބު ކާމިޔާބުކޮށްފައިވާ ކަމަށާއި، ހަތަރު ވަނަ ދައުރަކަށް ވެސް ވާދަ ކުރައްވާނެ ކަމަށް!

އެމެރިކާގެ ރައީސް ކަމުގެ ހަތަރު ވަނަ ދައުރަކަށް ވާދަ ކުރައްވާނެ ކަމަށް ވިދާޅުވެ، އެ ޤައުމުގެ ރައީސް ޑޮނަލްޑް ޓްރަމްޕް ސަމާސާ ޒާތަކަށް ވާހަކަފުޅު ދައްކަވައިފި އެވެ. 

ހުކުރު ދުވަހުގެރޭ އެމެރިކާގެ ރިޔާސީ ގަނޑުވަރު ވައިޓް ހައުސްގައި އޮތް ކޮރެސްޕޮންޑެންޓްސް ޑިނަރގައި ވާހަކަފުޅު ދައްކަވަމުން ޓްރަމްޕް ވިދާޅުވީ، އެމެރިކާގެ ރައީސް ކަމުގެ ހަތަރު ވަނަ ދައުރަކަށް ވާދަ ކުރައްވާނެކަން އުފަލާ އެކު އިއުލާން ކުރައްވާ ކަމަށެވެ. އެއާ އެކު ޓްރަމްޕް ވަނީ، "ޓްރަމްޕް 2028" ޖަހާފައިވާ ތޮތްޕެއް ވެސް އަޅުއްވައިފަ އެވެ.

އެއާ އެކު ޓްރަމްޕް ވިދާޅުވީ، މިހާތަނަށް އެމެރިކާގެ ތިން ރިޔާސީ އިންތިޚާބު އޭނާ ކާމިޔާބު ކުރައްވާފައިވާ ކަމަށާއި، އަނެއްކާ ވެސް އެކަން ތަކުރާރު ކުރައްވާނެ ކަމަށެވެ. ދެ ވަނަ އަށް އޭނާ ވާދަ ކުރެއްވި ރިޔާސީ އިންތިޚާބުގައި ވަރަށް ރަނގަޅު ނަތީޖާ ތަކެއް ލިބުނު ކަމަށާއި، އެ އިންތިޚާބަކީ އޮޅުވާލާފައިވާ އިންތިޚާބެއް ކަމަށް ވިދާޅުވި އެވެ. ނަމަވެސް، އެެ އިންތިޚާބުން ވެސް މޮޅުވީ އޭނާ ކަމަށް ޓްރަމްޕް ވިދާޅުވި އެވެ. 

ޓްރަމްޕް އެ އިޝާރާތް ކުރެއްވީ 2020 ވަނަ އަހަރު އެމެރިކާގައި ބޭއްވި ރިޔާސީ އިންތިޚާބަށެވެ. ދެ ވަނަ ދައުރަކަށް ވެރިކަން ހޯއްްދެއްވުމަށް އެ އިންތިޚާބުގައި ޓްރަމްޕް ވާދަ ކުރެއްވި ނަމަވެސް، ކުރީގެ ރައީސް ޖޯ ބައިޑަން ވަނީ ޓްރަމްޕް ބަލި ކުރައްވައިފަ އެވެ. އޭގެ ހަތަރު އަހަރު ފަހުން 2024 ވަނަ އަހަރު އޮތް ރިޔާސީ އިންތިޚާބު ކާމިޔާބު ކުރައްވައި ޓްރަމްޕް ވަނީ ދެ ވަނަ ދައުރެއް ހޯއްދަވައިފަ އެވެ. 

އެމެރިކާގެ ޤާނޫނު އަސާސީގައި ބުނެފައިވާ ގޮތުން، އެ ޤައުމުގެ ރައީސްކަން ކުރެވޭނީ އެންމެ ގިނަވެގެން ދެ ދައުރަށެވެ. މިހާރު ޓްރަމްޕް ގެންދަވަނީ އޭނާގެ ދެ ވަނަ ދައުރު ފުރިހަމަ ކުރައްވަމުން ކަމަށް ވާތީ، އިތުރު ދައުރަކަށް ވާދަ ކުރެއްވުމުގެ ފުރުސަތު އޭނާ އަކަށް ނޯންނާނެ އެވެ. އެހެން ނަމަވެސް، ހަތަރު ވަނަ ދައުރަކަށް ވެސް ވާދަ ކުރައްވާނެ ކަމަށް ވިދާޅުވެ ޓްރަމްޕް ވާހަކަ ދެއްކެވިއިރު، ގިނަ ބަޔަކު ބުނަނީ މިއީ ޓްރަމްޕް ސަމާސާ ކުރެއްވުމުގެ ގޮތުން ދެއްކެވި ވާހަކަފުޅެއް ކަމަށެވެ. 

މީގެ ކުރިން ވެސް އެތައް ފަހަރެއްގެ މަތިން ޓްރަމްޕް ވަނީ، 2020 ވަނަ އަހަރުގެ ރިޔާސީ އިންތިޚާބަކީ އޮޅުވާލާފައިވާ އަދި ވަގަށް ނަގާފައިވާ އިންތިޚާބެއް ކަމަށް ތުހުމަތު ކުރައްވައިފަ އެވެ. ނަމަވެސް، އެކަމާ ގުޅޭ އިތުރު އެއްވެސް ހެއްކެއް ޓްރަމްޕް އަށް ދެއްކެވިފައި ނުވެ އެވެ. އެފަހަރުގެ އިންތިޚާބުން ބަލިވުމާ އެކު، ޓްރަމްޕްގެ ސަޕޯޓަރުން ވަނީ ހަމަނުޖެހުން ހިންގައި، ބޮޑެތި ގެއްލުން ތަކެއް ވެސް ދީފައި އެވެ.