ރޫބިއޯ: ޓްރަމްޕްގެ ސިޔާސަތަކީ "ލޮލަކަށް ބޮލެއް"
23 ޖުލައި 2026 | ބުރާސްފަތި 10:47އީރާނުން އެމެރިކާއާއެކު މަޝްވަރާކުރަން ބޭނުންވި ނަމަވެސް، އެ ގައުމުން އެއްބަސްވުންތަކާ ޚިލާފުވާތީ މިވަގުތު އިޖާބަދިނުމުގެ ބޭނުމެއް ނެތް ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ. އީރާނުން ދޭ ކޮންމެ ހަމަލާއަކަށް އެމެރިކާއިން ދޭނީ ވަރުގަދަ ރައްދެއްކަން ފާހަގަކުރައްވައި، ރައީސް ޓްރަމްޕްގެ ސިޔާސަތަކީ "ލޮލަކަށް ބޮލެއް" ކަމަށް ރޫބިއޯ ސިފަކުރެއްވި.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ ޓްރަމްޕްގެ ސިޔާސަތީ "ލޮލަކަށް ބޮލެއް" ކަމަށް | ޕޮލިޓިކަލްޕެން/އެކްސް
އީރާނުން އެމެރިކާއާއެކު އެއްބަސްވުމަކަށް އައުމަށް "އާދޭސްކުރަމުންދާ" ކަމަށާއި، ރައީސް ޑޮނަލްޑް ޓްރަމްޕްގެ ސިޔާސަތަކީ "ލޮލަކަށް ބޮލެއް" ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.
ހުރްމުޒް ކަނޑުއޮޅިން ދަތުރުކުރާ އުޅަނދަކަށް އީރާނުން ހަމަލާދޭ ކޮންމެ ފަހަރަކު، އެ ގައުމުގެ ބްރިޖެއް ނުވަތަ އިންޖީނުގެއެއް "ބޮން އަޅައި ސުންނާފަތިކޮށްލާނެ" ކަމަށް ބުނެ ރައީސް ޓްރަމްޕް ދެއްވާފައިވާ އިންޒާރުތަކާ ގުޅޭގޮތުން ބުރާސްފަތި ދުވަހު ރޫބިއޯއާ ވަނީ ނޫސްވެރިން ސުވާލުކޮށްފަ އެވެ.
ފިލިޕީންސްގެ މެނީލާގައި ކުރިއަށްދާ އާސިއާން ސަމިޓްގެ ހަވާސާގައި ނޫސްވެރިންނާ ވާހަކަދައްކަވަމުން ރޫބިއޯ ވިދާޅުވީ، ސީދާ ގޮތުންނާއި ނުސީދާ ގޮތުން ވެސް އީރާނުން އެމެރިކާގެ ކިބައިން އެދެމުންދަނީ އެއްބަސްވުމަކަށް އައުމަށާއި މަޝްވަރާ ކުރުމަށް ކަމަށެވެ.
ރޫބިއޯ އިތުރަށް ވިދާޅުވީ، އެމެރިކާއާއި އީރާނާ ދެމެދު ހަމަލާބަދަލުކުރުން ހުއްޓާލުމުގެ އެއްބަސްވުމަކަށް އަންނަ ކޮންމެ ފަހަރަކު، އީރާނުގެ ވެރިކަމުގައި ތިއްބެވި ބޭފުޅުން އެ އެއްބަސްވުމާ ޚިލާފުވާ ކަމަށާއި ނުވަތަ އެއްބަސްވުމަށް ބަދަލު ގެންނަން ބޭނުންވާ ކަމަށެވެ.
"އެހެންކަމުން އެމީހުންނަށް އޭގެ އަގު ދައްކަން ޖެހޭނެ. އަދި ކޮންމެ ރެއަކު އެ އަގު ދާނީ އެއްދުވަހުން އަނެއްދުވަހަށް ބޮޑުވަމުން،" ރޫބިއޯ ވިދާޅުވި އެވެ.
ރޫބިއޯ ވިދާޅުވި ގޮތުގައި، އީރާނަށް އަދިވެސް ހަމަބުއްދި ލިބިފައި ނުވާތީ، އެ ގައުމުން ހުށަހަޅާ ހުށަހެޅުންތަކަށް މިވަގުތު އިޖާބަދިނުމުގެ ބޭނުމެއް އޮތް ކަމަށް ރައީސް ޓްރަމްޕް ދެކެވަޑައެއް ނުގަންނަވަ އެވެ. ސަބަބަކީ އީރާނުން އެއްބަސްވުމަކަށް އައުމަށް ތައްޔާރު ނޫން ކަމަށާއި، ވަކިން ހާއްސަކޮށް އެމީހުން އަމަލުކުރާނެ ފަދަ އެއްބަސްވުމަކަށް އައުމުގެ ގާބިލުކަން އެ ގައުމުގައި ނެތް ކަމަށް އޭނާ ވިދާޅުވި އެވެ.
އީރާނުގެ ޚާރިޖީ ވަޒީރު އައްބާސް އަރާގްޗީ ދާދިފަހުން ވަނީ އެ ގައުމުގެ ދިފާއީ ސިޔާސަތަކީ "ލޮލަކަށް ލޮލެއް" ކަމަށް ސިފަކުރައްވާފަ އެވެ.
ބުދަ ދުވަހުގެ ރޭ އެކްސްގައި ކުރެއްވި ޕޯސްޓެއްގައި އަރާގްޗީ ވިދާޅުވީ، އީރާނުގެ އުމްރާނީ ވަސީލަތްތައް ހިމެނޭހެން އެ ގައުމަށް ދޭ ކޮންމެ ހަމަލާއަކަށް ވަރުގަދަ އަދި ހަރުކަށި ރައްދެއް ދޭނެ ކަމަށެވެ.
އަރާގްޗީގެ ވާހަކަތަކަށް ރައްދު ދެއްވަމުން ރޫބިއޯ ވިދާޅުވީ، ރައީސް ޓްރަމްޕްގެ ސިޔާސަތަކީ "ލޮލަކަށް ބޮލެއް" ކަމަށެވެ. އަދި ހަގީގަތުގައި ވެސް ކަންތައް ވާނީ އެގޮތަށް ކަމަށް އޭނާ ވިދާޅުވި އެވެ.
